ಜನರ ಆರೋಗ್ಯ ಮಾಹಿತಿ ಕಲೆ

Team Udayavani, Apr 16, 2020, 4:13 PM IST

ಚಿಕ್ಕೋಡಿ: ದಿನದಿಂದ ದಿನಕ್ಕೆ ಬೆಳಗಾವಿ ಜಿಲ್ಲೆಯಲ್ಲಿ ಕೋವಿಡ್ 19 ಸೋಂಕಿತರ ಸಂಖ್ಯೆ ಹೆಚ್ಚಳವಾಗುತ್ತಿದೆ. ಇದನ್ನು ತಡೆಯಲು ಕೊರೊನಾ ನಿಯಂತ್ರಿಸುವ ಹೋರಾಟದ ಸೈನಿಕರಾದ ಆಶಾ ಕಾರ್ಯಕರ್ತರು, ಅಂಗನವಾಡಿ ಕಾರ್ಯಕರ್ತರು ಆರೋಗ್ಯಸಹಾಯಕರ ಜೊತೆಗೂಡಿ ಜನರ ಆರೋಗ್ಯದ ಸ್ಥಿತಿಗತಿ ಬಗ್ಗೆ ಪ್ರತಿದಿನ ಮಾಹಿತಿ ಕಲೆ ಹಾಕುತ್ತಿದ್ದಾರೆ.

ಚಿಕ್ಕೋಡಿ ಶೈಕ್ಷಣಿಕ ಜಿಲ್ಲೆಯ ವ್ಯಾಪ್ತಿಯ ಅಥಣಿ, ಕಾಗವಾಡ, ಚಿಕ್ಕೋಡಿ, ನಿಪ್ಪಾಣಿ, ಹುಕ್ಕೇರಿ, ರಾಯಬಾಗ, ಗೋಕಾಕ ಮತ್ತು ಮೂಡಲಗಿ ತಾಲೂಕುಗಳನ್ನು ಒಳಗೊಂಡ 8 ತಾಲೂಕುಗಳಲ್ಲಿ ಸುಮಾರು 2,800 ಜನ ಆಶಾ ಕಾರ್ಯಕರ್ತರು, 3000 ಜನ ಅಂಗನವಾಡಿಕಾರ್ಯಕರ್ತರು ಹಾಗೂ 1200 ಜನ ವೈದ್ಯರು, ಆರೋಗ್ಯ ಸಹಾಯಕರು ಕೋವಿಡ್‌-19 ವಿರುದ್ಧ ಹೋರಾಡುತ್ತಿದ್ದಾರೆ. ಅದರಲ್ಲಿ ರಾಯಬಾಗ ತಾಲೂಕಿನ ಕುಡಚಿ ಪಟ್ಟಣದಲ್ಲಿ ಕೋವಿಡ್ 19ಸೋಂಕಿತರ ಸಂಖ್ಯೆ ಹೆಚ್ಚಳವಾಗಿರುವ ಪರಿಣಾಮಈಗಾಗಲೇ ಜಿಲ್ಲಾಡಳಿತ ಕಂಟೈನ್ಮೆಂಟ್‌ ಪ್ರದೇಶ ಎಂದು ಘೋಷಣೆ ಮಾಡಿದೆ.

