ಈ ವರ್ಷಾಂತ್ಯದ ವೇಳೆ ಅಮೆರಿಕಾದಲ್ಲಿ ಕೋವಿಡ್-19 ಲಸಿಕೆ ಸಿದ್ದ: ಡೊನಾಲ್ಡ್ ಟ್ರಂಪ್ ವಿಶ್ವಾಸ

Team Udayavani, May 4, 2020, 8:23 AM IST

ವಾಷಿಂಗ್ಟನ್: ಈ ವರ್ಷದ ಅಂತ್ಯದ ವೇಳೆಗೆ ಅಮೆರಿಕಾದಲ್ಲಿ  ಕೋವಿಡ್ -19 ಲಸಿಕೆ ಸಿದ್ದವಾಗುತ್ತದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ವಿಶ್ವಾಶದ ನುಡಿಗಳನ್ನಾಡಿದ್ದಾರೆ.

ಫಾಕ್ಸ್ ನ್ಯೂಸ್ ನ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ  ಅವರು  ಈ ವರ್ಷದ ಕೊನೆಯಲ್ಲಿ ಕೋವಿಡ್ 19 ನಿರ್ಮೂಲನಾ ಲಸಿಕೆಯನ್ನು ಪಡೆಯಲಿದ್ದೇವೆ. ಇದರಲ್ಲಿ  ನಮಗೆ ತುಂಬಾ ವಿಶ್ವಾಸವಿದೆ ಎಂದು ಟ್ರಂಪ್ ಹೇಳಿದರು.

ಸೆಪ್ಟೆಂಬರ್‌ನಲ್ಲಿ ಶಾಲೆಗಳು ಮತ್ತು ವಿಶ್ವವಿದ್ಯಾಲಯಗಳನ್ನು ಪುನಃ ತೆರೆಯಲು ಪ್ರಯತ್ನಿಸಲಾಗುವುದು. ವಿದ್ಯಾರ್ಥಿಗಳು ಶಾಲಾ-ಕಾಲೇಜಿಗೆ  ಹಿಂತಿರುಗಬೇಕೆಂದು ನಾನು ಬಯಸುತ್ತೇನೆ ಎಂದು ಈ ಸಂದರ್ಭದಲ್ಲಿ ತಿಳಿಸಿದರು.

ಅಮೆರಿಕಾದ ಸಂಶೋಧಕರು ಈಗಾಗಲೇ ಲಸಿಕೆ  ಕಂಡುಹಿಡಿಯುವ ಪ್ರಯತ್ನದಲ್ಲಿದ್ದಾರೆ. ಒಂದು ವೇಳೆ ಬೇರೆ ದೇಶದ ಸಂಶೋಧಕರು ಔಷಧಿ ಕಂಡುಹಿಡಿದರೆ  ನಮಗೂ ಸಂತೋಷವಾಗಲಿದ್ದು, ಅವರಿಗೆ ನನ್ನ ಟೋಪಿ (HAT) ತೆಗೆದು ಧನ್ಯವಾದ ತಿಳಿಸುತ್ತೇನೆ. . ಇಂತಹ ಸಂದರ್ಭದಲ್ಲಿ  ಲಸಿಕೆ ಕಂಡುಹಿಡಿಯುವುದೊಂದೆ ನಮ್ಮ ಧ್ಯೇಯ ಎಂದರು.

ಅಮೆರಿಕಾದಲ್ಲಿ ಈಗಾಗಲೇ  ಕೋವಿಡ್ 19 ವೈರಸ್ ಗೆ 68 ಸಾವಿರಕ್ಕಿಂತ ಹೆಚ್ಚು ಜನರು ಮೃತಪಟ್ಟಿದ್ದು, 11 ಲಕ್ಷಕ್ಕಿಂತಲೂ ಹೆಚ್ಚು ಜನರು ಸೋಂಕಿನಿಂದ ಬಳಲುತ್ತಿದ್ದಾರೆ.