ಕೋವಿಡ್‌ ಅಲ್ಲದ ರೋಗಿಗಳಿಗೆ ಉಚಿತ ಆನ್‌ಲೈನ್‌ ದೂರ ಸಂಪರ್ಕ ವೈದ್ಯಕೀಯ ಸೇವೆ ಪ್ರಾರಂಭ

Team Udayavani, May 14, 2020, 11:47 AM IST

ಸಾಂದರ್ಭಿಕ ಚಿತ್ರ

ಮುಂಬಯಿ: ಲಾಕ್‌ಡೌನ್‌ನಿಂದ ಬಳಲುತ್ತಿರುವ ಕೋವಿಡ್‌ ಅಲ್ಲದ ರೋಗಿಗಳಿಗೆ ಪರಿಹಾರ ನೀಡುವ ಪ್ರಯತ್ನವಾಗಿ ಮಹಾರಾಷ್ಟ್ರ ಸರ್ಕಾರ ಮಂಗಳವಾರದಿಂದ ಉಚಿತ ಆನ್‌ಲೈನ್‌ ದೂರಸಂಪರ್ಕ ವೈದ್ಯಕೀಯ ಸೇವೆಗಳನ್ನು ಪ್ರಾರಂಭಿಸಿದೆ. ಇದರ ಸದುಪಯೋಗ ಪಡೆಯುವ ರೋಗಿಯು ಆನ್‌ಲೈನ್‌ನಲ್ಲಿ ನೋಂದಾಯಿಸಿಕೊಳ್ಳಬೇಕಾಗುತ್ತದೆ. ಅನಂತರ ಅವರು ಅಥವಾ ಅವಳು ತಜ್ಞ ವೈದ್ಯರೊಂದಿಗೆ ನೇರವಾಗಿ ವೀಡಿಯೊ ಕಾನ್ಫರೆನ್ಸಿಂಗ್‌ ಅಥವಾ www.esanjeevaniopd.in ಮೂಲಕ ಚಾಟ್‌ ಮಾಡಲು ಸಾಧ್ಯವಾಗುತ್ತದೆ. ಇದು ಕೇಂದ್ರ ಸರ್ಕಾರದ ಸಹಾಯದಿಂದ ಪ್ರಾರಂಭವಾದ ಜಂಟಿ ಉದ್ಯಮವಾಗಿದೆ. ಖಾಸಗಿ ವೈದ್ಯರ ಸೇವೆಗಳ ಅನುಪಸ್ಥಿತಿಯಲ್ಲಿ ಜನರು ಎದುರಿಸುತ್ತಿರುವ ತೊಂದರೆಗಳನ್ನು ಪರಿಗಣಿಸಲು ಇದು ಆನ್‌ಲೈನ್‌ ಒಪಿಡಿ ಸೇವೆಯಾಗಿದೆ ಎಂದು ರಾಜ್ಯ ಆರೋಗ್ಯ ಸಚಿವ ರಾಜೇಶ್‌ ಟೊಪೆ ಹೇಳಿದ್ದಾರೆ.

ರೋಗಿಯು ತನ್ನ ಮೊಬೈಲ್‌ ಸಂಖ್ಯೆಯ ಸಹಾಯದಿಂದ ಪೋರ್ಟಲ್‌ನಲ್ಲಿ ನೋಂದಾಯಿಸಿಕೊಳ್ಳಬೇಕಾಗುತ್ತದೆ. ಲಭ್ಯವಿರುವ ಯಾವುದೇ ವೈದ್ಯಕೀಯ ವರದಿ ಅಥವಾ ಇತರ ದಾಖಲೆಗಳನ್ನು ಅಪ್‌ಲೋಡ್‌ ಮಾಡಿ ಟೋಕನ್‌ ಸಂಖ್ಯೆಯನ್ನು ಪಡೆಯಬಹುದು. ಪೋರ್ಟಲ್‌ನಲ್ಲಿ ಲಾಗ್‌ ಇನ್‌ ಮಾಡಲು ರೋಗಿಗೆ ತಿಳಿಸಲಾಗುತ್ತದೆ. ಅವರಿಗೆ ವೈದ್ಯರು ಲಭ್ಯವಾದ ನಂತರ ಕರೆ ಮಾಡಿ ತಿಳಿಸಲಾಗುತ್ತದೆ. ರೋಗಿಯು ನೇರವಾಗಿ ವಿಡಿಯೋ ಕಾನ್ಫರೆನ್ಸಿಂಗ್‌ ಅಥವಾ ಪಠ್ಯ ಸಂದೇಶದ ಮೂಲಕ ವೈದ್ಯರೊಂದಿಗೆ ಚಾಟ್‌ ಮಾಡಬಹುದು. ಚರ್ಚೆಯ ಅನಂತರ ಇ-ಪ್ರಿಸ್ಕ್ರಿಪ್ಷನ್‌ ಸಹ ಪಡೆಯುತ್ತಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಆರಂಭದಲ್ಲಿ, ಇದನ್ನು ಕೆಲವು ದಿನಗಳ ಹಿಂದೆ ಪ್ರಾಯೋಗಿಕ ನೆಲೆಯಲ್ಲಿ ಪ್ರಾರಂಭಿಸಲಾಯಿತು. ಸೋಮವಾರದಿಂದ ರಾಜ್ಯದಾದ್ಯಂತ ಸೇವೆಗಳು ಲಭ್ಯವಿವೆ. ರಾಜ್ಯದ ಯಾವುದೇ ಜಿಲ್ಲೆಯ ರೋಗಿಗಳು ಸೇವೆಗಳ ಲಾಭವನ್ನು ಪಡೆಯಬಹುದು ಎಂದು ಟೋಪೆ ಹೇಳಿದರು.

ಮಧ್ಯಾಹ್ನದವರೆಗೆ ಮಾತ್ರ
ಸೇವೆಯು ದಿನದ ಮೊದಲಾರ್ಧದಲ್ಲಿ ಬೆಳಗ್ಗೆ 9.30 ರಿಂದ ಮಧ್ಯಾಹ್ನ 1.30ರ ನಡುವೆ ಮಾತ್ರ ಲಭ್ಯವಿರುತ್ತದೆ. ರವಿವಾರಗಳಂದು ಲಭ್ಯವಿರುವುದಿಲ್ಲ. ಜನರ ಪ್ರತಿಕ್ರಿಯೆಯ ಆಧಾರದ ಮೇಲೆ ಸಮಯವನ್ನು ಕ್ರಮೇಣ ಹೆಚ್ಚಿಸಲಾಗುವುದು ಎಂದು ಟೋಪೆ ಹೇಳಿದರು.