ಚಲಿಸುತ್ತಿದ್ದ ಸ್ಕೂಟಿಯಿಂದ ಕಳಚಿದ ಚಕ್ರ: ಆರೋಗ್ಯ ಸಿಬ್ಬಂದಿ ತಲೆಗೆ ಪೆಟ್ಟು

Team Udayavani, May 15, 2020, 1:17 PM IST

ಕಲಬುರಗಿ: ಕೋವಿಡ್-19 ಸೋಂಕು ನಿಯಂತ್ರಣ ಕರ್ತವ್ಯಕ್ಕೆ ಹೊರಟಿದ್ದ ಆರೋಗ್ಯ ಸಿಬ್ಬಂದಿಯ ದ್ವಿಚಕ್ರ ವಾಹನ ಅಪಘಾತವಾಗಿ ಓರ್ವ ಮಹಿಳಾ ಸಿಬ್ಬಂದಿ ಗಂಭೀರವಾಗಿ ಗಾಯಗೊಂಡ ಘಟನೆ ಶುಕ್ರವಾರ ಬೆಳಿಗ್ಗೆ ನಡೆದಿದೆ.

ಜಿಲ್ಲೆಯ ಶಹಾಬಾದ್ ಪಟ್ಟಣದ ರಾವೂರ್ ಕ್ರಾಸ್ ಹತ್ತಿರ ಈ ಘಟನೆ ಜರುಗಿದೆ. ಸ್ಟಾಫ್ ನರ್ಸ್ ರಾಜಕುಮಾರಿ ತಲೆಗೆ ಬಲವಾದ ಪೆಟ್ಟು ಬಿದ್ದಿದ್ದು, ನಗರದ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ.

ರಾಜಕುಮಾರಿ ಮತ್ತು ರೇಣುಕಾ ಎಂಬುವವರು ಕಲಬುರಗಿ ನಗರದಿಂದ ಹೊಂಡಾ ಆ್ಯಕ್ಟೀವಾದಲ್ಲಿ ಚಿತ್ತಾಪುರ ಸರ್ಕಾರಿ ಆಸ್ಪತ್ರೆ ಹೊರಟಿದ್ದರು‌. ಈ ವೇಳೆ ಆ್ಯಕ್ವೀವಾದ ಹಿಂಬದಿ ಚಕ್ರ ಕಳಚಿ ಬಿದ್ದಿದೆ. ಇದರಿಂದ ಇಬ್ಬರೂ ನೆಲಕ್ಕೆ ಬಿದ್ದಿದ್ದಾರೆ‌.

ಚಾಲನೆ ಮಾಡುತ್ತಿದ್ದ ರೇಣುಕಾ ಹೆಲ್ಮಟ್ ಧರಿಸಿದ್ದರಿಂದ ಅವರಿಗೆ ಯಾವುದೇ ಗಂಭೀರ ಗಾಯಗಳು ಆಗಿಲ್ಲ. ಹಿಂಬದಿ ಕುಳಿತಿದ್ದ ರಾಜಕುಮಾರಿ ತಲೆಗೆ ಪೆಟ್ಟು ಬಿದ್ದು ರಕ್ತ ಸ್ರಾವ ಆಗಿದೆ.