ಕೋವಿಡ್ 19 ಭೀತಿ ನಡುವೆಯೇ ಆಸ್ಪತ್ರೆ ಒಳಗೆ ದಿಢೀರ್ ನುಗ್ಗಿದ ಚಿರತೆ, ಸಿಬ್ಬಂದಿಗಳಿಗೆ ಆತಂಕ!

Team Udayavani, Apr 16, 2020, 8:01 PM IST

Representative Image

ಗಾಂಧಿನಗರ್(ಗುಜರಾತ್): ದೇಶಾದ್ಯಂತ ಮಾರಣಾಂತಿಕ ಕೋವಿಡ್ 19 ವೈರಸ್ ಭೀತಿ ಒಂದೆಡೆಯಾದರೆ ಮತ್ತೊಂದೆಡೆ ಹಾಡಹಗಲೇ ಚಿರತೆಯೊಂದು ಆಸ್ಪತ್ರೆಯ ಆವರಣದೊಳಗೆ ಪ್ರವೇಶಿಸುವ ಮೂಲಕ ಎಲ್ಲರಲ್ಲಿಯೂ ಭೀತಿ ಹುಟ್ಟಿಸಿದ ಘಟನೆ ಗುಜರಾತ್ ನ ಗಾಂಧಿನಗರದ ಕೋಲಾವಾಡ ಪ್ರದೇಶದ ಆಯುರ್ವೇದ ಆಸ್ಪತ್ರೆಯಲ್ಲಿ ನಡೆದಿದೆ ಎಂದು ವರದಿ ತಿಳಿಸಿದೆ.

ಬುಧವಾರ ರಾತ್ರಿ ಆಸ್ಪತ್ರೆಯ ವಾಶ್ ರೂಂನ ಒಳಗೆ ಚಿರತೆ ಪ್ರವೇಶಿಸಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ. ಕೂಡಲೇ ಆಸ್ಪತ್ರೆಯ ಸಿಬ್ಬಂದಿಗಳು ಚಿರತೆ ಒಳಹೋದ ಕೂಡಲೇ ಹೊರಗಿನಿಂದ ಲಾಕ್ ಹಾಕಿ ಅರಣ್ಯ ಇಲಾಖೆ ಅಧಿಕಾರಿಗಳಿಗೆ ಮಾಹಿತಿ ನೀಡಿರುವುದಾಗಿ ವರದಿ ವಿವರಿಸಿದೆ.

ನಂತರ ಅರಣ್ಯ ಇಲಾಖೆ ಹಾಗೂ ಆಸ್ಪತ್ರೆಯ ಸಿಬ್ಬಂದಿಗಳ ಜಂಟಿ ಕಾರ್ಯಾಚರಣೆ ಮೂಲಕ ಚಿರತೆಯನ್ನು ಸೆರೆ ಹಿಡಿದು ಕಾಡಿಗೆ ಒಯ್ಯಲಾಯಿತು ಎಂದು ಅರಣ್ಯಾಧಿಕಾರಿಗಳು ತಿಳಿಸಿದ್ದಾರೆ.

ಕೋವಿಡ್, ಲಾಕ್ ಡೌನ್ ನಡುವೆಯೇ ದಿಢೀರ್ ಆಗಿ ಆಸ್ಪತ್ರೆಯೊಳಗೆ ಚಿರತೆ ನುಗ್ಗಿರುವ ಸುದ್ದಿ ಕೇಳಿ ಆಸ್ಪತ್ರೆಯಲ್ಲಿದ್ದ ಸಿಬ್ಬಂದಿಗಳು, ರೋಗಿಗಳು ಭಯಕ್ಕೊಳಗಾಗಿದ್ದು, ಚಿರತೆ ಸೆರೆಹಿಡಿದ ನಂತರ ಎಲ್ಲರೂ ನಿಟ್ಟುಸಿರು ಬಿಟ್ಟಿರುವುದಾಗಿ ವರದಿ ತಿಳಿಸಿದೆ.