ಮುಂಬೈ: ಮಣಿಪುರಿ ಮಹಿಳೆ ಮೈಮೇಲೆ ಎಂಜಲು ಉಗುಳಿದ ಯುವಕನ ಬಂಧನ

Team Udayavani, Apr 17, 2020, 12:02 PM IST

Representative Image

ಮುಂಬೈ: ಸುಮಾರು ಹತ್ತು ದಿನಗಳ ಹಿಂದೆ ಮಣಿಪುರ್ ಮಹಿಳೆಯೊಬ್ಬರ ಮೇಲೆ ಉಗುಳಿದ ಆರೋಪದ ಹಿನ್ನೆಲೆಯಲ್ಲಿ 29 ವರ್ಷದ ಯುವಕನನ್ನು ಮುಂಬೈ ಸಬ್ ಅರ್ಬನ್ ವಾಕೋಲಾ ಪೊಲೀಸರು ಬಂಧಿಸಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.

ಬಂಧಿತನನ್ನು ಕುರ್ಲಾ ನಿವಾಸಿ ಅಮೀರ್ ಖಾನ್ ಎಂದು ಗುರುತಿಸಲಾಗಿದೆ. ಏಪ್ರಿಲ್ 6ರಂದು ಕೋವಿಡ್ ಲಾಕ್ ಡೌನ್ ನಿಟ್ಟಿನಲ್ಲಿ ದಿನಸಿ ಸಾಮಾನು ಹಾಗೂ ತುರ್ತು ಅಗತ್ಯದ ವಸ್ತುಗಳನ್ನು ಸಾಂತಾಕ್ರೂಝ್ ನಲ್ಲಿನ ಕಾಲಿನಾ ಮಿಲಿಟರಿ ಕ್ಯಾಂಪ್ ನಲ್ಲಿ ವಿತರಿಸಲಾಗುತ್ತಿತ್ತು. ಈ ವೇಳೆ 30ವರ್ಷದ ಮಹಿಳೆ ಗೀತಾ ವಿಹಾರ್ ಜಂಕ್ಷನ್ ನಲ್ಲಿ ನಡೆದುಕೊಂಡು ಹೋಗುತ್ತಿದ್ದಳು ಎಂದು ವರದಿ ವಿವರಿಸಿದೆ.

ಈ ವೇಳೆ ಬೈಕ್ ನಲ್ಲಿ ಬಂದ ವ್ಯಕ್ತಿ ದಿಢೀರನೆ ಬೈಕ್ ಸ್ಲೋ ಮಾಡಿ ಮೈಮೇಲೆ ಉಗುಳಿರುವುದಾಗಿ ಮಹಿಳೆ ಆರೋಪಿಸಿದ್ದಾಳೆ. ಸಿಸಿಟಿವಿ ಫೂಟೇಜ್ ಸಹಾಯದೊಂದಿಗೆ ಆರೋಪಿಯನ್ನು ಪೊಲೀಸರು ಗುರುತಿಸಿದ್ದರು. ಖಾನ್ ಸೇಲ್ಸ್ ಮ್ಯಾನ್ ಆಗಿದ್ದು ಆತನನ್ನು ಬಂಧಿಸಲಾಗಿದೆ ಎಂದು ಪೊಲೀಸ್ ಕಮಿಷನರ್ ಮಂಜುನಾಥ್ ಸಿಂಘೆ ತಿಳಿಸಿದ್ದಾರೆ.