ಕೃಷಿ ಚಟುವಟಿಕೆಯತ್ತ ಪ್ರಿಯಾ ಚಿತ್ತ

Team Udayavani, Apr 3, 2020, 2:43 PM IST

ಕೋವಿಡ್ 19 ಎಫೆಕ್ಟ್ ನಿಂದಾಗಿ ಒಂದೆಡೆ ಚಿತ್ರರಂಗವೇ ಸ್ಥಬ್ಧಗೊಂಡಿದೆ. ಇನ್ನೊಂದೆಡೆ ಬಹುತೇಕ ಚಿತ್ರೀಕರಣದ ಚಟುವಟಿಕೆಗಳೇ ಸ್ಥಗಿತಗೊಂಡಿದೆ. ಸ್ಟಾರ್‌ ನಟ,ನಟಿಯರೆಲ್ಲರೂ ಮನೆ ಸೇರಿದ್ದಾರೆ. ಮಕ್ಕಳೊಂದಿಗೆ, ಕುಟುಂಬದೊಂದಿಗೆ ಆಟವಾಡುತ್ತ, ಸಿನಿಮಾಗಳನ್ನು ವೀಕ್ಷಿಸುತ್ತ ಕಾಲ ಕಳೆಯುತ್ತಿದ್ದಾರೆ. ಅಂತೆಯೇ ಕೆಲ ಕಲಾವಿದರು ಕೃಷಿಚಟುವಟಿಕೆಯಲ್ಲೂ ನಿರತರಾಗಿದ್ದಾರೆ.

ಈಗಾಗಲೇ ಕಿಶೋರ್‌ ಅವರು ಕೃಷಿಯಲ್ಲಿ ನಿರತರಾಗಿರುವುದು ಗೊತ್ತೇ ಇದೆ. ಬಿಡುವಿನ ಸಮಯದಲ್ಲಿ ಅವರು ಕೃಷಿಯಲ್ಲಿ ತಮ್ಮನ್ನು ತೊಡಗಿಸಿಕೊಳ್ಳುವ ಮೂಲಕ ಪಕ್ಕಾ ರೈತರಾಗುವುದನ್ನು ಎಲ್ಲರೂ ನೋಡಿದ್ದಾರೆ.

ಈಗ ನಟಿ ಪ್ರಿಯಾ ಹಾಸನ್‌ ಅವರ ಸರದಿ. ಹೌದು, ಪ್ರಿಯಾ ಹಾಸನ್‌ ಅಂದಾಕ್ಷಣ ನೆನಪಾಗೋದೇ “ಜಂಭದ ಹುಡುಗಿ ‘ ಸಿನಿಮಾ. ಆ ಸಿನಿಮಾ ಮೂಲಕ ಚಿತ್ರರಸಿಕರ ಮನಗೆದ್ದ ಪ್ರಿಯಾ ಹಾಸನ್‌, ಒಂದಷ್ಟು ಸಾಹಸಮಯ ಸಿನಿಮಾಗಳ ಮೂಲಕ ಎಲ್ಲರಿಗೂ ಪ್ರಿಯವಾದರು. ನಟನೆ, ನಿರ್ದೇಶನ, ನಿರ್ಮಾಣ ಈ ಮೂರು ವಿಭಾಗದಲ್ಲೂ ತಮ್ಮನ್ನು ತೊಡಗಿಸಿಕೊಂಡಿದ್ದ ಪ್ರಿಯಾಹಾಸನ್‌, ಮದುವೆ ನಂತರ ಚಿತ್ರರಂಗದದಿಂದ ತುಸು ದೂರ ಇದ್ದರು. ಹಾಗಂತ, ಸಿನಿಮಾ ಪ್ರೀತಿಯನ್ನು ಬಿಡಲಿಲ್ಲ. ಕುಟುಂಬದೊಂದಿಗೆ ಸ್ವಲ್ಪ ಹೊತ್ತು ಕಾಲ ಕಳೆದ ಅವರು, ಸಿನಿಮಾ ಗ್ಯಾಪ್‌ ನಡುವೆ ಕೃಷಿಯತ್ತ ತಮ್ಮ ಚಿತ್ತ ಹರಿಸಿದ್ದಾರೆ.

ಅದರಲ್ಲೂ ಈಗ ಸಿನಿಮಾಗೆ ಬರಲು ಸಿದ್ಧವಾಗಿರುವ ಪ್ರಿಯಾಹಾಸನ್‌, ಇನ್ನೇನು ಕೋವಿಡ್ 19 ಸಮಸ್ಯೆ ಬಗೆಹರಿಯುತ್ತಿದ್ದಂತೆಯೇ ಅವರು, ಸಿನಿಮಾಗೆ ಕೈ ಹಾಕಲಿದ್ದಾರೆ. ಈಗಾಗಲೇ ಅದಕ್ಕೆ ತಯಾರಿಯೂ ನಡೆದಿದೆ. ಸಿನಿಮಾ ಜೊತೆಯಲ್ಲೇ ಅವರೀಗ ತಮ್ಮ ಹೊಲದತ್ತ ಚಿತ್ತ ಹರಿಸಿದ್ದಾರೆ. ಹೊಲದಲ್ಲಿ ಬೆಳೆದ ಬೆಳೆಯನ್ನು ನೋಡಿಕೊಳ್ಳುವ ಮೂಲಕ ನೀರು ಹರಿಬಿಡುವುದು, ಹೊಲದಲ್ಲೇ ಕಟ್ಟಿರುವ ಹಸು ಹಾಲು ಕರೆಯುವ ಕೆಲಸ ಮಾಡುವ ಮೂಲಕ ಸಮಯ ದೂಡುತ್ತಿದ್ದಾರೆ.

ಅಂದಹಾಗೆ, ಕೋವಿಡ್ 19 ಸಮಸ್ಯೆ ಬಗೆಹರಿಯುತ್ತಿದ್ದಂತೆಯೇ ಅವರು, ಹೊಸ ಸಿನಿಮಾ ಮೂಲಕ ಪ್ರೇಕ್ಷಕರ ಮುಂದೆ ಬರಲು ಸಜ್ಜಾಗುತ್ತಿದ್ದಾರೆ.­