ಶೂನ್ಯ ಪಾಸಿಟಿವ್‌ಗೆ ಜನರ ಸಹಕಾರ

Team Udayavani, Apr 12, 2020, 5:00 PM IST

ಚಾಮರಾಜನಗರ: ಕೋವಿಡ್-19 ಪಾಸಿಟಿವ್‌ ಪ್ರಕರಣಗಳು ಶೂನ್ಯ ಇರುವ ಕೆಲವೇ ಜಿಲ್ಲೆಗಳಲ್ಲಿ ಚಾಮರಾಜನಗರ ಸಹ ಒಂದು. ಇದಿಷ್ಟೇ ಅಲ್ಲ, ಕ್ವಾರಂಟೈನ್‌ನಲ್ಲಿ ಇರುವವರ ಸಂಖ್ಯೆ 14 ಮಾತ್ರ ಇದೆ. ಇದಕ್ಕೆ ಜಿಲ್ಲಾಡಳಿತ, ಪೊಲೀಸ್‌ ಇಲಾಖೆ, ಆರೋಗ್ಯ ಇಲಾಖೆ ಕೈಗೊಂಡ ಅತೀವ ಮುಂಜಾಗ್ರತಾ ಕ್ರಮಗಳೇ ಇದಕ್ಕೆ ಕಾರಣ. ಜಿಲ್ಲೆಯ ನೆರೆಯ ಕೇರಳ ರಾಜ್ಯದಲ್ಲಿ ದೇಶದ ಮೊದಲ ಕೋವಿಡ್-19 ಪಾಸಿಟಿವ್‌ ಪ್ರಕರಣ ಕಂಡು ಬಂದ ಕೂಡಲೇ ಜಿಲ್ಲಾಡಳಿತ, ಪೊಲೀಸ್‌ ಇಲಾಖೆ, ಆರೋಗ್ಯ ಇಲಾಖೆ ಎಚ್ಚೆತ್ತುಕೊಂಡವು. ಕೇರಳದ ವೈನಾಡು ಜಿಲ್ಲೆಯಿಂದ ಬರುವ ವಾಹನಗಳಲ್ಲಿ ವಿದೇಶಿಯರ ತಪಾಸಣೆ, ಥರ್ಮಲ್‌ ಸ್ಕ್ರೀನಿಂಗ್‌ ನಡೆಸಲಾಯಿತು.

ಕ್ವಾರಂಟೈನ್‌ ಸೆಂಟರ್‌ ಸ್ಥಾಪನೆ: ಬಹಳ ಶೀಘ್ರವಾಗಿ ಜಿಲ್ಲಾ ಕೇಂದ್ರದಲ್ಲಿ ಪ್ರತ್ಯೇಕ ಕ್ವಾರಂಟೈನ್‌ ಸೆಂಟರ್‌ ಸ್ಥಾಪಿಸಲಾಯಿತು. ಅಂಬೇಡ್ಕರ್‌ ಭವನವನ್ನೇ 150 ವಾರ್ಡ್‌ಗಳ  ಕ್ವಾರಂಟೈನ್‌ ಸೆಂಟರ್‌ ಆಗಿ ಪರಿವರ್ತಿಸಿ ಕ್ವಾರಂಟೈನ್‌ ಕೇಂದ್ರದಲ್ಲಿರುವವರಿಗೆಜಿಲ್ಲಾಡಳಿತದಿಂದಲೇ 3 ಹೊತ್ತು ಊಟ, ಮನ ರಂಜನೆಗೆ ಟೀವಿ, ಓದಲು ಪತ್ರಿಕೆ, ಒಳಾಂಗಣ ಆಟದಂತ ಸವಲತ್ತು ನೀಡಲಾಯಿತು.

ಐಸೋಲೇಷನ್‌ ವಾರ್ಡ್‌: ಆರೋಗ್ಯ ಇಲಾಖೆಯಿಂದ ಜಿಲ್ಲಾ ಮತ್ತು ತಾಲೂಕು ಕೇಂದ್ರದಲ್ಲಿ ಐಸೋಲೇಷನ್‌ ವಾರ್ಡ್‌ ಸ್ಥಾಪಿಸಿ ಸನ್ನದ್ಧಗೊಳಿಸಲಾಯಿತು. ಸರ್ಕಾರಿ ಮೆಡಿಕಲ್‌ ಕಾಲೇಜು, ಎಂಜಿನಿಯರಿಂಗ್‌ ಕಾಲೇಜು, ಜೆಎಸ್‌ಎಸ್‌ ಆಸ್ಪತ್ರೆ, ಹೋಲಿಕ್ರಾಸ್‌, ಬಸವರಾಜೇಂದ್ರ ಆಸ್ಪತ್ರೆಗಳನ್ನು ಐಸೋಲೇಷನ್‌ ಸೆಂಟರ್‌ಗಳಾಗಿ ಪರಿವರ್ತಿಸಲಾಯಿತು.

