ನಿರೀಕ್ಷೆ ಹುಸಿಮಾಡಿದ ಆಕ್ಸ್‌ಫ‌ರ್ಡ್‌ ಲಸಿಕೆ ಪ್ರಯೋಗ

Team Udayavani, May 22, 2020, 1:44 AM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ಲಂಡನ್‌: ಕೋವಿಡ್ ಲಸಿಕೆ ಸಂಶೋಧನೆಯಲ್ಲಿ ಭಾರಿ ನಿರೀಕ್ಷೆ ಹುಟ್ಟಿಸಿದ್ದ ಆಕ್ಸ್‌ ಫ‌ರ್ಡ್‌ ಮುಗ್ಗರಿಸಿದೆ.

ಕೋತಿಗಳ ಮೇಲೆ ಲಸಿಕೆ ಪ್ರಯೋಗಿಸಿದ್ದ ಆಕ್ಸ್‌ಫ‌ರ್ಡ್‌ನ ತಜ್ಞರು, ನಿರೀಕ್ಷಿತ ಫ‌ಲಿತಾಂಶ ಸಿಗದೆ ನಿರಾಶೆ ಅನುಭವಿಸಿದ್ದಾರೆ.

‘ಭಾರತ ಮೂಲದ 6 ರೀಸಸ್‌ ಮಕಾಕ್‌ಗಳ ಮೇಲೆ ಪ್ರಯೋಗಿಸಿದ್ದ ಲಸಿಕೆ ಯಾವುದೇ ಪರಿಣಾಮ ಬೀರುತ್ತಿಲ್ಲ. ನಾವು ಹೊಸ ಮಾರ್ಗಗಳನ್ನು ಕಂಡುಕೊಳ್ಳಬೇಕಿದೆ’ ಎಂದು ಇಂಗ್ಲೆಂಡ್‌ ಪ್ರಧಾನಿ ಬೋರಿಸ್‌ ಜಾನ್ಸನ್‌ ಸ್ಪಷ್ಟಪಡಿಸಿದ್ದಾರೆ.

‘ಮಾಡರ್ನ್’ ಯಶಸ್ಸು: ಇನ್ನೊಂದೆಡೆ, ಅಮೆರಿಕದ ಬಯೋಟೆಕ್ನಾಲಜಿ ಸಂಸ್ಥೆ ಮಾಡರ್ನ್ ಇಂಕ್‌ನ ಲಸಿಕೆ ಸಫ‌ಲತೆ ಕಾಣುತ್ತಿದೆ. 8 ಸೋಂಕಿತರ ಮೇಲೆ ಪ್ರಯೋಗ ನಡೆದಿದ್ದು, ದೈಹಿಕ ಪರಿಣಾಮಗಳ ಬಗ್ಗೆ ಅಧ್ಯಯನ ಸಾಗಿದೆ. ಕೆಲವರಲ್ಲಿ ನೋವು, ಇಂಜೆಕ್ಷನ್‌ ಚುಚ್ಚಿದ ಜಾಗ ಕೆಂಪಾಗಿರುವುದು, ಜ್ವರ ಇತ್ಯಾದಿ ಅಡ್ಡ ಪರಿಣಾಮಗಳು ಕಂಡುಬಂದಿದ್ದು, ಇದು ಲಸಿಕೆಯ ಸಫ‌ಲತೆಯನ್ನು ಸೂಚಿಸುತ್ತವೆ ಎನ್ನಲಾಗುತ್ತಿದೆ.

ಥಾಯ್‌ ಪ್ರವೇಶ: ಇನ್ನೊಂದೆಡೆ ಥಾಯ್ಲೆಂಡ್‌ ಕೂಡ ಲಸಿಕೆ ಓಟಕ್ಕೆ ಜಿಗಿದಿದ್ದು, ಇಲಿಗಳ ಮೇಲಿನ ಪ್ರಯೋಗಕ್ಕೆ ಆರಂಭಿಕ ಯಶಸ್ಸು ಸಿಕ್ಕಿದೆ. ಥಾಯ್‌ ರಾಷ್ಟ್ರೀಯ ಲಸಿಕಾ ಸಂಸ್ಥೆ ಶೀಘ್ರವೇ ಕೋತಿಗಳ ಮೇಲೆ ಪ್ರಯೋಗ ಮುಂದುವರಿಸಲಿದೆ.

ಅಮೆರಿಕ- ಜರ್ಮನಿ ಜಂಟಿ: ಅಮೆರಿಕ ಮೂಲದ ಫಿಫೈಜರ್‌, ಜರ್ಮನಿಯ ಬಿಎನ್‌ಟೆಕ್‌ ಸಂಸ್ಥೆಯ ಜತೆಗೂಡಿ ನಡೆಸುತ್ತಿರುವ ಸಂಶೋಧನೆ, ಮಾನವ ಪ್ರಯೋಗಕ್ಕೆ ಸಜ್ಜಾಗಿದ್ದು, 160 ಮಂದಿ ಪರೀಕ್ಷೆಗೊಳಪಡಲಿದ್ದಾರೆ. ಈಗಾಗಲೇ ಪ್ರಪಂಚದಲ್ಲಿ 100ಕ್ಕೂ ಅಧಿಕ ಸಂಶೋಧನೆಗಳು ಚಾಲ್ತಿಯಲ್ಲಿವೆ.