ಹೋಂ ಕ್ವಾರಂಟೈನ್‌ನಲ್ಲಿದ್ದ ಭಾರತೀಯ ಬಾಕ್ಸಿಂಗ್‌ ಅಧಿಕಾರಿಗೆ ಮತ್ತೆ ನಡುಕ

Team Udayavani, Mar 28, 2020, 5:44 AM IST

ಗೋವಾ: ಕಳೆದ ಮಾ. 18ರಿಂದ ಹೋಮ್‌ ಕ್ವಾರಂಟೈನ್‌ನಲ್ಲಿರುವ ಭಾರತೀಯ ಬಾಕ್ಸಿಂಗ್‌ ತಾಂತ್ರಿಕ ಅಧಿಕಾರಿ ಲೆನ್ನಿ ಡಿ’ಗಾಮ ಅವರಿಗೆ ಮತ್ತೆ ನಡುಕ ಆರಂಭವಾಗಿದೆ. ಯಾಕೆಂದರೆ ಲಂಡನ್‌ನಲ್ಲಿ ಇತ್ತೀಚೆಗೆ ಯುರೋಪಿಯನ್‌ ಒಲಿಂಪಿಕ್‌ ಅರ್ಹತಾ ಕೂಟದಲ್ಲಿ ರೆಫ್ರಿಯಾಗಿ ಕರ್ತವ್ಯ ನಿರ್ವಹಿಸಿದ ವೇಳೆ ಇಬ್ಬರು ಬಾಕ್ಸರ್‌ ಮತ್ತು ಓರ್ವ ಟ್ರೈನರ್‌ಗೆ ಕೋವಿಡ್‌ 19 ವೈರಸ್‌ ಇರುವುದು ದೃಢಪಟ್ಟಿದೆ. ಹೀಗಾಗಿ ತನಗೂ ವೈರಸ್‌ ಸೋಂಕು ಇರುವ ನಡುಕ ಅವರಿಗೆ ಆರಂಭವಾಗಿದೆ.

ಲಂಡನ್‌ನಲ್ಲಿ ನಡೆದ ಯುರೋಪಿಯನ್‌ ಒಲಿಂಪಿಕ್‌ ಅರ್ಹತಾ ಕೂಟದಲ್ಲಿ ಡಿ”ಗಾಮ ರೆಫ್ರಿಯಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದರು. ಈ ಕೂಟ ಮಾ. 14ರಿಂದ 24ರ ವರೆಗೆ ನಡೆಯಬೇಕಿತ್ತು. ಆದರೆ ಎರಡು ದಿನ ನಡೆದ ಬಳಿಕ ಮಾ. 16ರಂದು ಕೂಟವನ್ನು ಅಮಾನತುಗೊಳಿಸಲಾಯಿತು. ಆಬಳಿಕ ಡಿ’ಗಾಮ ಭಾರತಕ್ಕೆ ಮರಳಿ ಹೋಂ ಕ್ವಾರಂಟೈನ್‌ನಲ್ಲಿ ಇದ್ದರು.

ಕ್ವಾರಂಟೈನ್‌ನಲ್ಲಿ ಬಾಕ್ಸಿಂಗ್‌ ತಂಡ
ಏಶ್ಯನ್‌ ಒಲಿಂಪಿಕ್‌ ಅರ್ಹತಾ ಕೂಟದಲ್ಲಿ ಪಾಲ್ಗೊಂಡ 26 ಸದಸ್ಯರ ಭಾರತೀಯ ಬಾಕ್ಸಿಂಗ್‌ ತಂಡವು ಮಾ. 12ರಂದು ಜೋರ್ಡಾನ್‌ನಿಂದ ಭಾರತಕ್ಕೆ ಆಗಮಿಸಿದ್ದು ಸದ್ಯ ಹೋಂ ಕ್ವಾರಂಟೈನ್‌ನಲ್ಲಿ ಇದೆ. ಈ ತಂಡದಲ್ಲಿದ್ದ ಬಾಕ್ಸರ್, ಕೋಚ್‌ ಮತ್ತು ಸಹಾಯಕ ಸಿಬಂದಿ ಜತೆ ಭಾರತೀಯ ಬಾಕ್ಸಿಂಗ್‌ ಫೆಡರೇಶನ್‌ ನಿಕಟ ಸಂಪರ್ಕ ಇಟ್ಟುಕೊಂಡಿದೆ.