ವಿಜಯಪುರ ಸಾರಿಗೆ ಸಂಸ್ಥೆಯ 3 ಘಟಕಗಳಿಗೆ ರಾಷ್ಟ್ರ ಪ್ರಶಸ್ತಿ

Team Udayavani, Jun 11, 2020, 5:38 PM IST

ವಿಜಯಪುರ: ಡಿಸಿಎಂ ಲಕ್ಷ್ಮಣ ಸವದಿ ಈ.ಕ.ರ.ಸಾ. ಸಂಸ್ಥೆ ವಿಜಯಪುರ ವಿಭಾಗಕ್ಕೆ ಸಂದಿರುವ ರಾಷ್ಟ್ರೀಯ ಪ್ರಶಸ್ತಿ ಪ್ರದಾನ ಮಾಡಿದರು

ವಿಜಯಪುರ: ಈ.ಕ.ರ.ಸಾ.ಸಂಸ್ಥೆಯ ವಿಜಯಪುರ ವಿಭಾಗದ ವಿವಿಧ ಘಟಕಗಳಿಗೆ ರಾಷ್ಟ್ರ ಮಟ್ಟದ 2018-19 ನೇ ಸಾಲಿನ ವಿವಿಧ ವಿಭಾಗದಲ್ಲಿ ಮೂರು ಪ್ರಶಸ್ತಿಗಳು ಲಭಿಸಿವೆ.

ಕಲಬುರ್ಗಿಯಲ್ಲಿ ಜರುಗಿದ ಈಶಾನ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆಯ ಎಲ್ಲ ವಿಭಾಗೀಯ ನಿಯಂತ್ರಣಾಧಿಕಾರಿಗಳ ಸಭೆಯಲ್ಲಿ ಸಾರಿಗೆ ಖಾತೆ ಹೊಂದಿರುವ ಉಪ ಮುಖ್ಯಮಂತ್ರಿ ಲಕ್ಷ್ಮಣ ಸವದಿ ಅವರು ಪಿ.ಸಿ.ಆರ್‌.ಎ ಸಂಸ್ಥೆಯಿಂದ ವಿಜಯಪುರ ವಿಭಾಗದ ಮೂರು ಘಟಕಗಳಿಗೆ ರಾಷ್ಟ್ರ ಮಟ್ಟದ ಪ್ರಶಸ್ತಿ ನೀಡಿದರು. ಅತಿ ಹೆಚ್ಚು ಇಂಧನ ಉಳಿತಾಯ, ಉತ್ತಮ ಸಾಧನೆ ಹಾಗೂ ಶ್ಲಾಘನೀಯ ಸೇವೆಗೆ ಈಶಾನ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆಯ ವಿಜಯಪುರ ವಿಭಾಗದ ವಿಜಯಪುರ ಘಟಕ-2, ಬಸವನ ಬಾಗೇವಾಡಿ ಹಾಗೂ ಸಿಂದಗಿ ವಿಭಾಗಗಳಿಗೆ ರಾಷ್ಟ್ರಮಟ್ಟದ ಪಿಸಿಆರ್‌ಎ ಪ್ರಶಸ್ತಿ ಘೋಷಣೆ ಕುರಿತು ಪ್ರಕಟಿಸಲಾಯಿತು.

ವಿಜಯಪುರ ವಿಭಾಗದ ನಿಯಂತ್ರಣಾಧಿಕಾರಿ ಎಸ್‌.ಜಿ.ಗಂಗಾಧರ, ವಿಜಯಪುರ ವಿಭಾಗದ ತಾಂತ್ರಿಕ ಶಿಲ್ಪಿ ಎ.ಎಚ್‌. ಮಧಬಾವಿ ಹಾಗೂ ವಿಭಾಗಿಯ ಸಾರಿಗೆ ಅಧಿಕಾರಿ ಡಿ.ಎ.ಬಿರಾದಾರ ಅವರು ವಿಭಾಗದ ಪರವಾಗಿ ಪ್ರಶಸ್ತಿ ಹಾಗೂ ಸ್ಮರಣಿಕೆ ಸ್ವೀಕರಿಸಿದರು. ಪ್ರಶಸ್ತಿ ವಿಜೇತ ಮೂರು ಘಟಕಗಳಿಂದ ವಿಜಯಪುರ ಘಟಕ-2ರ ಘಟಕ ವ್ಯವಸ್ಥಾಪಕ ಬಿ.ಎ.ಹೂಗಾರ, ಬಸವನಬಾಗೇವಾಡಿ ಘಟಕ ವ್ಯವಸ್ಥಾಪಕ ವಿನಾಯಕ ಸಾಲಿಮಠ, ಸಿಂದಗಿ ಘಟಕದ ವ್ಯವಸ್ಥಾಪಕ ಎಸ್‌.ಎಂ.ವಾಲಿಕಾರ ಘಟಕದ ಪರವಾಗಿ ಪ್ರಶಸ್ತಿ ಹಾಗೂ ಸ್ಮರಣಿಕೆಯನ್ನು ಸ್ವೀಕರಿಸಿದರು.