ಕೋವಿಡ್‌ 19 ಆತಂಕ: ಲಾಕ್‌ಡೌನ್‌ ಅರಗಿಸಿಕೊಳ್ಳುತ್ತಿರುವ ಜನತೆ

Team Udayavani, Mar 28, 2020, 5:26 AM IST

ಮಂಗಳೂರು/ ಮಣಿಪಾಲ: ಕೋವಿಡ್‌ 19 ಆತಂಕದ ಹಿನ್ನೆಲೆಯಲ್ಲಿ ದೇಶದಲ್ಲಿ ಜಾರಿಯಾಗಿರುವ ಲಾಕ್‌ಡೌನ್‌ಗೆ ಈಗ ನಿಧಾನವಾಗಿ ಜನತೆ ಹೊಂದಿಕೊಳ್ಳುತ್ತಿದ್ದಾರೆ.

ಪುತ್ತೂರಿನಂತಹ ಕೆಲವೇ ಕಡೆಗಳಲ್ಲಿ ಮಾತ್ರ ಆದೇಶ ಉಲ್ಲಂ ಸಿ ಅನಗತ್ಯ ತಿರುಗಾಟ ನಡೆಸುತ್ತಿದ್ದವರ ಮೇಲೆ ಪೊಲೀಸರು ಲಘು ಲಾಠಿ ಪ್ರಹಾರ ನಡೆಸಬೇಕಾಯಿತು.

ಲಾಕ್‌ಡೌನ್‌ನ ಎರಡು ದಿನಗಳಲ್ಲಿ ಜನತೆ ಅದನ್ನು ಅರಗಿಸಿಕೊಳ್ಳಲು ಪ್ರಯಾಸ ಪಟ್ಟಿದ್ದರು. ಮನೆಯಿಂದ ಹೊರಬರಲು ಇರುವ ನಿರ್ಬಂಧಕ್ಕೆ ಸಾರ್ವಜನಿಕರು ಅಷ್ಟೊಂದು ಉತ್ತಮವಾಗಿ ಸ್ಪಂದಿಸಿರಲಿಲ್ಲ. ಈಗ ಲಾಕ್‌ಡೌನ್‌ ಆದ ಮೂರನೇ ದಿನ ಮಂಗಳೂರು ನಗರ, ಪುತ್ತೂರು, ಬೆಳ್ತಂಗಡಿ, ಸುಳ್ಯ, ಬೆಳ್ಳಾರೆ, ಬಿ.ಸಿ. ರೋಡ್‌, ಕಲ್ಲಡ್ಕ ದಂತಹ ಪಟ್ಟಣಗಳಲ್ಲಿಯೂ ಜಿಲ್ಲೆಯ ಗ್ರಾಮಾಂತರ ಪ್ರದೇಶ, ಕಾಸರಗೋಡಿನಲ್ಲಿಯೂ ಸಾರ್ವಜನಿಕರು ಲಾಕ್‌ಡೌನ್‌ ಆದೇಶವನ್ನು ಮನ್ನಿಸಿ ಮನೆಯೊಳಗೆ ಇರುವುದು ಹೆಚ್ಚು ಕಂಡು ಬಂದಿದೆ. ಆವಶ್ಯಕ ವಸ್ತುಗಳನ್ನು ಕೊಳ್ಳಲು ಮೀಸಲಾಗಿದ್ದ ಸಮಯದಲ್ಲಿ ಪೇಟೆಯ ಕಡೆಗೆ ಬಂದವರೂ ಸಾಮಾಜಿಕ ಅಂತರ ಕಾಪಾಡಿಕೊಳ್ಳುತ್ತಿರುವುದು ಗಮನಾರ್ಹ ವಾಗಿದೆ. ಜತೆಗೆ, ಮಾಸ್ಕ್ ಧರಿಸುವ ಮೂಲಕ ವೈಯಕ್ತಿಕ ಮುನ್ನೆಚ್ಚರಿಕೆಯನ್ನು ಪಾಲಿಸುವವರ ಸಂಖ್ಯೆಯೂ ಹೆಚ್ಚಿದೆ.

ಮಂಗಳೂರು ವರದಿ
ಕಳೆದ ಒಂದೆರಡು ದಿನಗಳಿಗೆ ಹೋಲಿಸಿದರೆ ಶುಕ್ರವಾರ ಮಂಗಳೂರು ನಗರದಲ್ಲಿ ಜನಸಂಚಾರ ವಿರಳವಾಗಿತ್ತು. ವಾಹನ ಸಂಚಾರವೂ ಕಡಿಮೆ ಇತ್ತು. ಬೆಳಗ್ಗೆ 10 ಗಂಟೆಯ ವರೆಗೆ ನಗರದಲ್ಲಿ ತುಸು ಜನ, ವಾಹನ ಸಂಚಾರ ಇತ್ತಾದರೂ ಬಳಿಕ ಕಡಿಮೆಯಾಗತೊಡಗಿತ್ತು. ಸಾರ್ವಜನಿಕರು ನಗರದ ವಿವಿಧ ಅಂಗಡಿಗಳಲ್ಲಿ ಸರತಿ ಸಾಲಿನಲ್ಲಿ ನಿಲ್ಲಬೇಕಾದರೆ ಸಾಮಾಜಿಕ ಅಂತರ ಕಾಯ್ದುಕೊಳ್ಳುತ್ತಿದ್ದ ದೃಶ್ಯ ಕಂಡು ಬಂತು. ಮಧ್ಯಾಹ್ನ 12 ಗಂಟೆಯ ಅನಂತರ ಎಲ್ಲಿಯೂ ರಸ್ತೆಗಳಲ್ಲಿ ಜನರು ಓಡಾಡು ತ್ತಿದ್ದದ್ದು ಅಷ್ಟಾಗಿ ಕಾಣಿಸುತ್ತಿರಲಿಲ್ಲ. ತುಂಬಾ ಅನಿವಾರ್ಯವಿದ್ದವರಷ್ಟೇ ಹೊರ ಬರುತ್ತಿದ್ದರು. ಜನತೆ ಈಗ ಲಾಕ್‌ಡೌನ್‌ ನಿಯಮವನ್ನು ಸಮ ರ್ಪಕವಾಗಿ ಪಾಲಿಸುವ ಮೂಲಕ ಸಾಮಾಜಿಕ ಅಂತರ ಕಾಯ್ದುಕೊಳ್ಳುವಿಕೆಗೆ ಮಹತ್ವ ನೀಡುತ್ತಿರುವುದು ಶ್ಲಾಘನೀಯ.

