ಸಂತೆಗೆ ತಂದ ಟೊಮ್ಯಾಟೋ ಬೀದಿ ಪಾಲು

Team Udayavani, Apr 10, 2020, 4:22 PM IST

ವಾಡಿ: ಪಟ್ಟಣದಲ್ಲಿ ನಡೆದ ಗುರುವಾರದ ಸಂತೆಯಲ್ಲಿ ಪೊಲೀಸರ ಸೈರನ್‌ ಶಬ್ದ ಕೇಳಿ ಓಡುವಾಗ ರಸ್ತೆಗೆ ಚೆಲ್ಲಿದ ಟೊಮ್ಯಾಟೋ ಆರಿಸುತ್ತಿರುವ ವ್ಯಾಪಾರಿಗಳು.

ವಾಡಿ: ಲಾಕ್‌ ಡೌನ್‌ ಶುರುವಾದಾಗಿನಿಂದ ಗುರುವಾರದ ಸಂತೆ ಜನರ ಪರದಾಟಕ್ಕೆ ಕಾರಣವಾಗುತ್ತಿದೆ. ಪೊಲೀಸ್‌ ವಾಹನದ ಸೈರನ್‌ ಶಬ್ದಕ್ಕೆ ಮತ್ತು ಲಾಠಿ ಹಿಡಿದು ಬರುವ ಪೊಲೀಸ್‌ ಸಿಬ್ಬಂದಿ ಓಡಾಟಕ್ಕೆ ತರಕಾರಿ-ಹಣ್ಣು ವ್ಯಾಪಾರಿಗಳು ಹಾಗೂ ಗ್ರಾಹಕರು ಕಕ್ಕಾಬಿಕ್ಕಿಯಾಗಿ ಓಡುವಂತಾಗಿದೆ. ಕೋವಿಡ್  ಕಟ್ಟೆಚ್ಚರಕ್ಕಾಗಿ ಘೋಷಣೆ ಆಗಿರುವ 144ನೇ ಸೆಕ್ಷನ್‌ ನಿಷೇಧಾಜ್ಞೆ ಮತ್ತು ಸಾಮಾಜಿಕ ಅಂತರ ಕಾಪಾಡುವ ಉದ್ದೇಶದಿಂದ ಪಟ್ಟಣದ ಗುರುವಾರದ ಸಂತೆಯಲ್ಲಿ ಮತ್ತೆ ಪೊಲೀಸರು ತರಕಾರಿ ವ್ಯಾಪಾರಿಗಳ ಬೆನ್ನಟ್ಟಿದ ಪ್ರಸಂಗ ನಡೆದಿದ್ದು, ಬೀದಿ ವ್ಯಾಪಾರಿಗಳು ಮತ್ತು ಸಂತೆಗೆ ಬಂದಿದ್ದ ಗ್ರಾಹಕರು ದಿಕ್ಕಾಪಾಲಾಗಿ ಗಲ್ಲಿ ರಸ್ತೆಗಳಿತ್ತ ಓಡಿದ ಘಟನೆ ನಡೆಯಿತು.

ವೃದ್ಧೆ ವ್ಯಾಪಾರಿಯೊಬ್ಬಳು ತರಕಾರಿ ಗಂಟು ಮೂಟೆಯೊಂದಿಗೆ ಓಡಿ ಹೋಗಲು ಪ್ರಯತ್ನಿಸಿ ಕುಸಿದು ಬಿದ್ದ ಪ್ರಸಂಗ ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಯಿತು. ಮಾರುಕಟ್ಟೆಗೆ ಬೀಗ ಬಿದ್ದಿದ್ದು, ತರಕಾರಿ ವ್ಯಾಪಾರಿಗಳು ಬಡಾವಣೆಗಳಿಗೆ ಹೋಗಿ ವ್ಯಾಪಾರ ಮಾಡುವಂತೆ ಪೊಲೀಸ್‌ ಇಲಾಖೆ ಹಾಗೂ ಪುರಸಭೆ ಅಧಿಕಾರಿಗಳು ಸೂಚಿಸಿದ್ದಾರೆ. ಬೆಳಗ್ಗೆ ತರಕಾರಿ-ಹಣ್ಣುಗಳನ್ನು ಕೈಬಂಡಿಯೊಳಗೆ ಸಂಗ್ರಹ ಮಾಡುತ್ತಿರುವಾಗಲೇ ಗ್ರಾಹಕರು ಖರೀದಿಗೆ ಮುಗಿಬಿದ್ದಿದ್ದರು. ತೂಕ ಮಾಡಿ ಕೊಡುವವರೆಗೂ ವ್ಯಾಪಾರಿ ಸ್ಥಳದಲ್ಲಿ ನಿಲ್ಲಬೇಕಾಗುತ್ತದೆ. ಇದೇ ಪ್ರಸಂಗ ಹುಡುಕಿಕೊಂಡು ಬಂದ ಪೊಲೀಸರು, ಬೆತ್ತ ಬೀಸಲು ಶುರು ಮಾಡಿದರು. ಆಗ ಗ್ರಾಹಕರು ಮತ್ತು ವ್ಯಾಪಾರಿಗಳು ಲಾಠಿ ಏಟು ತಿನ್ನಬೇಕಾಯಿತು.

ತೋಟದಲ್ಲಿ ಬೆಳೆದ ತರಕಾರಿ ಮತ್ತು ವಿವಿಧ ಹಣ್ಣುಗಳನ್ನು ವಾಹನಗಳಲ್ಲಿ ಮಾರುಕಟ್ಟೆಗೆ ತಂದಿದ್ದ ರೈತರು, ಪೊಲೀಸರ ಸೈರನ್‌ ಶಬ್ದ ಕೇಳಿ ಓಡುತ್ತಿರುವಾಗಲೇ ಟೊಮ್ಯಾಟೋ ಹಣ್ಣುಗಳು ಬೀದಿ ಪಾಲಾದವು.