ಊರಿಗೆ ಮರಳಲು ಒಂದು ಅವಕಾಶ

Team Udayavani, May 1, 2020, 6:00 AM IST

ಬೆಂಗಳೂರು: ಅಂತರ್‌ ಜಿಲ್ಲೆ ಮತ್ತು ಅಂತಾರಾಜ್ಯ ಸಂಚಾರಕ್ಕೆ ಒಂದು ಬಾರಿಯ ಅವಕಾಶ ಕಲ್ಪಿಸಲು ಸರಕಾರ ನಿರ್ಧರಿಸಿದ್ದು, ಲಾಕ್‌ಡೌನ್‌ ಅವಧಿಯಲ್ಲಿ ಹೊರ ಊರುಗಳಲ್ಲಿ ಸಿಕ್ಕಿಹಾಕಿ ಕೊಂಡಿರುವ ಜನತೆಗೆ ಸಿಹಿ ಸುದ್ದಿ ಒದಗಿಸಿದೆ.

ವಿವಿಧ ಕಾರಣಗಳಿಂದಾಗಿ ಬೇರೆ ಊರುಗಳಲ್ಲಿ ಉಳಿದುಕೊಂಡವರು, ವಲಸೆ ಕಾರ್ಮಿಕರು, ಬೇರೆ ರಾಜ್ಯಗಳ ವಿದ್ಯಾರ್ಥಿಗಳು, ಪ್ರವಾಸಿಗರು ಈ ಅವಕಾಶವನ್ನು ಬಳಸಿಕೊಳ್ಳಬಹುದು ಎಂದು ಸಿಎಂ ಯಡಿಯೂರಪ್ಪ ತಿಳಿಸಿದ್ದಾರೆ.

ಗುರುವಾರ ನಡೆದ ಸಂಪುಟ ಸಭೆಯ ಅನಂತರ ಅವರು ಈ ಮಾಹಿತಿ ನೀಡಿದರು. ಕೇಂದ್ರ ಸರಕಾರದ ಮಾರ್ಗದರ್ಶಿ ಸೂತ್ರ ದನ್ವಯ ಈ ನಿರ್ಧಾರ ಕೈಗೊ ಳ್ಳಲು ಸಂಪುಟ ನಿರ್ಧರಿಸಿದೆ.

ಅಂತರ್‌ ಜಿಲ್ಲೆ ಮತ್ತು ಇತರ ರಾಜ್ಯಗಳಿಗೆ ತೆರಳಲು ಇಚ್ಛಿಸುವವರಿಗೆ ಸರಕಾರ ಸಾರಿಗೆ ವ್ಯವಸ್ಥೆ ಕಲ್ಪಿಸುವು ದಿಲ್ಲ. ಅವರು ಟ್ಯಾಕ್ಸಿ, ಕಾರು ಇತ್ಯಾದಿ ಸ್ವಂತ ವ್ಯವಸ್ಥೆ ಮಾಡಿ ಕೊಳ್ಳಬೇಕು. ಹೆಚ್ಚು ಜನರಿದ್ದ ಸಂದರ್ಭ ಮನವಿ ಮಾಡಿದರೆ ಕೆಎಸ್ಸಾರ್ಟಿಸಿ ಬಸ್‌ ವ್ಯವಸ್ಥೆಯನ್ನು ಸರಕಾರ ಮಾಡಿಕೊಡಲಿದೆ. ಆದರೆ ಅದರ ವೆಚ್ಚವನ್ನು ಅವರೇ ಭರಿಸಬೇಕಾಗುತ್ತದೆ ಎಂದು ಸಿಎಂ ಯಡಿಯೂರಪ್ಪ ಹೇಳಿದ್ದಾರೆ.

ಇದೇವೇಳೆ, ರಾಜ್ಯಕ್ಕೆ ಬರುವ ಅನ್ಯರಾಜ್ಯದವರು ಕಡ್ಡಾಯ ತಪಾಸಣೆಗೆ ಒಳಗಾಗಬೇಕು ಮತ್ತು ಅವರಿಗೆ ಕೇಂದ್ರದ ಮಾರ್ಗಸೂಚಿ ಪ್ರಕಾರವೇ ಅನುಮತಿ ನೀಡಲು ನಿರ್ಧರಿಸಲಾಗಿದೆ ಎಂದು ಸಿಎಂ ತಿಳಿಸಿದ್ದಾರೆ.

