ಮಂಚನಹಳ್ಳಿಯಲ್ಲಿ ಚಿರತೆ ಸೆರೆ

Team Udayavani, Apr 11, 2020, 4:49 PM IST

ಮಳವಳ್ಳಿ: ತಾಲೂಕಿನ ಮಂಚನಹಳ್ಳಿಯ ತೋಟದ ಮನೆಯಲ್ಲಿ ಗುರುವಾರ ರಾತ್ರಿ ಚಿರತೆ ಕಾಣಿಸಿಕೊಂಡು ಯುವಕರಿಬ್ಬರು ಪ್ರಾಣಾಪಾಯದಿಂದ ಪಾರಾಗಿದ್ದು, ಚಿರತೆಸೆರೆ ಹಿಡಿಯಲಾಗಿದೆ.

ತಾಲೂಕಿನ ಬೆಳಕವಾಡಿಯ ಶ್ರೀನಿವಾಸರ ತೋಟದ ಮನೆಯಲ್ಲಿ ಹಸುಗಳಿಗಾಗಿ ರವೆ ಬೂಸಾವನ್ನು ಮೂರು ದಿನಗಳ ಹಿಂದೆ ತಂದಿಟ್ಟಿದ್ದರು. ಅದು ದಿನದಿನವೂ ಯಾರೋ ಕಳ್ಳತನ ಮಾಡುತ್ತಿದ್ದಾರೆಂಬ ಅನುಮಾನದಿಂದ ಅವರ ಸಂಬಂಧಿಕರಾದ ನವೀನ್‌ ಕುಮಾರ್‌, ಮಧು ಗುರುವಾರ ರಾತ್ರಿ ತೋಟದ ಮನೆಗೆ ಬಂದು ನೋಡಿದಾಗ ರವೆ ಬೂಸಾ ತಿಂದು ಅಲ್ಲೇ ಇದ್ದ ಚಿರತೆ ಘರ್ಜಿಸಿದೆ.

ಯುವಕರ ಮೇಲೆ ದಾಳಿ ಮಾಡಲು ಬಂದಾಗ ಹೆದರಿ ಓಡಿ ತೋಟದ ಮನೆಯ ಬಾಗಿಲು ಹಾಕಿಟ್ಟು ಬೆಳಿಗ್ಗೆ ಅರಣ್ಯ ಇಲಾಖೆಗೆ ವಿಷಯ ತಿಳಿಸಿದ್ದಾರೆ. ಸ್ಥಳಕ್ಕೆ ಬಂದ ಅರಣ್ಯಾಧಿಕಾರಿಗಳು ಕಾರ್ಯಾಚರಣೆಯಲ್ಲಿ ಬೋನಿಟ್ಟು, ಬಲೆ ಹಾಕಿ ಪಟಾಕಿ ಸಿಡಿಸಿ ಚಿರತೆ ಸೆರೆಹಿಡಿದರು. ವಲಯ ಅರಣ್ಯಾಧಿಕಾರಿ ಆಸಿಫ್ ಅಹಮದ್‌ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿ ಕಾವೇರಿ ಅಭಯಾರಣ್ಯ ವಲಯಕ್ಕೆ ಚಿರತೆ ಬಿಡುವುದಾಗಿ ತಿಳಿಸಿದರು.

ಇದೇ ವೇಳೆ ತಾಪಂ ಸದಸ್ಯ ಪುಟ್ಟಸ್ವಾಮಿ, ಉಪ ಅರಣ್ಯಾಧಿಕಾರಿ ರಮೇಶ್‌, ಮನೋಹರ್‌, ನಂದೀಶ್‌ ಹಾಗೂ 20ಕ್ಕೂ ಹೆಚ್ಚು ಅರಣ್ಯ ಸಿಬ್ಬಂದಿ ಮತ್ತು ಪೊಲೀಸ್‌ ಸಿಬ್ಬಂದಿ ಇದ್ದರು.