ಕೋವಿಡ್-19 ಭೀತಿಯಲ್ಲಿ ಸೌರವ್‌ ಗಂಗೂಲಿ ಕುಟುಂಬ

Team Udayavani, Jun 21, 2020, 6:33 AM IST

ಕೋಲ್ಕತಾ: ಟೀಮ್‌ ಇಂಡಿಯಾದ ಮಾಜಿ ನಾಯಕ, ಬಿಸಿಸಿಐ ಅಧ್ಯಕ್ಷ ಸೌರವ್‌ ಗಂಗೂಲಿ ಕುಟುಂಬ ಕೋವಿಡ್-19 ಮಾರಿಯ ಭೀತಿಗೆ ಸಿಲುಕಿದೆ ಎಂಬ ಸುದ್ದಿ ಹರಿದಾಡುತ್ತಿದೆ.

ಅವರ ಅಣ್ಣ, ಬಂಗಾಲ ಕ್ರಿಕೆಟ್‌ ಮಂಡಳಿಯ (ಸಿಎಬಿ) ಅಧ್ಯಕ್ಷ ಸ್ನೇಹಶಿಷ್‌ ಗಂಗೂಲಿ ಮತ್ತು ಅವರ ಪತ್ನಿಗೆ ಕೋವಿಡ್-19 ಟೆಸ್ಟ್‌ ನಡೆಸಿದಾಗ ಪಾಸಿಟಿವ್‌ ಫ‌ಲಿತಾಂಶ ಕಂಡುಬಂದಿದೆ ಎಂದು ಮಂಡಳಿಯ ಹಿರಿಯ ಅಧಿಕಾರಿಯೊಬ್ಬರು ಹೇಳಿದ್ದರು. ಆದರೆ ಇದನ್ನು ಸ್ನೇಹಶಿಷ್‌ ಅಲ್ಲಗಳೆದಿದ್ದಾರೆ.

ಸ್ನೇಹಶಿಷ್‌ ಅವರ ಅತ್ತೆ ಮತ್ತು ಮಾವ ಅವರ ಫ‌ಲಿತಾಂಶ ಕೂಡ ಪಾಸಿಟಿವ್‌ ಆಗಿದೆ. ನಾಲ್ವರೂ ಕೋಲ್ಕತಾದ ಖಾಸಗಿ ನರ್ಸಿಂಗ್‌ ಹೋಮ್‌ ಒಂದರಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ ಎಂದು ಸಿಎಬಿ ಅಧಿಕಾರಿ ಶನಿವಾರ ತಿಳಿಸಿದ್ದರು. ಆದರೆ ಸಂಜೆ ವೇಳೆ ಸ್ವತಃ ಸ್ನೇಹಶಿಷ್‌ ಅವರೇ ಈ ಸುದ್ದಿ ನಿರಾಧಾರ, ತಾನು ಆರೋಗ್ಯದಿಂದ ಇದ್ದೇನೆ ಎಂದಿದ್ದಾರೆ.