ಸೋಂಕು ನಿವಾರಕದಿಂದ ಲಾಭಕ್ಕಿಂತ ಹಾನಿಯೇ ಹೆಚ್ಚು

Team Udayavani, May 18, 2020, 5:00 PM IST

ವಿಶ್ವಸಂಸ್ಥೆ: ಕೋವಿಡ್‌ ವೈರಾಣುವನ್ನು ಕೊಲ್ಲುವುದಕ್ಕೆ ಸೋಂಕು ನಿವಾರಕ ಔಷಧವನ್ನು ಹೊರ ವಾತಾವರಣದಲ್ಲಿ ಸಿಂಪಡಿಸುವುದು ಹೆಚ್ಚು ಹಾನಿಕಾರಕವಾಗಬಲ್ಲುದು ಎಂದು ವಿಶ್ವ ಆರೋಗ್ಯ ಸಂಸ್ಥೆ(ಡಬ್ಲ್ಯುಎಚ್‌ಒ) ಎಚ್ಚರಿಸಿದೆ.

ರಸ್ತೆಗಳು ಹಾಗೂ ಪಾದಚಾರಿ ಹಾದಿಗಳನ್ನು ಸೋಂಕಿನ ತಾಣಗಳೆಂದು ಪರಿಗಣಿಸಲಾಗದು. ಕೆಲ ದೇಶಗಳಲ್ಲಿ ಹೊರಗಡೆ ಸೋಂಕು ನಿವಾರಕ ಔಷಧವನ್ನು ಸಿಂಪಡಿಸುವುದು ಕಂಡುಬರುತ್ತಿದೆ. ಇದು ಮಾನವನ ಆರೋಗ್ಯಕ್ಕೆ ಅಪಾಯವುಂಟುಮಾಡಬಲ್ಲುದು ಎಂದು WHO ಹೇಳಿದೆ. ಕೋವಿಡ್‌ 19 ವೈರಾಣು ಅಥವಾ ಇತರ ಸೂಕ್ಷ್ಮಜೀವಿಗಳನ್ನು ಕೊಲ್ಲುವುದಕ್ಕೆ ರಸ್ತೆಗಳು ಅಥವಾ ಮಾರುಕಟ್ಟೆ ಪ್ರದೇಶಗಳಂಥ ಹೊರ ವಾತಾವರಣದಲ್ಲಿ ಸೋಂಕು ನಿವಾರಕಗಳ ಸಿಂಪಡಣೆ ಅಥವಾ ಹೊಗೆಯನ್ನು ಹೊಮ್ಮಿಸುವುದಕ್ಕೆ ಶಿಫಾರಸು ಮಾಡಲಾಗುವುದಿಲ್ಲ, ಯಾಕೆಂದರೆ ಸೋಂಕು ನಿವಾರಕಗಳು ಕಸಕಡ್ಡಿ ಹಾಗೂ ಕೆಸರಿನಿಂದಾಗಿ ನಿಷ್ಫಲವಾಗುತ್ತವೆ. ಇದರಿಂದ ಲಾಭಕ್ಕಿಂತ ಮನುಷ್ಯರ ಮೇಲಾಗುವ ಹಾನಿಯೇ ಹೆಚ್ಚು ಎಂದು ವಿಶ್ವ ಆರೋಗ್ಯ ಸಂಸ್ಥೆ ತಿಳಿಸಿದೆ.

ಯಾವುದೇ ಸನ್ನಿವೇಶದಲ್ಲೂ ವ್ಯಕ್ತಿಗಳ ಮೇಲೆ ಸೋಂಕು ನಿವಾರಕಗಳನ್ನು ಸಿಂಪಡಿಸುವುದನ್ನು ಶಿಫಾರಸು ಮಾಡಲು ಸಾಧ್ಯವೇ ಇಲ್ಲ. ಇದು ದೈಹಿಕ ಹಾಗೂ ಮಾನಸಿಕ ಹಾನಿಯುಂಟುಮಾಡಬಲ್ಲುದು. ಅಲ್ಲದೆ ಇದರಿಂದಾಗಿ ಸೋಂಕು ಪೀಡಿತ ವ್ಯಕ್ತಿ ತನ್ನ ಉಸಿರಿನ ಹನಿ ಅಥವಾ ಸ್ಪರ್ಶ ಮೂಲಕ ವೈರಾಣುವನ್ನು ಹಬ್ಬಿಸುವ ಸಾಮರ್ಥ್ಯಕ್ಕೆ ಕುಂದು ಉಂಟಾಗದು ಎಂದು ಟಿಪ್ಪಣಿಯಲ್ಲಿ ಹೇಳಲಾಗಿದೆ.

