ವಿಜಯಪುರದಲ್ಲಿ ಮತ್ತಿಬ್ಬರಿಗೆ  ಕೋವಿಡ್ -19 ಸೋಂಕು ದೃಢ

Team Udayavani, Apr 24, 2020, 6:09 PM IST

ವಿಜಯಪುರ: ಶುಕ್ರವಾರ ಪ್ರಕಟಗೊಂಡ ಹೆಲ್ತ್ ಬುಲಿಟಿನ್ ನಲ್ಲಿ ವಿಜಯಪುರ ಜಿಲ್ಲೆಯ ಮತ್ತೆ ಇಬ್ಬರಿಗೆ ಕೋವಿಡ್-19 ಸೋಂಕು ದೃಢಪಟ್ಟಿದೆ. ಇದರೊಂದಿಗೆ ವಿಜಯಪುರ ಜಿಲ್ಲೆಯಲ್ಲಿ ಸೋಂಕಿತರ ಸಂಖ್ಯೆ 39 ಕ್ಕೆ ಏರಿದೆ.

ಮತ್ತೆ ಇಬ್ಬರು ಸೋಂಕಿತರಲ್ಲಿ ಜಿಲ್ಲೆಯಲ್ಲಿ ಮೊದಲ ಸೋಂಕಿತೆ P-221 ಸಂಪರ್ಕದಿಂದ ಆಕೆಯ ಹತ್ತಿರದ ಬಂಧು 17 ವರ್ಷದ P-457 ಹಾಗೂ 27 ವರ್ಷದ P-467 ವ್ಯಕ್ತಿಗೆ ಸೋಂಕು ಹರಡಿದ್ದು ದೃಢಪಟ್ಟಿದೆ.

ಇದರೊಂದಿಗೆ ಜಿಲ್ಲೆಯಲ್ಲಿ ಎಪ್ರಿಲ್12 ರಿಂದ 24 ರ ವರೆಗೆ 39 ಜನರಿಗೆ ಸೋಂಕು ದೃಢಪಟ್ಟಿದೆ. ಇದರಲ್ಲಿ ಸೋಂಕಿತ ಇಬ್ಬರು ಮೃತಪಟ್ಟಿದ್ದಾರೆ. ಸೋಂಕಿತ 37 ರೋಗಿಗಳಿಗೆ ಜಿಲ್ಲೆಯ ಕೋವಿಡ್-19 ಆಸ್ಪತ್ರೆಯಲ್ಲಿ ಚಿಕಿತ್ಸೆ ಮುಂದುವರೆದಿದೆ.

ರಾಜ್ಯದಲ್ಲಿ ಇಂದು ಹೊಸ 29 ಪ್ರಕರಣಗಳು ದೃಢವಾಗಿದೆ. ಇದರಿಂದ ರಾಜ್ಯದಲ್ಲಿ ಒಟ್ಟು ಸೋಂಕಿತರ ಸಂಖ್ಯೆ 474ಕ್ಕೆ ಏರಿಕೆಯಾಗಿದೆ. ಅದರಲ್ಲಿ 18 ಪ್ರಕರಣಗಳು ಮೃತಪಟ್ಟಿದ್ದು, 152 ಜನರು ಬಿಡುಗಡೆ ಹೊಂದಿದ್ದಾರೆ.