ಕೋವಿಡ್ 19 ಲಾಕ್‌ಡೌನ್‌ ಹಿನ್ನೆಲೆ; ಜಿಲ್ಲೆಯಲ್ಲಿ ಅಪರಾಧ ಪ್ರಕರಣ ಇಳಿಮುಖ

Team Udayavani, Apr 17, 2020, 5:09 AM IST

ಸಾಂದರ್ಭಿಕ ಚಿತ್ರ

ಉಡುಪಿ: ಕೋವಿಡ್ 19  ಹಿನ್ನೆಲೆಯಲ್ಲಿ ಲಾಕ್‌ಡೌನ್‌ ಆದ ಸಂದರ್ಭ ದಲ್ಲಿ ಉಡುಪಿ ಜಿಲ್ಲೆಯಲ್ಲಿ ಅಪರಾಧ ಪ್ರಕರಣಗಳ ಸಂಖ್ಯೆ ಕಡಿಮೆಯಾಗಿದೆ ಎಂಬುದು ಗಮನಾರ್ಹ ಸಂಗತಿ.

ಉಡುಪಿ ಜಿಲ್ಲೆಯಲ್ಲಿ ಸಂಚಾರ ಪೊಲೀಸ್‌ ಠಾಣೆ, ಮಹಿಳಾ ಪೊಲೀಸ್‌ ಠಾಣೆ, ಸೆನ್‌ ಅಪರಾಧ ಪೊಲೀಸ್‌ ಠಾಣೆ ಗಳು ಸೇರಿ ಒಟ್ಟು 34 ಠಾಣೆಗಳಿವೆ. ವಿವಿಧ ಪೊಲೀಸ್‌ ಠಾಣೆಗಳಲ್ಲಿ ದಿನವೊಂದಕ್ಕೆ ಕನಿಷ್ಠ ಎಂದರೂ ಸರಾಸರಿ 7 8 ಪ್ರಕರಣ ಗಳು ದಾಖಲಾಗುತ್ತಿದ್ದವು. ಸೆನ್‌ ಹಾಗೂ ಟ್ರಾಫಿಕ್‌ ಪೊಲೀಸ್‌ ಠಾಣೆಗಳಲ್ಲಿ ಹೆಚ್ಚು ಪ್ರಕರಣಗಳು ದಾಖಲಾಗುತ್ತಿದ್ದವು. ಆದರೆ ಲಾಕ್‌ಡೌನ್‌ ಆದ ಅನಂತರ ಅಪರಾಧಗಳ ಸಂಖ್ಯೆ ಶೇ.90ರಷ್ಟು ಇಳಿಮುಖವಾಗಿದೆ. ಲಾಕ್‌ಡೌನ್‌ ನಡುವೆ 1 ವಾರ ಕಾಲ ಯಾವುದೇ ಪ್ರಕರಣ ದಾಖಲಾಗದ ಉದಾಹರಣೆಯೂ ಇದೆ.
ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ಅವಶ್ಯ ವಾಹನ ಹೊರತುಪಡಿಸಿ ಖಾಸಗಿ ವಾಹನ ರಸ್ತೆಗೆ ಇಳಿಯದಂತೆ ಸರಕಾರ ಆದೇಶಿಸಿದೆ. ಈ ಕಾರಣದಿಂದ ಶೇ.90ರಷ್ಟು ಮಂದಿಯ ವಾಹನ ರಸ್ತೆಗೆ ಇಳಿದಿಲ್ಲ. ಇನ್ನು ಅವಶ್ಯ ಸಾಮಗ್ರಿ ತರಲು ಹೆಚ್ಚು ದೂರ ಹೋಗದೆ ತತ್‌ಕ್ಷಣ ಮನೆಗೆ ಬರುತ್ತಿದ್ದಾರೆ. ಆದ್ದರಿಂದ ರಸ್ತೆಗಳು ಖಾಲಿ ಖಾಲಿಯಾಗಿದ್ದು, ಅಪಘಾತ ಪ್ರಮಾಣ ಇಳಿಮುಖವಾಗಿದೆ.

ಮದ್ಯ ಮಾರಾಟ ಸ್ಥಗಿತವಾದ ಹಿನ್ನೆಲೆ ಯಲ್ಲಿ ಗ್ರಾಮಾಂತರ ಭಾಗದಲ್ಲಿ ಅಕ್ರಮ ಕಳ್ಳಭಟ್ಟಿ ತಯಾರಿಸುವ ಚಟುವಟಿಕೆ ನಡೆಯುತ್ತಿದೆ. ಇದರ ಜತೆಗೆ ಮದ್ಯ ಸಂಗ್ರಹಿ ಸಿಟ್ಟು, ಅಕ್ರಮವಾಗಿ ದುಪ್ಪಟ್ಟು ದರದಲ್ಲಿ ಮಾರಾಟ ಮಾಡುವ ಪ್ರಕರಣಗಳು ಹಲವು ಕಡೆಗಳಲ್ಲಿ ವರದಿಯಾಗಿವೆ.

ಸಾರ್ವಜನಿಕರಿಗೆ ಅರಿವು
ಲಾಕ್‌ಡೌನ್‌ ಸಂದರ್ಭದಲ್ಲಿ ಅಪರಾಧ ಚಟುವಟಿಕೆಗಳ ಸಂಖ್ಯೆ ಇಳಿಮುಖವಾಗಿದೆ. ಪೊಲೀಸರು ಸಾರ್ವಜನಿಕರಿಗೆ ಅರಿವು ಮೂಡಿಸುವ ಕೆಲಸ ಮಾಡುತ್ತಿದ್ದಾರೆ. ಸಾರ್ವಜನಿಕರು ಕಾನೂನು ಕೈಗೆತ್ತಿಕೊಳ್ಳದಂತೆ ನೋಡಿ ಕೊಳ್ಳಲಾಗುತ್ತಿದೆ.
 ಕುಮಾರಚಂದ್ರ,
ಹೆಚ್ಚುವರಿ ಪೊಲೀಸ್‌ ಅಧೀಕ್ಷಕರು, ಉಡುಪಿ ಜಿಲ್ಲೆ