ನರೇಗಾ ಯೋಜನೆಯಡಿ ಕೆರೆ ಹೂಳೆತ್ತುವಾಗ ನೀರಿನಲ್ಲಿ ಮುಳುಗಿ ಇಬ್ಬರು ಸಾವು

Team Udayavani, May 14, 2020, 4:46 PM IST

ಬೀದರ್: ಉದ್ಯೋಗ ಖಾತ್ರಿ ಯೋಜನೆಯಡಿ ಕೆರೆಯಲ್ಲಿ ಹೂಳು ತೆಗೆಯುವ ಕೂಲಿ ಕೆಲಸ ಮಾಡುತ್ತಿದ್ದ ಕಾರ್ಮಿಕ ಮತ್ತು ಮೇಟಿ ( ಮೇಲ್ವಿಚಾರಕ) ನೀರಿನಲ್ಲಿ ಮುಳಗಿ ಸಾವನ್ನಪ್ಪಿರುವ ಘಟನೆ ಸೋಮವಾರ ಔರಾದ ತಾಲೂಕಿನ ಸಂತಪೂರ ಗ್ರಾಮದಲ್ಲಿ ನಡೆದಿದೆ.

ಕಾರ್ಮಿಕ ಮೆಹಬೂಬ್ ರಸೂಲ್ (28) ಮತ್ತು ಮೇಲ್ವಿಚಾರಕ ಶಾರುಖ್ ಲಯುಮ್ ಖಾನ್ (21) ಮುಳುಗಿ ಮೃತಪಟ್ಟ ದುರ್ದೈವಿಗಳು.

ಸಂತಪೂರ ಸಮೀಪದ ಕೆರೆಯೊಂದರಲ್ಲಿ ನರೇಗಾ ಯೋಜನೆಯಡಿ ಹೂಳೆತ್ತುವ ಕಾಮಗಾರಿ ನಡೆಯುತ್ತಿದೆ.‌ ಈ ವೇಳೆ ಕಾರ್ಮಿಕ ಮೆಹಬೂಬ್ ರಸೂಲ್ ಮತ್ತು ಮೇಲ್ವಿಚಾರಕ ಶಾರುಖ್ ಲಯುಮ್ ಖಾನ್ ಇಬ್ಬರು ಕೈತಳೆದುಕೊಳ್ಳಲು ನೀರಿನೊಳಗೆ ಇಳಿದಿದ್ದರು. ಆದರೆ ನೀರಿನಲ್ಲಿ ಸಿಲುಕಿಕೊಂಡು ಮೇಲೆ ಬರಲು ಸಾಧ್ಯವಾಗದೇ ಸಾವನ್ನಪ್ಪಿದ್ದಾರೆ.

 ಸ್ಥಳಕ್ಕೆ ತಾಪಂ ಇಒ ಮತ್ತು ಸಿಪಿಐ ಭೇಟಿ ನೀಡಿ, ಮೃತರ ಕುಟುಂಬಕ್ಕೆ ನರೇಗಾದಡಿ ತಲಾ 75 ಸಾವಿರ ರೂ. ಪರಿಹಾರ ಘೋಷಿಸಿದ್ದಾರೆ. ಘಟನೆ ಕುರಿತು ಸಂತಪೂರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.