ಚೆಕ್‌ಪೋಸ್ಟ್‌ ಸ್ಥಾಪನೆ: ಪೊಲೀಸ್‌ ಇಲಾಖೆಯಿಂದ ಅಂತಾರಾಜ್ಯ ಸಂಪರ್ಕಿಸುವ 6 ಗಡಿಗಳಲ್ಲಿ ಚೆಕ್‌ಪೋಸ್‌ ಸ್ಥಾಪಿಸಿ ಅಂತಾರಾಜ್ಯ, ಅಂತರ ಜಿಲ್ಲೆ ವಾಹನಗಳನ್ನು ತಪಾಸಣೆ ಮಾಡಲಾಯಿತು. ಸ್ವತಃ ಡೀಸಿ, ಎಸ್ಪಿ ಜಿಲ್ಲಾ ಕೇಂದ್ರದಲ್ಲಿ ಮೈಕ್‌ ಹಿಡಿದು ಸಾಮಾಜಿಕ ಅಂತರ ಕಾಯುವಂತೆ ಮನವಿ ಮಾಡಿ ರಸ್ತೆಯಲ್ಲಿ ಜನ ಸಂಚಾರವಾಗದಂತೆ ನೋಡಿಕೊಳ್ಳುವಲ್ಲಿ ಯಶಸ್ವಿಯಾದರು.

ಅದೃಷ್ಟದ ಬೆಂಬಲ!
ಜಿಲ್ಲೆಗೆ ಹೊಂದಿಕೊಂಡಿರುವ ಮೈಸೂರು ಜಿಲ್ಲೆ ನಂಜನಗೂಡು, ಮಂಡ್ಯ ಜಿಲ್ಲೆಯ ಮಳವಳ್ಳಿ ಇದೆ. ನಂಜನಗೂಡಿನ ಜುಬಿಲಿಯಂಟ್‌ ಕಾರ್ಖಾನೆಯಲ್ಲಿ ಜಿಲ್ಲೆಯ 56 ಮಂದಿ ಕೆಲಸ ಮಾಡುತ್ತಿದ್ದು, ಅವರ್ಯಾರಿಗೂ ಕೋವಿಡ್-19 ಪಾಸಿಟಿವ್‌ ಆಗಲಿಲ್ಲ. ನಿಜಾಮುದ್ದೀನ್‌ಗೆ ಜಿಲ್ಲೆಯ 90 ಜನರು ಹೋಗಿದ್ದರು. ಇವರಲ್ಲಿ ಓರ್ವ ಮಾತ್ರ ಮಾರ್ಚ್‌ನಲ್ಲಿ ಹೋಗಿದ್ದು, ಇನ್ನುಳಿದವರು ಜನವರಿ, ಫೆಬ್ರವರಿಯಲ್ಲಿ ಹೋಗಿ ಬಂದವರು! ಹೀಗಾಗಿ ಅದೃಷ್ಟದ ಬಲವೂ ಜಿಲ್ಲೆಗಿದೆ!

ಜನರ ಸಹಕಾರ ಮುಖ್ಯ
ಇದೊಂದು ದೊಡ್ಡ ವಿಪತ್ತು. ಇದನ್ನು ಎದುರಿಸಲು ಸಮುದಾಯವನ್ನು ಮಾನಸಿಕವಾಗಿ ಸಿದ್ಧಪಡಿಸಬೇಕು. ಅವರಲ್ಲಿ ಆತ್ಮವಿಶ್ವಾಸ ತುಂಬಬೇಕು. ಆಗ ಜನರು
ನಮಗೆ ಸ್ಪಂದಿಸುತ್ತಾರೆ. ನಮ್ಮ ಜನ ಮಾನಸಿಕವಾಗಿ ಸಿದ್ಧರಾದರು. ಆಡಳಿತದ ಎಲ್ಲ ಕ್ರಮಗಳನ್ನು ಅನುಮೋದಿಸುತ್ತಾ ಬಂದರು ಎಂದು ಜಿಲ್ಲಾಧಿಕಾರಿ ಡಾ. ಎಂ.
ರವಿ ಉದಯವಾಣಿಗೆ ತಿಳಿಸಿದರು. ಸೂಕ ಸಮಯದಲ್ಲಿ, ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಅವರು ಹೇಳಿದರು.

ಚೆಕ್‌ಪೋಸ್ಟ್‌ನಲ್ಲಿ ತೀವ್ರ ನಿಗಾ
ಇರಿಸಿದೆವು. ರಸ್ತೆಗಳಲ್ಲಿ ಸುಮ್ಮನೆ ಓಡಾಡುವವರ ವಿರುದ್ಧ ಕ್ರಮಗಳನ್ನು ಕೈಗೊಳ್ಳಲಾಯಿತು. 535 ದ್ವಿಚಕ್ರ ವಾಹನಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಅಂತಾರಾಜ್ಯ ಗಡಿ ಬಂದ್‌ ಆಗಿದೆ. ಜೀವನಾವಶ್ಯಕ ಸಾಮಗ್ರಿಗಳ ವಾಹನ ಓಡಾಟಕ್ಕೆ ಅವಕಾಶ ಮಾಡಿಕೊಟ್ಟಿದ್ದೇವೆ.
● ಆನಂದಕುಮಾರ್‌, ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ

● ಕೆ.ಎಸ್‌. ಬನಶಂಕರ ಆರಾಧ್ಯ