ಮುಂಗಾರು ಬಿತ್ತನೆಗೆ ಸಿದ್ಧತೆ

Team Udayavani, Jun 18, 2020, 2:53 PM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ಅಫಜಲಪುರ: ಪ್ರಸಕ್ತ ಸಾಲಿನ ಮುಂಗಾರು ಮಳೆ ಆರಂಭವಾಗಿದ್ದು, ರೈತರು ಬಿತ್ತನೆಗೆ ಸಕಲ ಸಿದ್ಧತೆ ಮಾಡಿಕೊಂಡಿದ್ದಾರೆ.

ತಾಲೂಕಿನ ಅಫಜಲಪುರ, ಅತನೂರ, ಕರ್ಜಗಿ ರೈತ ಸಂಪರ್ಕ ಕೇಂದ್ರಗಳ ವ್ಯಾಪ್ತಿಯಲ್ಲಿ ಎರಡು ದಿನಗಳಿಂದ ಮಳೆ ಬರುತ್ತಿದ್ದು, ರೈತರೆಲ್ಲ ಬಿತ್ತನೆಗೆ ಸಿದ್ಧತೆ ಮಾಡಿಕೊಳ್ಳುತ್ತಿದ್ದಾರೆ. ಆದರೆ ಕಳೆದ ವರ್ಷದ ಮುಂಗಾರು ಹಂಗಾಮಿನಷ್ಟು ಮಳೆ ವಾಡಿಕೆ ಮಳೆ ಬಾರದೆ ಇರುವುದರಿಂದ ಈ ಬಾರಿ ಬಿತ್ತನೆ ಸ್ವಲ್ಪ ಕುಂಟಿತವಾಗುತ್ತಿದೆ. ಆದರೂ ಮಳೆಯಾಗುವ ಲಕ್ಷಣಗಳಿದ್ದು ಬಿತ್ತನೆಗೆ ಸಿದ್ಧರಾಗುಂತೆ ರೈತರಿಗೆ ಕೃಷಿ ಇಲಾಖೆ ಸಹಾಯಕ ನಿರ್ದೇಶಕ ಮಹಮ್ಮದ್‌ ಖಾಸೀಂ ಹಾಗೂ ತಾಂತ್ರಿಕ ಅಧಿಕಾರಿ ಸರ್ದಾರಬಾಷಾ ನದಾಫ್‌ ಮನವಿ ಮಾಡಿದ್ದಾರೆ.

ಕಳೆದ ವರ್ಷ ವಾರ್ಷಿಕ ಮಳೆ ಜೂನ್‌ ಅಂತ್ಯದವರೆಗೆ 160.5 ಮಿಮೀ ಮಳೆ ಬರಬೇಕಾಗಿತ್ತು. ಆದರೆ ಜೂ.15ರೊಳಗೆ 160.3 ಮಿ.ಮೀ ಮಳೆಯಾಗಿ ವಾಡಿಕೆಯಷ್ಟು ಮಳೆ ಬಂದು ಬಿತ್ತನೆ ಶುರುವಾಗಿತ್ತು. ಈ ಬಾರಿ 2020-21ನೇ ಸಾಲಿನ ವಾಡಿಕೆ ಮಳೆ 160.5 ಬರಬೇಕಾಗಿತ್ತು. ಆದರೆ ಇಲ್ಲಿಯವರೆಗೆ 107.8 ಮಿಮೀ ಮಳೆಯಾಗಿ 52.7 ಮಿಮೀ ಮಳೆ ಕೊರತೆಯಾಗಿ ಬಿತ್ತನೆ ಕುಂಟಿತವಾಗಿದೆ. ಉತ್ತಮ ಮಳೆ ಬರುವ ಸಾಧ್ಯತೆ ಇದೆ. ಇನ್ನೂ ತಾಲೂಕಿನ ಯಾವ ಗ್ರಾಮದಲ್ಲಿಯೂ ಬಿತ್ತನೆ ಶುರುವಾಗಿಲ್ಲ ಎಂದು ತಿಳಿಸಿದ್ದಾರೆ.

ಸದ್ಯದ ಪರಿಸ್ಥಿತಿಯಲ್ಲಿ ಸರ್ಕಾರಿ ಯೋಜನೆಗಳ ಅನುದಾನ ಬಂದಿಲ್ಲ, ಸಣ್ಣ ಟ್ಯಾಕ್ಟರ್‌, ಡ್ರಿಪ್‌, ಸ್ಪಿಂಕ್ಲರ್‌ಗಳು ಬಂದಿಲ್ಲ. ಪ್ರತಿ ವರ್ಷ ಮೇ ತಿಂಗಳಲ್ಲಿ ಬರುತ್ತಿದ್ದವು. ಈ ಬಾರಿ ಬಂದಿಲ್ಲ. ಟ್ಯಾಕ್ಟರ್‌ ಕೂರಿಗೆ ಯಂತ್ರದ ಬೇಡಿಕೆ ಹೆಚ್ಚಾಗಿದೆ. ಆದರೆ ಅವು ಬಂದಿಲ್ಲ ಎಂದು ತಿಳಿಸಿದ್ದಾರೆ.