ಕೋವಿಡ್ ಲಾಕ್ ಡೌನ್ ಸಡಿಲಿಕೆ: ಇಟಲಿಯಲ್ಲಿ ಜೂನ್ 3ರಿಂದ ವಿದೇಶ ಪ್ರಯಾಣಕ್ಕೆ ಅನುಮತಿ

Team Udayavani, May 16, 2020, 12:43 PM IST

Representative Image

ರೋಮ್(ಇಟಲಿ):ಕೋವಿಡ್ 19 ವೈರಸ್ ನಿಂದ ತತ್ತರಿಸಿ ಹೋಗಿದ್ದ ಇಟಲಿ ಜೂನ್ 3ರಿಂದ ವಿದೇಶ ಪ್ರಯಾಣಕ್ಕೆ ಅನುಮತಿ ನೀಡುವುದಾಗಿ ತಿಳಿಸಿದೆ. ಈ ಹಿನ್ನೆಲೆಯಲ್ಲಿ ವಿದೇಶದಿಂದ ಇಟಲಿಗೆ ಬರುವವರು ಹಾಗೂ ವಿದೇಶಕ್ಕೆ ಪ್ರಯಾಣಿಸುವವರಿಗೆ ಅನುಮತಿ ನೀಡುವುದಾಗಿ ಹೇಳಿದೆ.

ಜೂನ್ 3ರಿಂದ ದೇಶಾದ್ಯಂತ ಮುಕ್ತವಾಗಿ ಓಡಾಟ ನಡೆಸಬಹುದು. ಆದರೆ ಕೆಲವು ಪ್ರದೇಶಗಳಲ್ಲಿ ನಿರ್ಬಂಧ ಮುಂದುವರಿಯಲಿದೆ. ಆದರೆ ಪ್ರಧಾನಿ ಗ್ಯುಸೆಪ್ ಕಾಂಟೆ ಪ್ರಕಾರ, ಸಹಜ ಸ್ಥಿತಿಗೆ ಜನಜೀವನ ಮರಳುವ ನಿಟ್ಟಿನಲ್ಲಿ 2ನೇ ಬಾರಿ ಸೋಂಕು ಹರಡದಂತೆ ಮುಂಜಾಗ್ರತೆ ವಹಿಸಬೇಕಾಗಿದೆ ಎಂದು ತಿಳಿಸಿದ್ದಾರೆ.

ಕಳೆದ ಫೆಬ್ರುವರಿ 21ರಿಂದ ಕೋವಿಡ್ 19 ಸೋಂಕು ಆರಂಭವಾಗಿತ್ತು. ಇಟಲಿಯಲ್ಲಿ ಈವರೆಗೆ 31,600ಕ್ಕೂ ಅಧಿಕ ಮಂದಿ ಸಾವನ್ನಪ್ಪಿದ್ದರು. ಕೋವಿಡ್ 19 ಅಮೆರಿಕ ಮತ್ತು ಬ್ರಿಟನ್ ನಲ್ಲಿ ಅತೀ ಹೆಚ್ಚು ಮಂದಿ ಸಾವನ್ನಪ್ಪಿದ್ದು, 3ನೇ ಸ್ಥಾನ ಇಟಲಿಯದ್ದಾಗಿತ್ತು.

ಕೋವಿಡ್ 19 ವೈರಸ್ ತಡೆಗಟ್ಟುವ ನಿಟ್ಟಿನಲ್ಲಿ ಮಾರ್ಚ್ ನಲ್ಲಿ ದೇಶಾದ್ಯಂತ ಲಾಕ್ ಡೌನ್ ಜಾರಿಗೊಳಿಸಿದ್ದ ಮೊದಲ ಯುರೋಪಿಯನ್ ದೇಶ ಇಟಲಿಯಾಗಿತ್ತು. ಮೇ 4ರ ನಂತರ ಕಾರ್ಖಾನೆ ಹಾಗೂ ಪಾರ್ಕ್ಸ್ ಗಳನ್ನು ತೆರೆಯಲು ಅನುಮತಿ ನೀಡಿತ್ತು.