ಬೆಂಗಳೂರು ನಗರ-ಕಾರವಾರ ರೈಲು ಸಂಚಾರಕ್ಕೆ ನಳಿನ್‌ ಮನವಿ

Team Udayavani, Jun 8, 2020, 12:18 PM IST

ಮಂಗಳೂರು: ರದ್ದುಪಡಿಸಿರುವ ಬೆಂಗಳೂರು ನಗರ-ಕಾರವಾರ ವಯಾ ಮೈಸೂರು (ರೈಲು .16523/24)ರೈಲು ಸಂಚಾರವನ್ನು ಮರು ಆರಂಭಿಸಬೇಕು ಹಾಗೂ ಯಶವಂತಪುರ-ಮಂಗಳೂರು ಸೆಂಟ್ರಲ್‌ ಎಕ್ಸ್‌ಪ್ರೆಸ್‌ (ನಂ. 16585)ನ ವೇಳಾಪಟ್ಟಿಯನ್ನು ಮರು ಪರಿಷ್ಕರಿಸಬೇಕು ಎಂದು ಸಂಸದ ಹಾಗೂ ರಾಜ್ಯ ಬಿಜೆಪಿ ಅಧ್ಯಕ್ಷ ನಳಿನ್‌ ಕುಮಾರ್‌ ಕಟೀಲು ಅವರು ನೈಋತ್ವ ರೈಲ್ವೇಯ ಮಹಾಪ್ರಬಂಧಕರನ್ನು ಕೋರಿದ್ದಾರೆ.

ಹೊಸದಾಗಿ ಯಶವಂತಪುರ-ಕಾರವಾರ ಎಕ್ಸ್‌ಪ್ರೆಸ್‌ಆರಂಭಗೊಂಡ ಬಳಿಕ ಬೆಂಗಳೂರು ನಗರ-ಕಾರವಾರ ವಯಾ ಮೈಸೂರು (ನಂ. 16523/24) ರೈಲು ಸಂಚಾರವನ್ನು ರದ್ದುಪಡಿಸಲಾಗಿತ್ತು. ಇದು ಮೈಸೂರು ಭಾಗವನ್ನು ಸಂಪರ್ಕಿಸಲು ಉಡುಪಿ, ಕಾರವಾರ ಭಾಗದ ಜನರಿಗೆ ಏಕಮಾತ್ರ ರೈಲು ಆಗಿತ್ತು. ಇದಲ್ಲದೆ ಮಂಗಳೂರು ಸೆಂಟ್ರಲ್‌ ಹಾಗೂ ಕಾರವಾರದ ಭಾಗ ಪ್ರಯಾಣಿಕರಿಗೂ ಉಪಯುಕ್ತವಾಗಿತ್ತು. ಈ ಹಿನ್ನಲೆಯಲ್ಲಿ ರದ್ದುಗೊಳಿಸಿರುವ ಅದನ್ನು ಮರು ಆರಂಭಿಸಬೇಕು ಎಂಬುದು ಈ ವಲಯದ ಜನರ ಬೇಡಿಕೆಯಾಗಿದೆ ಎಂದವರು ಮಹಾಪ್ರಬಂಧಕರಿಗೆ ಬರೆದಿರುವ ಪತ್ರದಲ್ಲಿ ಗಮನ ಸೆಳೆದಿದ್ದಾರೆ.

ರೈಲು ನಂ.16523/24 ಸಂಚಾರವನ್ನು ಮಡಂಗಾವ್‌ವರೆಗೆ ವಿಸ್ತರಿಸಬಹುದು. ನಂ.16511/12 ಬೆಂಗಳೂರು- ಕಣ್ಣೂರು – ಬೆಂಗಳೂರು ಎಕ್ಸ್‌ಪ್ರೆಸ್‌ ರದ್ದುಪಡಿಸಿ ಆ ವೇಳಾ ಪಟ್ಟಿಯಲ್ಲಿ ರೈಲು ನಂ. 16585 ಯಶವಂತಪುರ- ಮಂಗಳೂರು ಸೆಂಟ್ರಲ್‌ ರೈಲನ್ನು ಓಡಿಸಬಹುದಾಗಿದೆ. ಬೆಂಗಳೂರಿನಿಂದ ರಾತ್ರಿ 7.45ಕ್ಕೆ ಹೊರಟು ಬೆಳಗ್ಗೆ 5.55ಕ್ಕೆ ವೇಳಾಪಟ್ಟಿಯನ್ನು ರೂಪಿಸಬಹುದು ಎಂದು ತಿಳಿಸಿದ್ದಾರೆ.