ಸಿದ್ರಾಮಪ್ಪಗೆ ಗೌರವ ಡಾಕ್ಟರೇಟ್‌

Team Udayavani, Jun 21, 2020, 7:05 AM IST

ಯಡ್ರಾಮಿ: ನಾಡಿನ ಹೆಸರಾಂತ ಹಿಂದೂಸ್ತಾನಿ ಗಾಯಕ, ಕಲಬುರಗಿ ಆಕಾಶವಾಣಿ ಎ ಗ್ರೇಡ್‌ ಕಲಾವಿದ, ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಸಿದ್ರಾಮಪ್ಪ ಪೊಲೀಸ್‌ಪಾಟೀಲ ಕುಕನೂರ ಅವರಿಗೆ ಅಮೆರಿಕದ ಇಂಟರ್‌ ನ್ಯಾಶನಲ್‌ ಪೀಸ್‌ ಯೂನಿವರ್ಸಿಟಿ ಗೌರವ ಡಾಕ್ಟ್ರೇಟ್‌ ಪದವಿ ನೀಡಿ ಗೌರವಿಸಿದೆ.

ಮೂಲತಃ ಕುಕನೂರಿನ ಸಿದ್ರಾಮಪ್ಪ ಪೊಲೀಸ್‌ಪಾಟೀಲ ಸುದೀರ್ಘ‌ 45 ವರ್ಷಗಳ ಕಾಲ ಸಂಗೀತ ಕ್ಷೇತ್ರದಲ್ಲಿ ಸಲ್ಲಿಸಿದ ಅನುಪಮ ಸೇವೆಗಾಗಿ ಗೌರವ ಡಾಕ್ಟರೇಟ್‌ ಪದವಿ ನೀಡಿದೆ. ಈ ಮೊದಲು 1992ರಲ್ಲಿ ರಾಜ್ಯ ಪ್ರಶಸ್ತಿ, ಅದೇ ವರ್ಷ ಜಿಲ್ಲಾ ಅತ್ಯುತ್ತಮ ಶಿಕ್ಷಕ ಪ್ರಶಸ್ತಿಗೂ ಭಾಜನಾಗಿದ್ದಾರೆ. ಯಡ್ರಾಮಿ ಸಗರಾದ್ರಿ ಸಾಂಸ್ಕೃತಿಕ ಸಂಗಮ ವೇದಿಕೆ ಹರ್ಷ ವ್ಯಕ್ತಪಡಿಸಿದೆ.

ಸಮಾಜದಲ್ಲಿನ ಪ್ರತಿ ಸಾಮಾನ್ಯನು ಅಸಮಾನ್ಯ ವ್ಯಕ್ತಿತ್ವ ಹೊಂದಿರುತ್ತಾನೆ ಎಂಬ ಬುದ್ಧ, ಬಸವ, ಅಂಬೇಡ್ಕರ್‌ ಆಶಯದಂತೆ ಇವತ್ತು ನನ್ನ ಸಂಗೀತ ಕಲೆ ಗುರುತಿಸಿ ಅಮೆರಿಕದ ಇಂಟರ್‌ನ್ಯಾಶನಲ್‌ ಪೀಸ್‌ ಯೂನಿವರ್ಸಿಟಿ ಗೌರವ ಡಾಕ್ಟ್ರೇಟ್‌ ಪದವಿ ನೀಡಿ ಗೌರವಿಸಿದೆ.-ಸಿದ್ರಾಮಪ್ಪ ಪೊಲೀಸ್‌ಪಾಟೀಲ, ಆಕಾಶವಾಣಿ ಎ ಗ್ರೇಡ್‌ ಕಲಾವಿದರು.