25 ಕೆಜಿ ತೂಕದ ಗೆಣಸು ಬೆಳೆದ ವ್ಯಂಗ್ಯಚಿತ್ರಕಾರ!

Team Udayavani, May 20, 2020, 1:46 PM IST

ಶಿವಮೊಗ್ಗ: ತಾಲೂಕಿನ ಗಾಜನೂರಿನಲ್ಲಿ ಕೃಷಿಕ ಕಮ್‌ ವ್ಯಂಗ್ಯಚಿತ್ರಕಾರರೊಬ್ಬರು ತಮ್ಮ ಮನೆಯ ಹಿತ್ತಲಲ್ಲಿ ಬರೋಬ್ಬರಿ 25 ಕಿಲೊ ಗ್ರಾಮ್‌ ತೂಕದ ಬೃಹತ್‌ ಗಾತ್ರದ ಗೆಣಸೊಂದನ್ನು ಬೆಳೆದು ಅಚ್ಚರಿ ಮೂಡಿಸಿದ್ದಾರೆ.

ಉತ್ತರ ಕನ್ನಡ ಜಿಲ್ಲೆಯ ಯಲ್ಲಾಪುರದ ಹಲ್ಸಖಂಡ ರಾಮಚಂದ್ರ ಭಟ್‌ ಅವರ ಮಗ ನಾಗೇಂದ್ರ ಯಲ್ಲಾಪುರ ಅವರೇ ಈ ಗೆಣಸು ಬಳೆದು ಅಚ್ಚರಿ ಮೂಡಿಸಿ ಮಹನೀಯರು. ಅವರ ತಂದೆಯವರ ಕಾಲದಲ್ಲಿ ಬೆಳೆಯುತ್ತ ಬಂದಿದ್ದ ಗೆಣಸನ್ನು ಪ್ರತಿವರ್ಷ ಬೆಳೆಸುವ ಕಾಯಕವನ್ನು ಮುಂದುವರೆಸಿದ್ದಾರೆ.

ಇದರ ಮೂಲ ಕೇರಳ, ಮಿತ್ರರೊಬ್ಬರು ತಂದೆ ಯವರಿಗೆ ಕೊಟ್ಟಿದ್ದರು. ನೇಗಿಲು ಗೆಣಸೆಂದು ಕರೆಯುವುದು ವಾಡಿಕೆ. ಕಾರಣ ರೈತರ ನೇಗಿಲಿನಾಕಾರದಲ್ಲಿ ಬೆಳೆಯುವುದರಿಂದ ನೇಗಿಲು ಗೆಣಸೆಂದು ಅನ್ವಥಕ ನಾಮವಾಯಿತು ಎಂದು ಅವರು ವಿವರಿಸುತ್ತಾರೆ. ಬರೋಬ್ಬರಿ ಒಂದೇ ಬುಡದಲ್ಲಿ ಏನಿಲ್ಲವೆಂದರೂ 15 ರಿಂದ 35 ಕೆ.ಜಿ ಗ್ಯಾರಂಟಿ. 6 ತಿಂಗಳ ಬೆಳೆ. 6 ಇಂಚಿನಷ್ಟು ಗಾತ್ರದ ತುಂಡು ನೆಟ್ಟರಾಯ್ತು, ಬೇಲಿಯ ಬದಿಯಲ್ಲಿ, ಮರದ ಬುಡದಲ್ಲಿ, ಎಲ್ಲಾದರೂ ಗುಂಡಿ ಇರುವಲ್ಲಿ ನೆಟ್ಟರಾಯ್ತು. ತನ್ನಿಂದ ತಾನೇ ಬೆಳೆದು ಮರದ ಸುತ್ತಲೂ ಆವರಿಸಿ ತಳ್ಳುತ್ತದೆ. ಬುಡದಲ್ಲಿ ಗಡ್ಡೆಗಳು ಬಳ್ಳಿಯಲ್ಲಿಯೂ ಸಣ್ಣ ಸಣ್ಣ ಮರಿಗೆಣಸುಗಳು, ಅಬ್ಟಾ ನೋಡಲು ಸುಂದರ ತಿನ್ನಲು ರುಚಿ ಎನ್ನುತ್ತಾರೆ ಅವರು.