ಅಫ್ಘಾನಿಸ್ಥಾನ: ಆರೋಗ್ಯ ದುರಂತ ಸಂಭವಿಸುವ ಸ್ಥಿತಿ

Team Udayavani, May 2, 2020, 1:56 PM IST

ದುರ್ಬಲ ಆರೋಗ್ಯ ರಕ್ಷಣೆ ವ್ಯವಸ್ಥೆ ಹಾಗೂ ಸಂಘರ್ಷದ ಫ‌ಲವಾಗಿ ಅಫ್ಘಾನಿಸ್ಥಾನವು ಕೋವಿಡ್ ವಿರುದ್ಧದ ಸಮರ ಸಾರಲು ಕಷ್ಟಪಡುತ್ತಿದೆ. ಈ ದೇಶದಲ್ಲಿ ಆರೋಗ್ಯ ದುರಂತವೇ ಸಂಭವಿಸಬಹುದು ಎಂದು ಅಮೆರಿಕದ ಗುಪ್ತಚರ ಸಂಸ್ಥೆ ಸಿಗಾರ್‌ ತಿಳಿಸಿದೆ.
ಅಪೌಷ್ಟಿಕತೆ, ಕಳಪೆ ಗುಣಮಟ್ಟದ ಆರೋಗ್ಯ ಸೇವೆ, ಯುದ್ಧ ಹಾಗೂ ಇತರ ಕಾರಣಗಳಿಂದಾಗಿ ಅಫ್ಘಾನಿಸ್ಥಾನವು ತೀವ್ರ ಸಂಕಷ್ಟದಲ್ಲಿದೆ ಎಂದು ಅಮೆರಿಕದ ಕಾಂಗ್ರೆಸ್‌ ಸಹ ಎಚ್ಚರಿಸಿದೆ.

ಅಫ್ಘಾನಿಸ್ಥಾನ ಪುನರುತ್ಥಾನದ ವಿಶೇಷ ಮಹಾ ನಿರ್ದೇಶಕ (ಸಿಗಾರ್‌) ಜಾನ್‌ ಸೋಪ್ಕೋ ಗುರುವಾರ ವರದಿಯೊಂದನ್ನು ಬಿಡುಗಡೆ ಮಾಡಿದ್ದು, ಅಮೆರಿಕ ನೇತೃತ್ವದಲ್ಲಿ ಅಫ್ಘಾನಿಸ್ಥಾನದಲ್ಲಿ ಶಾಂತಿ ಮರುಸ್ಥಾಪನೆ ಪ್ರಯತ್ನವೂ ವಿಳಂಬವಾಗಬಹುದು. ಕೋವಿಡ್‌ 19 ಹರಡುವಿಕೆ ಗಣನೀಯವಾಗಿದ್ದು, ವಾಣಿಜ್ಯ ಹಾಗೂ ಮಾನವೀಯ ಸೇವೆ ಒದಗಿಸುವುದಕ್ಕೂ ಅಡ್ಡಿಯಾಗಿದೆ.
ದುರ್ಬಲ ಆರೋಗ್ಯ ವ್ಯವಸ್ಥೆ, ವ್ಯಾಪಕವಾಗಿರುವ ಅಪೌಷ್ಟಿಕತೆ, ಗಡಿಯಲ್ಲಿನ ಭದ್ರತೆಯ ಕೊರತೆ, ಇರಾಕ್‌ ಜತೆಗಿನ ಸಂಘರ್ಷ, ಆಂತರಿಕ ತಿಕ್ಕಾಟ ಇತ್ಯಾದಿ ಎಲ್ಲವೂ ಆರೋಗ್ಯ ದುರಂತಕ್ಕೆ ಕಾರಣವಾಗಬಹುದು. ಆಹಾರ ವಸ್ತುಗಳ ಬೆಲೆ ಏರಿಕೆ ಗಾಯದ ಮೇಲೆ ಬರೆ ಎಳೆಯುವುದು ನಿಶ್ಚಿತ ಎಂದೂ ವರದಿಯಲ್ಲಿ ಉಲ್ಲೇಖೀಸಲಾಗಿದೆ.

