ಸಾಲ ಬಡ್ಡಿದರ ಇಳಿಸಿದ ಎಸ್‌ಬಿಐ

Team Udayavani, May 8, 2020, 1:45 PM IST

ಸಾಂದರ್ಭಿಕ ಚಿತ್ರ

ನವದೆಹಲಿ: ದೇಶದಲ್ಲೇ ಗರಿಷ್ಠ ಸಾಲ ನೀಡುವ ಬ್ಯಾಂಕ್‌ ಎನಿಸಿಕೊಂಡಿರುವ ಎಸ್‌ಬಿಐ, ಮಹತ್ವದ ತೀರ್ಮಾನ ಮಾಡಿದೆ. ಅದು ಸಾಲದ ಮೇಲೆ ಹಾಕುವ ಬಡ್ಡಿದರದಲ್ಲಿ 15 ಮೂಲ ಅಂಕ ಗಳನ್ನು (ಶೇ. 0.15) ಕಡಿತ ಮಾಡಿದೆ. ಅಂದರೆ ಮೇ 10 ರಿಂದ ಬಡ್ಡಿ ದರ ತುಸು ಕಡಿಮೆಯಾಗಲಿದೆ. ಈ ಕಡಿತದಿಂದ ಒಂದು ವರ್ಷದ ಎಂಸಿಎಲ್‌ಆರ್‌ (ಬಡ್ಡಿದರ
ನಿರ್ಧರಿಸಲು ಆರ್‌ಬಿಐ ನಿಗದಿಪಡಿಸಿರುವ ಮಾನದಂಡ) ಶೇ.7.40ರಿಂದ ಶೇ.7.25ಕ್ಕೆ ಇಳಿಕೆಯಾಗಲಿದೆ. ಸತತ 12ನೇ ಬಾರಿಗೆ ಎಸ್‌ ಬಿಐ ಹೀಗೆ ಇಳಿಕೆ ಮಾಡುತ್ತಿದೆ. ಇದರಿಂದ ಹಲವರಿಗೆ ಅನುಕೂಲವಾಗಲಿದೆ. ಮಾಸಿಕ ಕಂತುಗಳು ತಗ್ಗಲಿವೆ. ಉದಾಹರಣೆಗೆ 30 ವರ್ಷದ ಅವಧಿಗೆ 25 ಲಕ್ಷ ರೂ. ಮನೆ ಸಾಲ ತೆಗೆದುಕೊಂಡವರಿಗೆ ಮಾಸಿಕ 255 ರೂ. ಕಡಿಮೆಯಾಗಲಿದೆ.

ಹಿರಿಯ ನಾಗರಿಕರಿಗೆ ವೆಲ್‌ ಕೇರ್‌: ಹಿರಿಯ ನಾಗರಿಕರಿಗಾಗಿ ಎಸ್‌ಬಿಐ ವೆಲ್‌ಕೇರ್‌ ಡೆಪಾಸಿಟ್‌ ಎಂಬ ಯೋಜನೆ ಶುರು ಮಾಡಲಾಗಿದೆ. ಐದು ವರ್ಷ ಅಥವಾ ಅದಕ್ಕಿಂತ ಹೆಚ್ಚು
ಅವಧಿಗೆ ಇಡಲ್ಪಟ್ಟ ಠೇವಣಿಗಳಿಗೆ ಶೇ.0.30 ದರವನ್ನು ಏರಿಸಲಾಗಿದೆ. ಇದರಿಂದ ಹಿರಿಯರಿಗೆ ತುಸು ಲಾಭ ಹೆಚ್ಚಾಗುತ್ತದೆ. ಇದರ ಜೊತೆಗೆ ಮೂರು ವರ್ಷಗಳವರೆಗೆ ಇಡಲ್ಪಟ್ಟ ಠೇವಣಿಗಳ ಮೇಲಿನ ಬಡ್ಡಿದರವನ್ನು 20 ಮೂಲ ಅಂಕಗಳಷ್ಟು ಇಳಿಸಿದೆ. ಇದು ಮೇ 12ರಿಂದ ಜಾರಿಯಾಗಲಿದೆ.