ರೆಮ್‌ಡೆಸಿವಿಯರ್‌ ಬಳಕೆಗೆ ಆರೋಗ್ಯ ಇಲಾಖೆ ಸಲಹೆ

Team Udayavani, Jun 14, 2020, 12:52 PM IST

ಕೋವಿಡ್ ವೈರಸ್‌ ಸೋಂಕಿನ ತೀವ್ರ ಸ್ವರೂಪದ್ದಲ್ಲದ ಸಾಧಾರಣ ಪ್ರಕರಣಗಳಿಗೆ ರೆಮ್‌ಡೆಸಿವಿಯರ್‌ ಔಷಧಿಯನ್ನು ಬಳಸುವಂತೆ ಕೇಂದ್ರ ಆರೋಗ್ಯ ಸಚಿವಾಲಯ ಶನಿವಾರ ತಿಳಿಸಿದೆ. ಈ ಮೊದಲು ಸಾಧಾರಣ ಪ್ರಕರಣಗಳಿಗೆ ಹೆ„ಡ್ರೋಕ್ಸಿಕ್ಲೋರೊಕ್ವಿನ್‌ (ಎಚ್‌ಸಿಕ್ಯು) ಅನ್ನು ಬಳಸುವಂತೆ ಸಲಹೆ ನೀಡಿದ್ದ ಸಚಿವಾಲಯ, ಈಗ ಸಾಧಾರಣ ಪ್ರಕರಣಗಳಲ್ಲಿ ರೆಮ್‌ಡೆಸಿವಿಯರ್‌ ಬಳಸಹುದು ಎಂದಿದೆ.

ಇನ್ನು ಆರಂಭಿಕ ಹಂತದ ಕೋವಿಡ್ ಸೋಂಕು ಹೊಂದಿರುವವರಿಗೆ ಎಚ್‌ಸಿಕ್ಯು ನೀಡಬಹುದು ಎಂದೂ ಹೇಳಿದೆ. ಇದೇ ವೇಳೆ ರೋಗ ನಿರೋಧಕ ವ್ಯವಸ್ಥೆಯನ್ನು ಬಲಪಡಿಸುವಲ್ಲಿ ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸುವ ಸಾಮರ್ಥ್ಯ ಹೊಂದಿರುವ ಟೋಸಿಲಿ ಜುಮ್ಯಾಬ್‌  ಔಷಧಕ್ಕೂ ಸಚಿವಾಲಯ ಅನುಮತಿ ನೀಡಿದೆ. ಐಸಿಯು ಚಿಕಿತ್ಸೆ ಅಗತ್ಯವಿರುವ ತೀವ್ರ ಸ್ವರೂಪದ ಪ್ರಕರಣ ಗಳಲ್ಲಿ ಅಜಿಥ್ರೋಮೈಸಿನ್‌ ಜೊತೆ ಎಚ್‌ಸಿಕ್ಯು ಬಳಸಬಾರದೆಂದು ಕೋವಿಡ್ ವೈರಸ್‌ ಸೋಂಕಿನ ಪರಿಷ್ಕೃತ ವೈದ್ಯಕೀಯ ನಿರ್ವಹಣೆ ಮಾರ್ಗ ಸೂಚಿಯಲ್ಲಿ ಸಚಿವಾಲಯ ಕಟ್ಟುನಿಟ್ಟಿನ ಸೂಚನೆ ನೀಡಿದೆ.

ಭಾರತದಲ್ಲೇ ಉತ್ಪಾದನೆ?
ಆ್ಯಂಟಿ ವೈರಲ್‌ ಔಷಧ ರೆಮ್‌ಡೆಸಿವಿಯರ್‌ನ ಉತ್ಪಾದನೆಯನ್ನು ಭಾರತ ಶೀಘ್ರದಲ್ಲಿಯೇ ಸ್ಥಳೀಯವಾಗಿ ಆರಂಭಿಸಲಿದೆ. ಪ್ರಸ್ತುತ ಪ್ರಯೋಗ ಹಂತದಲ್ಲಿರುವ ರೆಮ್‌ಡೆಸಿವಿಯರ್‌ ಕೋವಿಡ್ ಸೋಂಕನ್ನು ತಡೆಗಟ್ಟುವಲ್ಲಿ ಸಾಕಷ್ಟು ಭರವಸೆ ಮೂಡಿಸಿದೆ. “ರೆಮ್‌ಡೆಸಿವಿಯರ್‌ ಅನ್ನು ದೇಶೀಯವಾಗಿ ಉತ್ಪಾದಿಸಲು ಮತ್ತು ಮಾರಾಟ ಮಾಡಲು 4 ಪ್ರತಿಷ್ಠಿತ ಫಾರ್ಮಾ ಕಂಪನಿಗಳು ಮುಂದೆ ಬಂದಿವೆ. ಅವರ ಅರ್ಜಿಗಳನ್ನು ಹಗಲು ರಾತ್ರಿ ಕೂಲಂಕಷವಾಗಿ ಪರಿಶೀಲಿಸಲಾಗುತ್ತಿದೆ’ ಎಂದು ಸರಕಾರದ ಉನ್ನತಾಧಿಕಾರಿಗಳು ತಿಳಿಸಿದ್ದಾರೆ.