ಕ್ಲೋರಿನ್‌ ಅಥವಾ ಇತರ ವಿಷಕಾರಿ ರಾಸಾಯನಿಕಗಳನ್ನು ಜನರ ಮೇಲೆ ಸಿಂಪಡಿಸುವುದರಿಂದ ಕಣ್ಣು ಹಾಗೂ ಚರ್ಮದ ತುರಿಕೆ, ಅಸ್ತಮಾ ಹಾಗೂ ಕರುಳಿನ ಸಮಸ್ಯೆಗಳು ತಲೆದೋರಬಹುದು ಎಂದು WHO ತಿಳಿಸಿದೆ.

ಒಳಾಂಗಣ ಪ್ರದೇಶಗಳ ಮೇಲ್ಮೈಗೆ ಸೋಂಕು ನಿವಾರಕಗಳ ವ್ಯವಸ್ಥಿತ ಸಿಂಪಡಣೆ ಮತ್ತು ಹೊಗೆ ಹೊಮ್ಮಿಸುವುದರ ಕುರಿತಾಗಿಯೂ ಎಚ್ಚರಿಸಿರುವ WHO, ನೇರ ಸಿಂಪಡಣೆ ಪ್ರದೇಶಗಳ ಹೊರಗಡೆ ಅವು ಪರಿಣಾಮರಹಿತವೆಂದು ಅಧ್ಯಯನವೊಂದು ತೋರಿಸಿರುವುದಾಗಿ ಹೇಳಿದೆ.

ಸೋಂಕು ನಿವಾರಕ ಔಷಧವನ್ನು ಬಳಸಬೇಕಿದ್ದಲ್ಲಿ ಬಟ್ಟೆಯೊಂದನ್ನು ಸೋಂಕುನಿವಾರಕದಲ್ಲಿ ಅದ್ದಿ ಅದರಿಂದ ಒರೆಸುವುದು ಒಳಿತು ಎಂದು ಅದು ತಿಳಿಸಿದೆ.

ಚೀನದಲ್ಲಿ ಕಳೆದ ಡಿಸೆಂಬರ್‌ ಅಂತ್ಯದ ವೇಳೆ ಕಾಣಿಸಿಕೊಂಡು ಜಗತ್ತಿನ ಉದ್ದಗಲಕ್ಕೂ ಹರಡಿ 3,00,000ಕ್ಕೂ ಅಧಿಕ ಜನರನ್ನು ಬಲಿ ತೆಗೆದುಕೊಂಡಿರುವ ಕೋವಿಡ್‌ ವೈರಾಣು ಮೇಲ್ಮೈಗಳು ಹಾಗೂ ವಸ್ತುಗಳ ಮೇಲೆ ಅಂಟಿಕೊಳ್ಳಬಹುದಾಗಿದೆ. ಆದರೆ ವೈರಾಣು ವಿವಿಧ ಮೇಲ್ಮೈಗಳಲ್ಲಿ ಎಷ್ಟು ಅವಧಿಗೆ ಸೋಂಕುಕಾರಕವಾಗಿ ಉಳಿಯಬಲ್ಲುದೆಂದು ಯಾವುದೇ ನಿಖರ ಮಾಹಿತಿ ಇನ್ನೂ ಇಲ್ಲವಾಗಿದೆ. ಅನೇಕ ವಿಧದ ಮೇಲ್ಮೈಗಳಲ್ಲಿ ಅದು ಅನೇಕ ದಿನಗಳ ಕಾಲ ಉಳಿಯಬಲ್ಲುದೆಂದು ಅಧ್ಯಯನಗಳು ತೋರಿಸಿವೆಯಾದರೂ ಈ ಗರಿಷ್ಠ ಅವಧಿಗಳು ಕೇವಲ ಸೈದ್ಧಾಂತಿಕವಾಗಿವೆ, ಯಾಕೆಂದರೆ ಅವು ಪ್ರಯೋಗಾಲಯ ಪರಿಸ್ಥಿತಿಯಲ್ಲಿ ದಾಖಲಾಗಿವೆ ಮತ್ತು ವಾಸ್ತವ ಜಗತ್ತಿನ ಪರಿಸರದಲ್ಲಿ ಅದನ್ನು ಎಚ್ಚರಿಕೆಯಿಂದ ವ್ಯಾಖ್ಯಾನಿಸಬೇಕಾಗಿದೆ ಎಂದು ಕೂಡ ವಿಶ್ವ ಆರೋಗ್ಯ ಸಂಸ್ಥೆ ಹೇಳಿದೆ. ಕೋವಿಡ್‌ ನಿವಾರಣೆಗಾಗಿ ಭಾರತವೂ ಸೇರಿದಂತೆ ಹಲವು ದೇಶಗಳು ಸೋಂಕುನಿವಾರಕ ಸುರಂಗಗಳು ಹಾಗೂ ಬಸ್‌ಗಳನ್ನು ನಿರ್ಮಿಸಿರುವ ಹಿನ್ನೆಲೆಯಲ್ಲಿ ಡಬ್ಲ್ಯುಎಚ್‌ಒದ ಎಚ್ಚರಿಕೆ ಮಹತ್ವ ಪಡೆಯುತ್ತದೆ.