ಕೋವಿಡ್-19 ಕಳವಳ: ಪೂಲ್ ರೈಡ್ ರದ್ದುಗೊಳಿಸಿದ ಊಬರ್, ಓಲಾ

Team Udayavani, Mar 21, 2020, 12:25 PM IST

ಬೆಂಗಳೂರು: ದೇಶದಾದ್ಯಂತ ಕೋವಿಡ್-19 ಸೋಂಕು ದಿನದಿಂದ ದಿನಕ್ಕೆ ತಮ್ಮ ವ್ಯಾಪ್ತಿಯನ್ನು ಹೆಚ್ಚಿಸುತ್ತಿದ್ದು, ಮುನ್ನೆಚ್ಚರಿಕಾ ಕ್ರಮವಾಗಿ ದೇಶದಲ್ಲಿ ಕಟ್ಟೆಚ್ಚರ ವಹಿಸಲಾಗುತ್ತಿದೆ. ಸೋಂಕು ಹರಡುವುದನ್ನು ತಡೆಗಟ್ಟಲು ಪ್ರಧಾನಿ ನರೇಂದ್ರ ಮೋದಿಯವರು ದೇಶದಲ್ಲಿ ರವಿವಾರ ಜನತಾ ಕರ್ಫ್ಯೂ ಗೆ ಕರೆಕೊಟ್ಟಿದ್ದಾರೆ.

ಇದೇ ವೇಳೆಗೆ ಕ್ಯಾಬ್ ಕಂಪನೆಗಳಾದ ಓಲಾ ಮತ್ತು ಊಬರ್ ತನ್ನ ಪೂಲ್ ಡ್ರೈವ್ ಸೇವೆಯನ್ನು ರದ್ದು ಮಾಡಿದೆ. ಕೋವಿಡ್ -19 ಸೋಂಕು ಹರಡುವುದನ್ನು ತಪ್ಪಿಸುವ ನಿಟ್ಟಿನಲ್ಲಿ ಪೂಲ್ ರೈಡ್ ಅನ್ನು ರದ್ದು ಮಾಡಿದೆ.

ಕೋವಿಡ್-19 ಸೋಂಕಿನ ಪ್ರಮಾಣ ಹೆಚ್ಚಾದ ನಂತರ ಓಲಾ ಮತ್ತು ಊಬರ್ ಗಳಲ್ಲಿ ಪೂಲ್ ರೈಡ್ ಮಾಡುವ ಜನರ ಸಂಖ್ಯೆ ಕಡಿಮೆಯಾಗಿದೆ. ಸೋಂಕಿನ ಕುರಿತು ಭಯಬೀತರಾಗಿರುವ ಜನರು ಪೂಲ್ ರೈಡ್ ಕಡೆಗೆ ಮನಸ್ಸು ಮಾಡುತ್ತಿಲ್ಲ ಎನ್ನಲಾಗಿದೆ.

ಭಾರತದಲ್ಲಿ ಇದುವರೆಗೆ 275 ಕೋವಿಡ್-19 ಪ್ರಕರಣಗಳು ದೃಢಪಟ್ಟಿದ್ದು, ಐದು ಜನರು ಸೋಂಕಿನ ಪರಿಣಾಮ ಸಾವನ್ನಪ್ಪಿದ್ದಾರೆ. ಕರ್ನಾಟಕದಲ್ಲಿ ಶನಿವಾರ ಒಂದು ಹೊಸ ಪ್ರಕರಣ ದೃಢಪಟ್ಟಿದೆ.