ಕೈಗಾರಿಕೆಗಳಿಗೆ ಸಮ್ಮತಿ
ಕೆಂಪು ವಲಯದ 15 ಜಿಲ್ಲೆಗಳನ್ನು ಹೊರತು ಪಡಿಸಿ ಇತರೆಡೆ ಕೈಗಾರಿಕೆ ಚಟುವಟಿಕೆ ಆರಂಭಿಸಲು ಸಚಿವ ಸಂಪುಟ ಗುರುವಾರ ಒಪ್ಪಿಗೆ ನೀಡಿದೆ. ಹೀಗಾಗಿ ರಾಜ್ಯದ ಅರ್ಧ ಭಾಗದಲ್ಲಿ ಕೈಗಾರಿಕಾ ಚಟುವಟಿಕೆ ಸೋಮವಾರದಿಂದ ಆರಂಭವಾಗಲಿದೆೆ.

ರಾಜ್ಯದ ಆರ್ಥಿಕ ಚೇತರಿಕೆಯ ದೃಷ್ಟಿಯಿಂದ ಕೆಲವು ಕ್ರಮಗಳು ಅನಿವಾರ್ಯ. ಪರಿಸ್ಥಿತಿ ಸುಧಾರಿಸಿದ ಬಳಿಕ ಬೆಂಗಳೂರಿನಲ್ಲಿಯೂ ಕೈಗಾರಿಕೆ ಮತ್ತು ಇತರ ವಾಣಿಜ್ಯ ಚಟುವಟಿಕೆಗಳು ಆರಂಭವಾಗಲಿವೆ ಎಂದು ಯಡಿಯೂರಪ್ಪ ವಿವರಿಸಿದರು.

ಈ ಮೂಲಕ ಮೇ 3ರ ಅನಂತರ ಹಂತ ಹಂತವಾಗಿ ಲಾಕ್‌ ಡೌನ್‌ ಸಡಿಲಗೊಳಿಸುವ ಮುನ್ಸೂಚನೆ ಸರಕಾರದಿಂದ ದೊರೆತಿದೆ.

ಕೋವಿಡ್‌-19 ಯೋಧರು ಮಡಿದರೆ 30 ಲಕ್ಷ ರೂ.
ಕೋವಿಡ್‌-19 ನಿಯಂತ್ರಣಕ್ಕಾಗಿ ಹಗಲಿರುಳು ದುಡಿಯುತ್ತಿರುವ ಅಂಗನವಾಡಿ ಕಾರ್ಯಕರ್ತೆಯರು, ಅಂಗನವಾಡಿ ಸಹಾಯಕರು, ಪೌರ ಕಾರ್ಮಿಕರು ಮತ್ತು ಪೊಲೀಸ್‌ ಸಿಬಂದಿ ಕೋವಿಡ್‌-19 ಸೋಂಕಿಗೆ ಒಳಪಟ್ಟು ಮೃತಪಟ್ಟರೆ 30 ಲಕ್ಷ ರೂ. ಪರಿಹಾರ ನೀಡಲು ಸಂಪುಟ ಸಭೆಯಲ್ಲಿ ಅನುಮೋದನೆ ನೀಡಲಾಗಿದೆ.

ಸಂಚಾರ ಅವಕಾಶ ಹೇಗೆ?
1. ನಿತ್ಯ ಸಂಚಾರಕ್ಕೆ ಅವಕಾಶ ಇಲ್ಲ, ಒಂದು ಬಾರಿಗೆ ಮಾತ್ರ.
2. ಜಿಲ್ಲಾ ಅಥವಾ ರಾಜ್ಯ ಗಡಿಯಲ್ಲಿ ನೋಂದಣಿ ಕೇಂದ್ರ ಸ್ಥಾಪನೆ, ನೋಡಲ್‌ ಅಧಿಕಾರಿ ನೇಮಕ.
3.ಪ್ರಯಾಣಿಸುವಾಗ ಗುರುತಿನ ಚೀಟಿ ಸಹಿತ ನೋಂದಣಿ ಕಡ್ಡಾಯ.
4.ತಪಾಸಣೆ ಕಡ್ಡಾಯ, ಕೊರೊನಾ ಸೋಂಕು ಇದ್ದರೆ ಸಂಚಾರಕ್ಕೆ ಅವಕಾಶ ಇರದು.
5. ಸಕಾರಣ ನೀಡಬೇಕು. ಅನಂತರ ಅದನ್ನು ಪರಿಶೀಲನೆ ನಡೆಸಲಾಗುವುದು.
6. ಕೇಂದ್ರ ಸರಕಾರದ ಮಾರ್ಗಸೂಚಿ ಪ್ರಕಾರ ರಾಜ್ಯ ಸರಕಾರ ಈ ಕುರಿತು ನಿಯಮಾವಳಿ ಹೊರಡಿಸಲಿದ್ದು, ಪಾಲನೆ ಕಡ್ಡಾಯ.