ಟೆಲಿಫೋನ್‌ ಬೂತ್‌ ಮಾದರಿ ಕೋವಿಡ್‌ ಪರೀಕ್ಷೆ ಲ್ಯಾಬ್‌ ನೀಡಿಕೆ

Team Udayavani, Apr 9, 2020, 6:04 PM IST

ಹುಬ್ಬಳ್ಳಿ: ಕೋವಿಡ್‌ ಪರೀಕ್ಷೆಗೆ ಶಂಕಿತರ ಗಂಟಲು ದ್ರವದ ಪ್ರಯೋಗಾಲಯ ಮಾದರಿ ಸಂಗ್ರಹಿಸಲು ಕೋರಿಯಾ ದೇಶದವರು ಅನುಸರಿಸುತ್ತಿರುವ ಟೆಲಿಫೋನ್‌ ಬೂತ್‌ಗಳ ಮಾದರಿಯನ್ನು ಗದಗ ವೈದ್ಯ ಡಾ| ಪ್ರಕಾಶ ಸಂಕನೂರ ಅಲ್ಪ ಬದಲಾವಣೆಗಳೊಂದಿಗೆ ಅಭಿವೃದ್ಧಿ ಪಡಿಸಿದ್ದಾರೆ. ಗದಗ ವೈದ್ಯಕೀಯ ವಿಜ್ಞಾನ ಸಂಸ್ಥೆಯಲ್ಲಿ ರಾಜ್ಯದಲ್ಲೇ ಮೊದಲ ಬಾರಿ ಇದನ್ನು ಅಳವಡಿಸಿರುವ ಅವರು, ಬುಧವಾರ ಅದರ ಮತ್ತೂಂದು ಬೂತ್‌ ಅನ್ನು ವಿಧಾನ ಪರಿಷತ್‌ ಸದಸ್ಯ ಪ್ರೊ|
ಎಸ್‌.ವಿ. ಸಂಕನೂರ ಹುಬ್ಬಳ್ಳಿಯ ಕಿಮ್ಸ್‌ಗೆ ಹಸ್ತಾಂತರಿಸಿದರು.

ಕಿಮ್ಸ್‌ನ ವೈದ್ಯಕೀಯಅಧೀಕ್ಷಕ ಡಾ| ಅರುಣಕುಮಾರ ಚವ್ಹಾಣ ಮತ್ತಿತರ ತಜ್ಞರು ಈ ಸಾಧನ ಪ್ರಯೋಜನಕಾರಿಯಾಗಿದೆ. ವೈದ್ಯರು ಮತ್ತು ಸಿಬ್ಬಂದಿಗೆ ರಕ್ಷಣೆ ಒದಗಿಸುತ್ತದೆ ಎಂದು ಸಂತಸ ವ್ಯಕ್ತಪಡಿಸಿದರು. ಜಿಲ್ಲಾ ಉಸ್ತುವಾರಿ ಸಚಿವ ಜಗದೀಶ ಶೆಟ್ಟರ, ವಿವಿಧ ತಜ್ಞ ವೈದ್ಯರು ಈ ಸಂದರ್ಭದಲ್ಲಿದ್ದರು. ಹುಬ್ಬಳ್ಳಿಯ ಯಂಗ್‌ ಇಂಡಿಯಾ ಸಂಸ್ಥೆಯ ಡಾ| ಶ್ರೀನಿವಾಸ ಜೋಶಿ ಅವರ ತಂಡ ಕೂಡ ಬುಧವಾರ ಇದೇ ಮಾದರಿಯ ಮತ್ತೊಂದು ಬೂತ್‌ ಅನ್ನು ಕಿಮ್ಸ್‌ಗೆ ನೀಡಿದೆ.