ಗುಣಮಟ್ಟದ ಬಿತ್ತನೆ ಬೀಜ ವಿತರಣೆಗೆ ಬಂಡಿ ಸೂಚನೆ

Team Udayavani, May 19, 2020, 5:38 AM IST

ಗಜೇಂದ್ರಗಡ: ಮುಂಗಾರು ಹಂಗಾಮಿಗೆ ರೈತರಿಗೆ ಗುಣಮಟ್ಟದ ಬಿತ್ತನೆ ಬೀಜ ವಿತರಣೆಗೆ ಅಧಿಕಾರಿಗಳು ಕ್ರಮ ಕೈಗೊಳ್ಳಬೇಕು ಎಂದು ಶಾಸಕ ಕಳಕಪ್ಪ ಬಂಡಿ ಸೂಚಿಸಿದರು.

ಪಟ್ಟಣದ ಕೃಷಿ ಉತ್ಪನ್ನ ಮಾರುಕಟ್ಟೆ ಆವರಣದಲ್ಲಿರುವ ರೈತ ಸಂಪರ್ಕ ಕೇಂದ್ರದಲ್ಲಿ ಬಿತ್ತನೆ ಬೀಜ ವಿತರಣೆಗೆ ಚಾಲನೆ ನೀಡಿ ಅವರು ಮಾತನಾಡಿದರು. ಈ ಬಾರಿ ಮುಂಗಾರು ಮಳೆ ಉತ್ತಮವಾಗಿ ಸುರಿಯುವ ಆಶಾಭಾವನೆ ರೈತರಲ್ಲಿದೆ. ಗಜೇಂದ್ರಗಡ ಮತ್ತು ರೋಣ ತಾಲೂಕಿನಲ್ಲಿ 5 ಬೀಜ ವಿತರಣಾ ಕೇಂದ್ರಗಳಲ್ಲಿ ರಿಯಾಯಿತಿ ದರದಲ್ಲಿ ಬಿತ್ತನೆ ಬೀಜ ವಿತರಿಸಲಾಗುತ್ತದೆ. ರೈತರು ಇದರ ಪ್ರಯೋಜನ ಪಡೆಯಬೇಕು ಎಂದರು.

ತಾಲೂಕು ಸಹಾಯಕ ಕೃಷಿ ನಿರ್ದೇಶಕ ರವೀಂದ್ರ ಪಾಟೀಲ ಮಾತನಾಡಿ, ಗಜೇಂದ್ರಗಡ ರೈತ ಸಂಪರ್ಕ ಕೇಂದ್ರದಲ್ಲಿ ಸದ್ಯ 25 ಸಾವಿರ ಕ್ವಿಂಟಲ್‌ ಹೆಸರು, 4 ಕ್ವಿಂಟಲ್‌ ಹೈಬ್ರಿಡ್‌ ಜೋಳ ಬೀಜಗಳು ಬಂದಿದ್ದು, ಉಳಿದ ಬಿತ್ತನೆ ಬೀಜ ಶೀಘ್ರ ಬರಲಿವೆ ಎಂದರು. ತಾಪಂ ಸದಸ್ಯ ಶಶಿಧರ ಹೂಗಾರ, ಎಪಿಎಂಸಿ ನಾಮನಿರ್ದೇಶಿತ ಸದಸ್ಯ ಮುದಿಯಪ್ಪ ಕರಡಿ, ನರೇಗಲ್ಲ ಕೃಷಿ ಅಧಿಕಾರಿ ಜಗದೀಶ ಹಾದಿಮನಿ, ಸಹಾಯಕ ಕೃಷಿ ಅ ಧಿಕಾರಿ ಸಿ.ಕೆ. ಕಮ್ಮಾರ ಇತರರು ಇದ್ದರು.

ಕಳಪೆ ಬೀಜ; ರೈತನ ಆಕ್ಷೇಪ: ಶಾಸಕ ಕಳಕಪ್ಪ ಬಂಡಿ ಅವರು ಬಿತ್ತನೆ ಬೀಜ ವಿತರಿಸಿ ನಿರ್ಗಮಿಸುತ್ತಿದ್ದಂತೆ ರೈತರೊಬ್ಬರು ಹೆಸರು ಬಿತ್ತನೆ ಬೀಜಗಳಲ್ಲಿ ಬಹುತೇಕ ಕಪ್ಪು ಕಾಳುಗಳಿದ್ದು, ಕಳಪೆಯಾಗಿವೆ. ಇದರಿಂದ ಇಳುವರಿ ಕುಂಠಿತವಾಗಲಿವೆ ಎಂದು ದೂರಿದರು. ಪಕ್ಕದಲ್ಲೇ ಇದ್ದ ಅಧಿಕಾರಿಯನ್ನು ಈ ಬಗ್ಗೆ ಶಾಸಕರು ಕೇಳಿದಾಗ, ಅಧಿಕಾರಿಗಳು ಬಿತ್ತನೆ ಬೀಜಗಳನ್ನು ಪರಿಷ್ಕರಿಸಲಾಗಿದ್ದು, ಗುಣಮಟ್ಟದ್ದಾಗಿವೆ. ಇಳುವರಿ ಕುಂಠಿತವಾಗುವುದಿಲ್ಲ ಎಂದು ಸ್ಪಷ್ಟನೆ ನೀಡಿದರು.