ದಿನಕ್ಕೆ ಅರ್ಧ ಗಂಟೆ ಯೋಗ ಮಾಡಿ: ನಾಗಭೂಷಣ

Team Udayavani, Jun 22, 2020, 8:48 AM IST

ಕೊಂಡ್ಲಹಳ್ಳಿ: ಕೋವಿಡ್ ಅತಂಕದ ಕಾರಣ ಯೋಗ ದಿನಾಚರಣೆಯ ಸಾಮೂಹಿಕ ಕಾರ್ಯಕ್ರಮಗಳು ನಡೆಯಲಿಲ್ಲ. ಯೋಗಾಸಕ್ತರು ತಮ್ಮ ಮನೆಗಳಲ್ಲಿಯೇ ಯೋಗ ದಿನವನ್ನು ಆಚರಿಸಿ ಸಾಮಾಜಿಕ ಜಾಲತಾಣಗಳ ಮೂಲಕ ಯೋಗದ ಮಹತ್ವ ಸಾರಿದರು.

ಹತ್ತು ವರ್ಷಗಳಿಂದ ಯೋಗವನ್ನು ರೂಢಿಸಿರುವ ಇಲ್ಲಿನ ಸರ್ವೋದಯ ಹಿಪೋಕ್ಯಾಂಪಸ್‌ ಶಾಲೆಯ ಮುಖ್ಯ ಶಿಕ್ಷಕ ಬಿ.ಟಿ. ನಾಗಭೂಷಣ ಮಾತನಾಡಿ, ಪ್ರತಿ ದಿನ ಕನಿಷ್ಠ ಅರ್ಧ ಗಂಟೆ ಯೋಗಾಭ್ಯಾಸ ಮಾಡುವು ದರಿಂದ ದೇಹ ಸದೃಢಗೊಳ್ಳುತ್ತದೆ. ವಿಶೇಷವಾಗಿ ಮಕ್ಕಳ ಬೆಳವಣಿಗೆಗೆ ಸಹಕಾರಿಯಾಗಿದ್ದು ನಿರೋಧಕ ಶಕ್ತಿ ದೊರಕುತ್ತದೆ. 10 ವರ್ಷದ ಮಕ್ಕಳಿಂದ 65 ವರ್ಷದ ಹಿರಿಯರವರೆಗೆ ಎಲ್ಲರೂ ಯೋಗ ಮಾಡ ಬಹುದು. ಅರ್ಧ ಗಂಟೆಯಲ್ಲಿ ಸೂರ್ಯ ನಮಸ್ಕಾರ, ಪ್ರಾಣಾಯಾಮ, ಧ್ಯಾನ, ಪದ್ಮಾಸನ, ತಾಡಾಸನ, ಮತ್ತ್ಯಾಸನ, ವಜ್ರಾಸನ, ಹಲಾಸನ, ದ್ವಿಪಾದಾಸನ, ವೃಕ್ಷಾಸನ, ಪರ್ವತಾಸನದಂತಹ ಸರಳ ಯೋಗ ವಿಧಾನಗಳನ್ನು ಅಳವಡಿಸಿಕೊಳ್ಳಬಹುದು ಎಂದು ತಿಳಿಸಿದರು.