ಸೋಂಕು ಹರಡುತ್ತಿದ್ದ ಸಂದರ್ಭದಲ್ಲೇ ಶಾಂತಿ ಮಾತುಕತೆಯ ಪೂರ್ವಭಾವಿಯಾಗಿ ಅಪಾಯದಲ್ಲಿರುವ ಸಾವಿರಾರು ಬಂಡುಕೋರರು ಹಾಗೂ ಕೈದಿಗಳನ್ನು ಬಿಡುಗಡೆ ಮಾಡುವಂತೆ ಅಮೆರಿಕವು ತಾಲಿಬಾನ್‌ ಹಾಗೂ ಅಫ್ಘಾನಿಸ್ಥಾನ ಅಧ್ಯಕ್ಷ ಅಶ್ರಫ್ ಘನಿ ಅವರಿಗೆ ಮನವಿ ಮಾಡಿತ್ತು. ಅಮೆರಿಕದ ಸೇನಾಪಡೆಗಳನ್ನು ವಾಪಸ್‌ ಪಡೆಯುವ ತಾಲಿಬಾನ್‌ ಜತೆಗಿನ ಒಪ್ಪಂದದಲ್ಲಿ ಅಫ್ಘಾನಿಸ್ಥಾನ ಪಾಲ್ಗೊಂಡಿರಲಿಲ್ಲ. ಎಷ್ಟು ಕೈದಿಗಳನ್ನು ಬಿಡುಗಡೆ ಮಾಡಬೇಕು ಎನ್ನುವ ವಿಷಯದಲ್ಲಿ ಭಿನ್ನಮತ ಉಂಟಾಗಿದ್ದು ಶಾಂತಿ ಮಾತುಕತೆಗೆ ಹಿನ್ನಡೆ ಎನಿಸಿದೆ. ಕೈದಿಗಳು ಸೋಂಕಿಗೊಳಗಾಗಿ ಸತ್ತರಂತೂ ಈ ಸ್ಥಿತಿ ಇನ್ನಷ್ಟು ಗಂಭೀರವಾಗಲಿದೆ ಎಂದು ವರದಿ ಮಾಡಿದ ಅಲ್‌ಜಜೀರಾ.

ಈ ವರ್ಷದ ಮೊದಲ ಮೂರು ತಿಂಗಳಲ್ಲಿ ತಾಲಿಬಾನ್‌ ನಡೆಸುವ ದಾಳಿಗಳ ದತ್ತಾಂಶವನ್ನು ಸಾರ್ವಜನಿಕವಾಗಿ ಬಿಡುಗಡೆ ಮಾಡಲು ನ್ಯಾಟೋ ನೇತೃತ್ವದ ಅಂತಾರಾಷ್ಟ್ರೀಯ ಮಿತ್ರ ಪಡೆಗಳು ನಿರಾಕರಿಸಿವೆ. ದತ್ತಾಂಶಗಳು ಪ್ರಮುಖ ಅಂಶಗಳಾದ ಕಾರಣ ತಾಲಿಬಾನ್‌ ಜತೆಗಿನ ಶಾಂತಿ ಮಾತುಕತೆಗಳು ಮುಗಿದ ಬಳಿಕವಷ್ಟೇ ಅವುಗಳ ನೀಡಿಕೆ ಆರಂಭವಾಗಲಿದೆ ಎಂದು ಪೆಂಟಗಾನ್‌ ಸ್ಪಷ್ಟಪಡಿಸಿದೆ. ಸದ್ಯ ಅಫ‌ಘಾನಿಸ್ಥಾನದಲ್ಲಿ 2,200 ಜನ ಕೊರೊನಾ ಸೋಂಕುಪೀಡಿತರಾಗಿದ್ದು, 64 ಮಂದಿ ಮೃತಪಟ್ಟಿದ್ದಾರೆ.