ಅಕ್ರಮವಾಗಿ ಬೆಸ್ಕಾಂ ಸಾಮಗ್ರಿ ಸಂಗ್ರಹ

Team Udayavani, Apr 11, 2020, 6:03 PM IST

ಕನಕಪುರ: ಬೆಸ್ಕಾಂಗೆ ಸೇರಿದ ಲಕ್ಷಾಂತರ ಮೌಲ್ಯದ ಅಲ್ಯುಮಿಯಂ ವೈರ್‌ ಮತ್ತು ಸಾಮಗ್ರಿ ಕದ್ದು ಮಾರಾಟ ಮಾಡುತ್ತಿದ್ದ ಜಾಲ ಪತ್ತೆ ಹಚ್ಚಿರುವ ಬೆಸ್ಕಾಂ ಅಧಿಕಾರಿಗಳು, ಆದರೆ ಖದೀಮರ ವಿರುದ್ಧ ಪ್ರಕರಣ ದಾಖಲಿಸಲು ಮೀನಮೇಷ ಎಣಿಸುತ್ತಿದ್ದಾರೆ. ಅಜೀಜ್‌ನಗರದ ವಾಸಿ ಮೊಹಮ್ಮದ್‌ ಲಿಯಾಖತ್‌ ರ ಮನೆ ಮಹಡಿ ಮೇಲೆ ಬೆಸ್ಕಾಂನ ಲಕ್ಷಾಂತರ ಮೌಲ್ಯದ ಹೊಸ ಮತ್ತು ಹಳೆ ಅಲ್ಯೂಮಿನಿಯಂ ವಿದ್ಯುತ್‌ ವೈರ್‌ ಗಳನ್ನು ಅಕ್ರಮವಾಗಿ ಸಂಗಹ್ರಿಸಿದ್ದ ಖಚಿತ ಮಾಹಿತಿ ಮೇರೆಗೆ ಬೆಸ್ಕಾಂ ಇಲಾಖೆ ಸಹಾಯಕ ಅಭಿಯಂತರ ಸಂದೀಪ್‌ ಹಾಗೂ ಇಲಾಖೆ ಸಿಬ್ಬಂದಿ ಪರಿಶೀಲಿಸಿದಾಗ, ಅಕ್ರಮವಾಗಿ ಸಾಮಗ್ರಿ ಸಂಗ್ರಹಿಸಿರುವುದು ಖಚಿತ ಗೊಂಡಿದೆ. ಬಳಿಕ ನಗರ ಪೊಲೀಸ್‌ ಠಾಣೆಗೆ ಮಾಹಿತಿ ನೀಡಿದ ಹಿನ್ನೆಲೆಯಲ್ಲಿ ಎಸ್‌.ಐ.ಲಕ್ಷ್ಮಣ್‌ಗೌಡ ಮತ್ತವರ ಸಿಬ್ಬಂದಿ ಭೇಟಿ ನೀಡಿ ಪರಿಶೀಲಿಸಿದರು.

ಆರ್‌.ಆರ್‌.ಸಂಖ್ಯೆ: ಕೆ.ಸಿ.1 ಸೇರಿದ ಮನೆ ಮಾಲಿಕರ ಮೇಲ್ಭಾಗದ ಛಾವಣಿಯಲ್ಲಿ ಬೆಸ್ಕಾಂ ಇಲಾಖೆ ವಿದ್ಯುತ್‌ ಕೇಬಲ್‌, ಮೀಟರ್‌ ಸಾಮಗ್ರಿ, ಅಲ್ಯುಮಿನಿಯಂ ಮತ್ತು ಕಬ್ಬಿಣದ ಸ್ಪೈರಲ್‌ ಕಂಡಕ್ಟರ್‌, ಯುಜಿ ಮತ್ತು ಫ್ಲಾಟ್‌ ಕೇಬಲ್‌, ಗೈ ವೈರ್‌, ಕಟರ್‌ಗಳು ಸೇರಿದಂತೆ ಹಲವು ವಸ್ತು ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಬೆಸ್ಕಾಂ ಇಲಾಖೆ ಅಧಿಕಾರಿಗಳು ಖದೀಮರ ಬಗ್ಗೆ ಪ್ರಕರಣ ದಾಖಲಿಸದೆ ಮಾಹಿತಿಯನಷ್ಟೆ ನೀಡಿದ್ದಾರೆ. ಹೀಗಾಗಿ ಎಸ್‌ಐ ಲಕ್ಷ್ಮಣ್‌ಗೌಡ ಸ್ವಯಂ ದೂರು ದಾಖಲಿಸಿಕೊಂಡು ಖದೀಮರ ವಿರುದ್ಧ ತನಿಖೆ ಕೈಗೊಂಡಿದ್ದಾರೆ.