ಚೆಂಡಿಗೆ ಉಗುಳು ನಿಷೇಧ ಕೇವಲ ತಾತ್ಕಾಲಿಕ ಕ್ರಮ: ಅನಿಲ್‌ ಕುಂಬ್ಳೆ

Team Udayavani, May 25, 2020, 5:45 AM IST

ಹೊಸದಿಲ್ಲಿ: ಕ್ರಿಕೆಟ್‌ ಪಂದ್ಯಗಳ ವೇಳೆ ಚೆಂಡಿಗೆ ಹೊಳಪು ಮೂಡಿಸಲು ಉಗುಳು ಹಚ್ಚುವುದನ್ನು ನಿಷೇಧಿಸುವುದು ಕೇವಲ ತಾತ್ಕಾಲಿಕ ಕ್ರಮವಾಗಿದ್ದು, ಕೋವಿಡ್‌-19 ಸಂಪೂರ್ಣ ನಿಯಂತ್ರಣಕ್ಕೆ ಬಂದ ಬಳಿಕ ಪರಿಸ್ಥಿತಿ ಸಹಜಗೊಳ್ಳಲಿದೆ ಎಂದು ಐಸಿಸಿ ಕ್ರಿಕೆಟ್‌ ಕಮಿಟಿಯ ಅಧ್ಯಕ್ಷ ಅನಿಲ್‌ ಕುಂಬ್ಳೆ ಹೇಳಿದ್ದಾರೆ.

ಎಂಜಲಿನಿಂದಲೂ ಕೋವಿಡ್‌-19 ಹಬ್ಬುವ ಸಾಧ್ಯತೆ ಇರುವುದರಿಂದ ಚೆಂಡಿಗೆ ಉಗುಳು ಹಚ್ಚುವುದನ್ನು ನಿಷೇಧಿಸಬೇಕೆಂದು ಕಳೆದ ಐಸಿಸಿ ಕಮಿಟಿ ಸಭೆಯಲ್ಲಿ ನಿರ್ಧಾರಕ್ಕೆ ಬರಲಾಗಿತ್ತು. ಇದಕ್ಕೆ ಮಿಶ್ರ ಪ್ರತಿಕ್ರಿಯೆಗಳು ಬಂದಿದ್ದವು.

“ಇದು ಕೇವಲ ತಾತ್ಕಾಲಿಕ ಕ್ರಮ. ಇನ್ನು ಕೆಲವು ತಿಂಗಳಲ್ಲೋ, ವರ್ಷದ ಬಳಿಕವೋ ಕೋವಿಡ್‌-19 ನಿರ್ಮೂಲನೆಗೊಂಡ ಬಳಿಕ ಮತ್ತೆ ಈ ವಿಧಾನ ಮುಂದುವರಿಯಬಹುದು’ ಎಂದು “ಕ್ರಿಕೆಟ್‌ ಕನೆಕ್ಟೆಡ್‌’ ಕಾರ್ಯಕ್ರಮದಲ್ಲಿ ಅನಿಲ್‌ ಕುಂಬ್ಳೆ ಹೇಳಿದರು.

ಉಗುಳಿಗೆ ಪರ್ಯಾಯ ಏನು?
ಉಗುಳಿಗೆ ಪರ್ಯಾಯವಾಗಿ ವ್ಯಾಕ್ಸ್‌ ಅಥವಾ ಇತರ ಪದಾರ್ಥಗಳನ್ನು ಬಳಸಲು ಐಸಿಸಿ ಸೂಚಿಸಬಹುದೇ ಎಂಬ ಪ್ರಶ್ನೆಯೂ ಈ ಸಂದರ್ಭದಲ್ಲಿ ತೂರಿ ಬಂತು. ಇದಕ್ಕೆ ಪ್ರತಿಕ್ರಿಯಿಸಿದ ಅನಿಲ್‌ ಕುಂಬ್ಳೆ, “ಈ ಬಗ್ಗೆ ಚರ್ಚೆ ನಡೆಯಬಹುದು. ಆದರೆ ಕ್ರಿಕೆಟ್‌ ಇತಿಹಾಸವನ್ನು ಗಮನಿಸಿದರೆ ಚೆಂಡಿಗೆ ಯಾವುದೇ ಹೊರಗಿನ ಪದಾರ್ಥವನ್ನು ಹಚ್ಚಲು ನಿಷೇಧವಿದೆ. ಆಗ ಇದರಿಂದ ಬಾಲ್‌ ಟ್ಯಾಂಪರಿಂಗ್‌ನಂಥ ವಿವಾದಗಳು ಹುಟ್ಟಿಕೊಳ್ಳಬಹುದು…’ ಎಂಬುದಾಗಿ ಹೇಳಿದರು.