ಕೋಳಿ ಮಾಂಸದ ಕೊರತೆ; ಬೆಲೆಯಲ್ಲಿ ಭಾರೀ ಹೆಚ್ಚಳ

Team Udayavani, May 18, 2020, 6:05 AM IST

ಸಾಂದರ್ಭಿಕ ಚಿತ್ರ.

ಮಂಗಳೂರು: ದಕ್ಷಿಣ ಕನ್ನಡ, ಉಡುಪಿ ಜಿಲ್ಲೆ ಗಳಿಗೆ 15 ದಿನಗಳಿಂದ ಕೋಳಿಗಳ ಪೂರೈಕೆಯಲ್ಲಿ ಭಾರೀ ಇಳಿಕೆ ಯಾಗಿದ್ದು, ಮಾಂಸದ ಬೆಲೆ ಒಂದೇ ಸಮನೆ ಏರುತ್ತಿದೆ.
ಕೋಳಿ ಆಹಾರ (ಫೀಡ್‌)ದ ತೀವ್ರಅಭಾವ, ಸೆಕೆಯಿಂದಾಗಿ ಫಾರಂಗಳಲ್ಲಿ ಕೋಳಿ ಸಾಕಣೆ ಮಾಡದಿರುವ ಪರಿಣಾಮ ಪೂರೈಕೆ ಕಡಿಮೆಯಾಗಿದೆ ಎಂದು ಮಾರಾಟಗಾರರು ತಿಳಿಸಿದ್ದಾರೆ.

175 ರೂ. ದಾಟಿದ ಬೆಲೆ
ಕೋಳಿ ಮಾಂಸದ ಬೆಲೆ ಪ್ರದೇಶದಿಂದ ಪ್ರದೇಶಕ್ಕೆ ಭಿನ್ನವಾಗಿ ರುತ್ತದೆ. ಕಳೆದ ತಿಂಗಳು ಕೆಜಿಗೆ 70 ರೂ. ಇದ್ದ ಬೆಲೆ 15 ದಿನಗಳಲ್ಲಿ 100 ರೂ. ದಾಟಿತು. ಕಳೆದ ವಾರ 130 ರೂ.ಗಳ ಲ್ಲಿದ್ದರೆ, ಕಳೆದೆರಡು ದಿನಗಳಿಂದ 160 ರೂ.ಗೆ ತಲುಪಿದೆ. ಮೇ 15ರ ವೇಳೆಗೆ ಕೆಜಿಯೊಂದಕ್ಕೆ 175ರಿಂದ 190 ರೂ.ಗೇರಿದೆ.

ಕೋಳಿ ಆಹಾರಕ್ಕೆ (ಫೀಡ್‌) ಬಳಸುವ ಕಚ್ಚಾ ವಸ್ತುಗಳನ್ನು ಬೇರೆ ರಾಜ್ಯಗಳಿಂದ ತರಿಸಲಾಗುತ್ತದೆ. ಲಾಕ್‌ಡೌನ್‌ನಿಂದಾಗಿ 2 ತಿಂಗಳಿನಿಂದ ಬಾರದ ಕಾರಣ ಫೀಡ್‌ ಕೊರತೆಯಾಗಿದೆ.

ತಾಪ ತಾಳಲಾರದೆ ಸಾವು
ಎಪ್ರಿಲ್‌, ಮೇ ತಿಂಗಳುಯಲ್ಲಿ ಕೋಳಿ ಮರಿ, ಕೋಳಿಗಳ ಸಾವಿನ ಪ್ರಮಾಣ ಹೆಚ್ಚು. ಈ ಬಾರಿ ವಿಪರೀತ ಸೆಕೆಯಿಂದಾಗಿ ಸಾವಿನ ಸಂಖ್ಯೆ ಮತ್ತೂ ಹೆಚ್ಚಿದೆ. ಕೆಲವೆಡೆ ನೀರಿನ ಕೊರತೆಯೂ ಇದೆ ಎನ್ನುತ್ತಾರೆ ಕೋಳಿ ಮಾರಾಟಗಾರರು.