ಮನೆಯಲ್ಲಿ ಎಷ್ಟು ಜನ ಇದ್ದಾರೆ?, ಹೊರ ದೇಶಗಳಿಂದ, ಹೊರ ರಾಜ್ಯಗಳಿಂದ ಅಥವಾ ಹೊರ ಜಿಲ್ಲೆಗಳಿಂದ ಯಾರಾದರೂ ಬಂದಿದ್ದಾರೆಯೇ ಎನ್ನುವ ಮಾಹಿತಿಯನ್ನು ತಂಡಗಳು ಸಂಗ್ರಹಿಸುತ್ತಿವೆ. ಕೋವಿಡ್‌-19 ರೋಗದ ಲಕ್ಷಣಗಳು ಯಾರಲ್ಲಯಾದರೂ ಕಂಡುಬಂದರೆ ತಮ್ಮ ಮೇಲಧಿಕಾರಿಗಳಿಗೆತಿಳಿಸುತ್ತಾರೆ. ನಂತರ ವೈದ್ಯಕೀಯ ತಂಡವು ಗಂಟಲು ದ್ರವದ ಮಾದರಿ ಸಂಗ್ರಹಿಸಿ, ಪ್ರಯೋಗಾಲಯಕ್ಕೆ ಕಳುಹಿಸಿ ಕೊಡುತ್ತದೆ. ಸೋಂಕು ಖಚಿತವಾದರೆ, ಅಂಥವರನ್ನು ಜಿಲ್ಲಾಸ್ಪತ್ರೆಯ ಪ್ರತ್ಯೇಕ ವಾರ್ಡ್‌ಗಳಲ್ಲಿ ಇಟ್ಟು ಚಿಕಿತ್ಸೆ ನೀಡಲಾಗುತ್ತದೆ.

ರಕ್ಷಣೆಗೆ ಸುರಕ್ಷತೆ ಕ್ರಮ ಅಳವಡಿಕೆ: ಮನೆ-ಮನೆಗೆ ಹೋಗಿ ಮಾಹಿತಿ ಕಲೆ ಹಾಕುವ ಸಮೀಕ್ಷಾ ತಂಡಕ್ಕೆ ಈಗಾಗಲೇ ಸರ್ಕಾರ ಮಾಸ್ಕ್, ಸ್ವಾನಿಸ್ಯಾಟರ್‌, ಗ್ಲೌಜ್‌ ನೀಡಿದೆ. ಸಮೀಕ್ಷೆಗೆ ಹೋದಾಗ ಸಾಮಾಜಿಕ ಅಂತರ ಕಾಪಾಡಿಕೊಂಡು ಅವರ ಮಾಹಿತಿ ಕಲೆ ಹಾಕಲಾಗುತ್ತಿದೆ. ಗ್ರಾಮದಲ್ಲಿ ಗುಂಪು ಗುಂಪಾಗಿ ಕುಳಿತುಕೊಂಡವರಿಗೆ ತಿಳಿವಳಿಕೆ ಹೇಳಿ ಮನೆಗೆ ಕಳಿಸಲಾಗುತ್ತಿದೆ ಎನ್ನುತ್ತಾರೆ ಸಮೀಕ್ಷೆ ತಂಡದಲ್ಲಿಇರುವ ಆರೋಗ್ಯ ಸಹಾಯಕರು.

ಮಾಹಿತಿ ನೀಡಲು ನಿರಾಕರಣೆ: ಕೆಲ ಜನರು ಮಾಹಿತಿ ನೀಡಲು ಅಸಹಕಾರ ಕೊಡುತ್ತಿದ್ದಾರೆ. ಮಾಹಿತಿ ಸಂಗ್ರಹಿಸಲು ಮನೆಗೆ ಹೋದಾಗ ಕೆಲವರು ಸರಿಯಾಗಿ ಮಾಹಿತಿ ನೀಡುವುದಿಲ್ಲ, ಕೆಲವರು ಮಾಹಿತಿಯನ್ನೇ ನೀಡಲು ನಿರಾಕರಿಸುತ್ತಾರೆ. ಇನ್ನು ಕೆಲವರು, ಮನೆಯ ಬಾಗಿಲು ಹಾಕಿ ಅವಮಾನಿಸುತ್ತಾರೆ. ಆದರೂ ನಾವು ಒತ್ತಡ ಹಾಕಿ ಮಾಹಿತಿ ಕಲೆ ಹಾಕುತ್ತೇವೆ. ಕೆಲವರು ನಮ್ಮ ಮೇಲೆ ದಬ್ಟಾಳಿಕೆ ನಡೆಸಿದರೇ ಅಂಥವರ ವಿರುದ್ಧ ಮೇಲಧಿಕಾರಿಗಳಿಗೆ ದೂರು ನೀಡುತ್ತೇವೆ ಎನ್ನುತ್ತಾರೆ ಆಶಾ ಕಾರ್ಯಕರ್ತರು.