ತಮಿಳುನಾಡು ಸಮೀಪದ ಹಳ್ಳಿಗಳಲ್ಲಿ ನಿಗಾ

Team Udayavani, Apr 20, 2020, 12:54 PM IST

ಬೆಂಗಳೂರು: ಕೋವಿಡ್ ಹಿಮ್ಮೆಟ್ಟಿಸುವ ನಿಟ್ಟಿನಲ್ಲಿ ಬೆಂಗಳೂರು ನಗರ ಜಿಪಂ ವ್ಯಾಪ್ತಿಯಲ್ಲಿ ಮನೆ ಮನೆ ಸಮೀಕ್ಷೆ ಆರಂಭವಾಗಿದೆ. ಬೆಂಗಳೂರು ನಗರ ಜಿಪಂ ವ್ಯಾಪ್ತಿಯಲ್ಲಿ
ಸುಮಾರು 96 ಗ್ರಾಪಂಗಳಿವೆ. ಕೆಲ ಹಳ್ಳಿಗಳು ನೆರೆ ತಮಿಳುನಾಡಿಗೆ ಹತ್ತಿರದಲ್ಲಿದ್ದು ಆ ಪ್ರದೇಶದಿಂದ ಕರ್ನಾಟಕದ ಭಾಗದ ಹಳ್ಳಿಗಳಿಗೆ ಬಾರದ ನಿಟ್ಟಿನಲ್ಲಿ ಎಚ್ಚರಿಕೆ ವಹಿಸಲಾಗಿದ್ದು, ಈ ಬಗ್ಗೆ ಆಯಾ ಹಳ್ಳಿಗಳಲ್ಲಿ ಹೊರಗಿನಿಂದ ಬಂದ ವರ ಬಗ್ಗೆ ಮಾಹಿತಿ ಕಲೆ ಹಾಕಲಾಗುತ್ತದೆ. ಈ ಎಲ್ಲಾ ಗ್ರಾಪಂಗಳಲ್ಲೂ ಸಮುದಾಯಕ್ಕೆ ಕೋವಿಡ್ ಹರಡದ ರೀತಿಯಲ್ಲಿ ಸರ್ಕಾರ ಹಲವು ಕ್ರಮ ರೂಪಿಸಿದ್ದು ಇದರಲ್ಲಿ ಗ್ರಾಮ ಮಟ್ಟದ ಸಮುದಾಯ ಸರ್ವೇಕ್ಷಣೆಯೂ ಒಂದಾಗಿದೆ. ಸೋಂಕಿತರ ಸಂಖ್ಯೆ ನಗರ ಪ್ರದೇಶದಲ್ಲಿ ಅಧಿಕ. ಇದು ಗ್ರಾಮಾಂತರ ಪ್ರದೇಶ ದವರೆಗೂ ಹೋಗಬಾರದೆಂಬ ನಿಟ್ಟಿನಲ್ಲಿ ಸರ್ಕಾರ ಈ ಕಾರ್ಯಕ್ಕೆ ಮುಂದಾಗಿದೆ. ಬೆಂ.ನಗರ ಜಿಪಂ ವ್ಯಾಪ್ತಿಯ ಎಲ್ಲಾ ಗ್ರಾಪಂ ಮಟ್ಟದ ಹಳ್ಳಿಗಳಲ್ಲಿ ಮನೆ-ಮನೆ ಸಮೀಕ್ಷೆ ನಡೆದಿದೆ. ಈ ಸಂಬಂಧ ಗ್ರಾಮ ಮಟ್ಟದಲ್ಲಿ ತಂಡ ರಚನೆ ಮಾಡಲಾಗಿದೆ. ಪ್ರತಿ ಹಳ್ಳಿಯ ಮನೆಗೆ ಭೇಟಿ ನೀಡಲಿರುವ ತಂಡ ಮನೆಯ ಎಲ್ಲಾ ಸದಸ್ಯರ ಜ್ವರ ಸಮೀಕ್ಷೆ ನಡೆಸಲಿದೆ.

ಪ್ರತಿ ದಿನ ಸಂಜೆ 3ಕ್ಕೆ ವರದಿ: ಸಮೀಕ್ಷೆ ವೇಳೆ ಜ್ವರ, ಕೆಮ್ಮು ಸೇರಿ ಮತ್ತಿತರ ಲಕ್ಷಣ ಕಂಡು  ಬಂದರೆ ಸ್ಥಳೀಯ ಜ್ವರ ತಪಾಸಣಾ ಸ್ಥಳಕ್ಕೆ ಕಳುಹಿಸಲಿದೆ. ಹಾಗಾಗಿ ಈ ತಂಡ ಪ್ರತಿ ದಿನ
ಸಂಜೆ 3 ಗಂಟೆಯೊಳಗೆ ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ಮಾಹಿತಿ ನೀಡಲಿದೆ ಎಂದು ಬೆಂಗಳೂರು ನಗರ ಜಿಪಂನ ಹಿರಿಯ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಸಮಿತಿಯಲ್ಲಿ ಯಾರಿರುತ್ತಾರೆ?
ಗ್ರಾಮಮಟ್ಟದ ತಂಡದಲ್ಲಿ ಗ್ರಾಮ ಮಟ್ಟದ ಆಶಾ- ಅಂಗನವಾಡಿ ಕಾರ್ಯಕರ್ತೆ, ಶಿಕ್ಷಕರು ಸದಸ್ಯರಾಗಿರುತ್ತಾರೆ. ಕಿರಿಯ ಆರೋಗ್ಯ ಸಹಾಯಕರು ತಂಡದ ಮೇಲುಸ್ತುವಾರಿ ಆಗಿದ್ದಾರೆ. ಹಾಗೆಯೇ ಸ್ಥಳೀಯ ಪ್ರಾಥಮಿಕ ಆರೋಗ್ಯ ಕೇಂದ್ರದ ಅಧಿಕಾರಿ ಈ ತಂಡ ರಚನೆ ಮಾಡಲಿದ್ದಾರೆ. ಆಗತ್ಯ ಬಿದ್ದಲ್ಲಿ ಆರೋಗ್ಯಾಧಿಕಾರಿ ತಂಡದ ಸದಸ್ಯರಿಗೆ ತರಬೇತಿ ನೀಡಬಹುದಾಗಿದೆ.

ಕೊರೊನಾ ಪತ್ತೆ ಹಚ್ಚುವ ನಿಟ್ಟಿನಲ್ಲಿ ಮನೆ ಮನೆ ಸಮೀಕ್ಷೆ ನಡೆದಿದೆ. ಆನೇಕಲ್‌ ತಾಲೂಕಿನ ಕೆಲವು ಹಳ್ಳಿಗಳು ತಮಿಳುನಾಡಿಗೆ ಹತ್ತಿರದಲ್ಲಿದ್ದು ಹೊರಗಿನಿಂದ ಬಂದಿರುವವರ ಬಗ್ಗೆಯೂ ಮಾಹಿತಿ ಕಲೆ ಹಾಕುವ ಕೆಲಸ ನಡೆಡಿದೆ.
ಡಾ.ಸತೀಶ್‌, ಪ್ರಾಥಮಿಕ ಆರೋಗ್ಯ ಕೇಂದ್ರ ಮರಸೂರು