ಸಾಮಾಜಿಕ ಅಂತರ ಕಾಪಾಡಿಕೊಳ್ಳು ವುದಕ್ಕಾಗಿ ನಗರದ ಹೆಚ್ಚಿನ ಅಂಗಡಿಗಳಲ್ಲಿ ಮುಂದೆ ಈಗಾಗಲೇ ಮಾರ್ಕ್‌ ಮಾಡಲಾಗಿದ್ದು, “ಸಾಲಾಗಿ ಬನ್ನಿ’,”ಸಾಮಾಜಿಕ ಅಂತರ ಕಾಪಾಡಿ’ ಎಂದು ಬರೆಯಲಾಗಿದೆ. ಸರತಿ ಸಾಲು ತಪ್ಪಿಗೆ ಬರುವ ಸಾರ್ವಜನಿಕರನ್ನು ಅಂಗಡಿ ಮಾಲಕರು ಎಚ್ಚರಿಸುತ್ತಿದ್ದರು.ಧಾರ್ಮಿಕ ಕ್ಷೇತ್ರಗಳ ಗೇಟ್‌ ಮುಚ್ಚಲಾ ಗಿತ್ತು. ಹೆಚ್ಚಿನ ಸಂಖ್ಯೆಯ ನಿರ್ಗತಿಕರು ನಗರದ ರಸ್ತೆ ಬದಿಗಳಲ್ಲಿ ಸಾಲಾಗಿ ಕೂತಿದ್ದ ದೃಶ್ಯ ಕಂಡುಬಂತು. ಕೆಲವು ಸಂಘಟನೆಗಳು ಉಚಿತವಾಗಿ ಆಹಾರ ನೀಡುತ್ತಿದ್ದರು. ನಗರ ದಲ್ಲಿ ಮೆಡಿಕಲ್‌ ಅಂಗಡಿಗಳು ತೆರೆದಿದ್ದವು. ಕೆಲವು ಬ್ಯಾಂಕ್‌ ಶಾಖೆಗಳು, ಅಂಚೆ ಕಚೇರಿಗಳು ತೆರೆದಿದ್ದವಾದರೂ ಗ್ರಾಹಕರ ಸಂಖ್ಯೆ ವಿರಳವಾಗಿತ್ತು. ಸರಕಾರಿ ಕಚೇರಿಗಳಲ್ಲಿ ಸಿಬಂದಿ ಕೊರತೆ ಕಂಡುಬಂತು.

ಆವಶ್ಯಕ ಸಾಮಗ್ರಿ ಖರೀದಿ
ಮಂಗಳೂರು ನಗರದ ಸೆಂಟ್ರಲ್‌ ಮಾರುಕಟ್ಟೆಯಲ್ಲಿ ಬೆಳಗ್ಗೆ ಸಾರ್ವಜನಿಕರಿದ್ದರು. ದಿನಸಿ, ತರಕಾರಿ, ಹಣ್ಣು ಹಂಪಲುಗಳ ಖರೀದಿ ಕಂಡುಬಂತು. ಮಧ್ಯಾಹ್ನ 12 ಗಂಟೆಯ ವೇಳೆಗೆ ಬಹುತೇಕ ಅಂಗಡಿಗಳು ಬಾಗಿಲು ಮುಚ್ಚಿದ್ದವು. ಕೆಲವು ಕಡೆಗಳಲ್ಲಿ ಬಾಗಿಲು ತೆರೆದ ಅಂಗಡಿಗಳನ್ನು ಪೊಲೀಸರು, ಮನಪಾ ಟಾಸ್ಕ್ಪೋರ್ಸ್‌ ತಂಡ ಮುಚ್ಚಿಸುತ್ತಿದ್ದ ದೃಶ್ಯ ನಗರದಲ್ಲಿ ಕಂಡುಬಂತು.

ಅನಗತ್ಯ ವಾಹನ ಸಂಚಾರ ನಿಷೇಧ
ನಗರದಲ್ಲಿ ಅನಗತ್ಯವಾಗಿ ವಾಹನಗಳಲ್ಲಿ ಸಂಚರಿಸಬೇಡಿ. ಕೋವಿಡ್‌ 19 ಬಗ್ಗೆ ಜಾಗ್ರತೆ ವಹಿಸಿ ಎಂಬ ಬರಹವಿರುವ ಬ್ಯಾನರ್‌ ಅನ್ನು ನಗರದ ವಿವಿಧ ಕಡೆಗಳಲ್ಲಿ ಅಳವಡಿಸಲಾಗಿದೆ. ಸೆಂಟ್ರಲ್‌ ಮಾರುಕಟ್ಟೆಗೆ ಸರಕು ತುಂಬಿದ ಗೂಡ್ಸ್‌ ವಾಹನಗಳಿಗೆ ಮಾತ್ರ ಅವಕಾಶ ಎಂಬ ಬ್ಯಾನರ್‌ ಕೂಡ ಹಾಕಲಾಗಿದೆ.