ಯೋಗ್ಯ ರಾಗಿ ಭೋಗ್ಯ ರಾಗಿ

Team Udayavani, Apr 15, 2020, 11:32 AM IST

ಭೋಗ್ಯ ರಾಗಿ , ರಾಗಿ ತಿಂದವನಿಗೆ ರೋಗವಿಲ್ಲ ಎಂಬ ಮಾತಿದೆ. ಆರೋಗ್ಯದ ಬಗ್ಗೆ ಹೆಚ್ಚು ಕಾಳಜಿ ವಹಿಸಬೇಕಾದ ಮತ್ತು ಮನೆಯ ಅಡುಗೆಯಿಂದಲೇ ಬಾಯಿ ರುಚಿ ತಣಿಸಿಕೊಳ್ಳಬೇಕಾದ ಈ ಸಮಯದಲ್ಲಿ, ರಾಗಿ ಬಳಸಿ ಮಾಡಬಹುದಾದ ಎರಡು ರೆಸಿಪಿ ಇಲ್ಲಿದೆ.

ಉತ್ತಪ್ಪ
ಬೇಕಾಗುವ ಸಾಮಗ್ರಿ:
ರಾಗಿ ಹಿಟ್ಟು- 1 ಕಪ್‌, ಅಕ್ಕಿ ಹಿಟ್ಟು- 1 ಚಮಚ, ರವೆ- 1 ಚಮಚ, ಮೊಸರು- 2 ಕಪ್‌, ಈರುಳ್ಳಿ- 7, ಉಪ್ಪು ರುಚಿಗೆ, ಎಣ್ಣೆ ಸ್ವಲ್ಪ.

ಮಾಡುವ ವಿಧಾನ: ರಾಗಿ, ಅಕ್ಕಿ ಹಿಟ್ಟು ಮತ್ತು ರವೆಯನ್ನು ಮೊಸರು, ನೀರು ಬೆರೆಸಿ ದೋಸೆ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ. ಈರುಳ್ಳಿಯನ್ನು ಸಣ್ಣದಾಗಿ ಹೆಚ್ಚಿ, ಸ್ವಲ್ಪ ಎಣ್ಣೆ ಹಾಕಿ ಫ್ರೈ ಮಾಡಿ. ನಂತರ, ಕಾವಲಿಗೆ ಎಣ್ಣೆ ಹಚ್ಚಿ, ರಾಗಿ ಹಿಟ್ಟು ಹೊಯ್ದು, ಫ್ರೈ ಮಾಡಿದ ಈರುಳ್ಳಿ ಹಾಕಿ ಒತ್ತಿ (ಹಸಿಮೆಣಸಿನಕಾಯಿ, ಕೊತ್ತಂಬರಿ ಸೊಪ್ಪು, ಕರಿಬೇವಿನ ಸೊಪ್ಪು, ಕ್ಯಾಪ್ಸಿಕಂ, ಶುಂಠಿ ಕೂಡ ಹಾಕಬಹುದು) ದೋಸೆ ತೆಗೆಯಿರಿ. (ಹಸಿ ಈರುಳ್ಳಿಯನ್ನು ರಾಗಿ ಹಿಟ್ಟಿನೊಂದಿಗೆ ಬೆರೆಸಬಹುದು)

ಹಲ್ವ
ಬೇಕಾಗುವ ಸಾಮಗ್ರಿ:
ರಾಗಿ- ಒಂದು ಕಪ್‌, ಹಾಲು- 1 ಕಪ್‌, ಸಕ್ಕರೆ/ ಬೆಲ್ಲ- 1 ಕಪ್‌, ತುಪ್ಪ- 4 ಚಮಚ, ಗಸಗಸೆ, ಕೊಬ್ಬರಿ, ಗೋಡಂಬಿ, ಬಾದಾಮಿ, ಏಲಕ್ಕಿ ಪುಡಿ- ಸ್ವಲ್ಪ.

ಮಾಡುವ ವಿಧಾನ:
ಹಿಂದಿನ ದಿನ ರಾತ್ರಿಯೇ ರಾಗಿಯನ್ನು ಚೆನ್ನಾಗಿ ತೊಳೆದು, ನೀರಿನಲ್ಲಿ ನೆನೆಸಿ ಇಡಿ. ಮರುದಿನ ಬೆಳಗ್ಗೆ ನೀರು ಮತ್ತು ಗಸಗಸೆ ಹಾಕಿ ನುಣ್ಣಗೆ ರುಬ್ಬಿ, ಬರುವ ಹಾಲನ್ನು ಸೋಸಿಕೊಳ್ಳಿ. ಆ ಹಾಲಿಗೆ ಬೆಲ್ಲ/ ಸಕ್ಕರೆ, ಹಸಿ ಹಾಲು ಬೆರೆಸಿ, ದಪ್ಪ ತಳದ ಪಾತ್ರೆಗೆ ಹಾಕಿ ಕುದಿಯಲು ಇಡಿ. ಮಿಶ್ರಣ ತಳ ಹಿಡಿಯದಂತೆ, ಚೆನ್ನಾಗಿ ಕೈ ಆಡಿಸುತ್ತಿರಿ. ಕ್ರಮೇಣ ಮಿಶ್ರಣವು ಗಟ್ಟಿಯಾಗುತ್ತಾ ಬರುತ್ತದೆ. ಆಗ ತುಪ್ಪ ಮತ್ತು ಏಲಕ್ಕಿ ಪುಡಿ ಹಾಕಿ, ಐದು ನಿಮಿಷ ಮಗುಚಿ. ಮಿಶ್ರಣವು ಹಲ್ವದ ಹದಕ್ಕೆ ಬಂದ ತಕ್ಷಣ, ತುಪ್ಪ ಸವರಿದ ತಟ್ಟೆಗೆ ವರ್ಗಾಯಿಸಿ. ಅಲಂಕಾರ ಮತ್ತು ರುಚಿ ಹೆಚ್ಚಿಸಲು ಮೇಲೆ ಗೋಡಂಬಿ, ಕೊಬ್ಬರಿ, ಬಾದಾಮಿ ತುಣುಕು ಹಾಕಿ, ತಣ್ಣಗಾದ ಮೇಲೆ ಕತ್ತರಿಸಿ.