ಕೋವಿಡ್-19: ಕ್ರೀಡಾ ನಿಯಮ ಸಡಿಲಿಸಿದ ಆಸ್ಟ್ರೇಲಿಯ ಪ್ರಧಾನಿ

Team Udayavani, Jun 13, 2020, 5:35 AM IST

ಕ್ಯಾನ್‌ಬೆರಾ: ದೇಶದಲ್ಲಿ ಕ್ರೀಡಾ ಚಟುವಟಿಕೆ ಪುನರಾರಂಭಗೊಳಿಸುವ ಉದ್ದೇಶದಿಂದ ಆಸ್ಟ್ರೇಲಿಯ ಪ್ರಧಾನಿ ಸ್ಕಾಟ್‌ ಮಾರಿಸ್‌ “ಕೋವಿಡ್-19 ನಿಯಮಾವಳಿ’ಯಲ್ಲಿ ಸಡಿಲಿಕೆ ಮಾಡಿದ್ದಾರೆ. ಇದರಂತೆ ಅಂತಾರಾಷ್ಟ್ರೀಯ ಪಂದ್ಯಗಳ ವೇಳೆ ಸ್ಟೇಡಿಯಂ ಸಾಮರ್ಥ್ಯದ ಶೇ. 25ರಷ್ಟು ವೀಕ್ಷಕರ ಪ್ರವೇಶಕ್ಕೆ ಅನುಮತಿ ಲಭಿಸಲಿದೆ.

ಜುಲೈ ತಿಂಗಳಿಂದ ಈ ನಿಯಮ ಜಾರಿಗೆ ಬರಲಿದೆ. ಇದರಂತೆ 40 ಸಾವಿರ ವೀಕ್ಷಕರ ಸಾಮರ್ಥ್ಯವುಳ್ಳ ಸ್ಟೇಡಿಯಂನಲ್ಲಿ 10 ಸಾವಿರ ವೀಕ್ಷಕರು ಸಾಮಾಜಿಕ ಅಂತರ ಕಾಯ್ದುಕೊಂಡು ಪಂದ್ಯವನ್ನು ವೀಕ್ಷಿಸಬಹುದಾಗಿದೆ.

ಇದರಿಂದ ವರ್ಷಾಂತ್ಯದಲ್ಲಿ ನಡೆಯುವ ಟಿ20 ವಿಶ್ವಕಪ್‌ ಪಂದ್ಯಾವಳಿಯನ್ನು ನಡೆಸುವ ಆಸ್ಟ್ರೇಲಿಯದ ಯೋಜನೆಗೆ ಹೆಚ್ಚಿನ ಬಲ ಬಂದಂತಾಗಿದೆ. ಹಾಗೆಯೇ ಕೋವಿಡ್‌-19 ಕಂಟಕದಿಂದ ತನ್ನ ದೇಶ ಬಹುತೇಕ ಪಾರಾಗಿದೆ ಎಂಬುದನ್ನು ವಿಶ್ವಕ್ಕೆ ಸಾರುವ ಆಸೀಸ್‌ ಪ್ರಧಾನಿಯ ಉದ್ದೇಶವೂ ಈಡೇರಲಿದೆ.