ಮನೆಯಲ್ಲಿರಿ, ಸುರಕ್ಷಿತವಾಗಿರಿ, ಗೂಗಲ್ ಡೂಡಲ್ ಮೂಲಕ ಆಟವಾಡಿ !

Team Udayavani, Apr 29, 2020, 8:51 AM IST

ನ್ಯೂಯಾರ್ಕ್ : ತಂತ್ರಜ್ಞಾನ ದೈತ್ಯ ಗೂಗಲ್ ತನ್ನ ಜನಪ್ರಿಯ ಮತ್ತು ಹಳೆಯ ಡೂಡಲ್‌ಗಳ ಸರಣಿಯನ್ನು ಮತ್ತೆ ಪ್ರಸ್ತುತಪಡಿಸುತ್ತಿದೆ. ಇದರಲ್ಲಿ ವಿಶೇಷತೆ ಏನೆಂದರೇ ಗೇಮಿಂಗ್ ಸೇರಿದಂತೆ ಹಲವು ವೈಶಿಷ್ಟ್ಯತೆಗಳಿದ್ದು  ದಿನಕ್ಕೊಂದು ಆಟವನ್ನು ಆಡುವ ಮೂಲಕ ಮನರಂಜನೆಯನ್ನು ಪಡೆಯಬಹುದು.

ಲಾಕ್‌ಡೌನ್ ಇರುವುದರಿಂದ, ಮನೆಯಲ್ಲೇ ಇರುವ ಸಂದರ್ಭದಲ್ಲಿ, ಹೊರಗಡೆ ಹೋಗಬೇಡಿ, ಒಳಾಂಗಣ ಆಟದಲ್ಲಿ ತೊಡಗಿಸಿಕೊಳ್ಳಿ ಎಂದು ಗೂಗಲ್ ಹೇಳಿದೆ. ಜತೆಗೆ ದಿನಕ್ಕೊಂದು ಆಕರ್ಷಕ, ಜನಪ್ರಿಯ ಹಳೆಯ ಡೂಡಲ್ ಸರಣಿಯನ್ನು ಕೂಡ ಪ್ರಕಟಿಸುತ್ತಿದ್ದು, ಈ ಬಾರಿ ಕ್ರೀಯಾಶೀಲತೆಯನ್ನು ಬಳಸಿಕೊಂಡು ಕ್ರಿಕೆಟ್ ಡೂಡಲ್ , ಫಿಶ್ ಚಿಂಗರ್, ಕೋಡಿಂಗ್ ಅನ್ನು ಈಗಾಗಲೇ  ಪ್ರಸ್ತುತಪಡಿಸಿದೆ.

ಸೋಮವಾರ, ಏ. 27ರಂದು ಗೂಗಲ್ ತನ್ನ ಮುಖಪುಟದ ಡೂಡಲ್‌ನಲ್ಲಿ ಕೋಡಿಂಗ್ ಗೇಮ್ ಅನ್ನು ಪ್ರಕಟಿಸಿದರೆ, ಮಂಗಳವಾರ ಜನಪ್ರಿಯ ಕ್ರಿಕೆಟ್ ಡೂಡಲ್ ಅನ್ನು ಪರಿಚಯಿಸಿದೆ.  ಬುಧವಾರ(ಏ.29) ದಂದು ಫಿಶ್ ಚಿಂಗರ್ ಎಂಬ ಸಂಗೀತ ವೈವಿಧ್ಯವನ್ನು ಪರಿಚಯಿಸಿದೆ. ಇದು ಸರಣಿಯಾಗಿ ಮುಂದುವರೆಯುತ್ತಿದ್ದು ಜನರಿಗೆ ಲಾಕ್ ಡೌನ್ ಅವಧಿಯಲ್ಲಿ  ಮನರಂಜನೆ ನೀಡುವುದಷ್ಠೇ ಉದ್ದೇಶ ಮನೆಯಲ್ಲೇ ಇರಿ, ಸುರಕ್ಷಿತವಾಗಿರಿ, ಹೊರಗಡೆ ಹೋಗಬೇಡಿ ಎಂದು ಗೂಗಲ್ ತಿಳಿಸಿದೆ.

2017ರಲ್ಲಿ ಪ್ರಕಟಿಸಿದ್ದ, 50 ಇಯರ್ಸ್ ಆಫ್ ಕಿಡ್ಸ್‌ ಕೋಡಿಂಗ್ ಎಂಬುದು ಬಹು ಆಕರ್ಷಣೆ ಪಡೆದಿತ್ತು. ಕಂಪ್ಯೂಟರ್ ಮತ್ತು ಐಟಿ ಕ್ಷೇತ್ರದಲ್ಲಿ ಕೋಡಿಂಗ್ ಅತ್ಯಂತ ಪ್ರಮುಖವಾಗಿದ್ದು, ಅದರ ಮಹತ್ವ ಸಾರುವ ಮತ್ತು ಮಕ್ಕಳಿಗೆ ವಿಶೇಷವಾಗಿ ಇಷ್ಟವಾಗುವಂತಹ ರೀತಿಯಲ್ಲಿ ಡೂಡಲ್ ರಚಿಸಲಾಗಿದೆ.

ಗೂಗಲ್ ತೆರೆಯುತ್ತಿದ್ದಂತೆ, ಅಲ್ಲಿರುವ ಡೂಡಲ್ ಮೇಲೆ ಕ್ಲಿಕ್ ಮಾಡಿದರೆ, ಡೂಡಲ್ ಪುಟ ತೆರೆದುಕೊಳ್ಳುತ್ತದೆ. ನಿಮ್ಮ ನೆಚ್ಚಿನ ಆಟವನ್ನು ನೀವು ಮಿಸ್ ಮಾಡಿಕೊಳ್ಳುತ್ತಿದ್ದರೆ, ಗೂಗಲ್ ಡೂಡಲ್ ಮೂಲಕ ಆಡಬಹುದು . ಈಗಲೂ ಯಾವುದೇ ದಿನವಿಶೇಷವಿರಲಿ, ಗೂಗಲ್ ಅದನ್ನು ಸ್ಮರಣೀಯವಾಗಿಸಲು ಆಕರ್ಷಕ ಡೂಡಲ್ ಪ್ರಸ್ತುತಪಡಿಸುತ್ತದೆ.