ಹಣ ದ್ವಿಗುಣ ಆಮಿಷ; 15.70 ರೂ. ವಂಚನೆ

Team Udayavani, Jun 27, 2020, 12:06 PM IST

ಹುಬ್ಬಳ್ಳಿ: ಕಡಿಮೆ ಹಣ ಹೂಡಿಕೆ ಮಾಡಿ ಹೆಚ್ಚಿನ ಹಣ ಸಂಪಾದಿಸುವ ಆಸೆಗೆ ಬಿದ್ದ ಧಾರವಾಡದ ಓರ್ವರು 15.70 ಲಕ್ಷ ರೂ. ಕಳೆದುಕೊಂಡಿರುವುದು ಬೆಳಕಿಗೆ ಬಂದಿದೆ.

ಧಾರವಾಡದ ಪ್ರಕಾಶ ಕುಸುಗಲ್‌ ಎಂಬುವರ ಮೊಬೈಲ್‌ಗೆ ಅಪರಿಚಿತನು ಕರೆ ಮಾಡಿ, 70 ಸಾವಿರ ರೂ. ಹೂಡಿಕೆ ಮಾಡಿ ಪ್ರತಿದಿನ 20-30 ಸಾವಿರ ರೂ. ಸಂಪಾದಿಸಬಹುದೆಂದು ಹೇಳಿ ಹೆಚ್ಚಿನ ಮಾಹಿತಿಗೆ ಸಂಪರ್ಕಿಸುವಂತೆ ವಿವಿಧ ಮೊಬೈಲ್‌ ನಂಬರ್‌ ಸಂಖ್ಯೆ ಕಳುಹಿಸಿದ್ದಾನೆ. ಆ ಸಂಖ್ಯೆಗಳಿಗೆ ಕರೆ ಮಾಡಿದಾಗ ಅಹ್ಮದಾಬಾದ್‌ನ ಮೇತಾ ಟ್ರೇಡರ್ಸ್‌ ಕಂಪನಿಯ ರೋಶನ ಶಾ ಮತ್ತು ವಿಕ್ರಾಂತ ಪಟೇಲ್‌ ಎಂದು ಪರಿಚಯಿಸಿಕೊಂಡು ಪ್ರಕಾಶ ಅವರ ಸಿಂಡಿಕೇಟ್‌ ಬ್ಯಾಂಕ್‌ ಖಾತೆಯಿಂದ ಐಎಂಪಿಎಸ್‌ ಮತ್ತು ನಿಫ್ಟಿ ಮುಖಾಂತರ ಒಟ್ಟು 15.70 ಲಕ್ಷ ರೂ. ವನ್ನು ಜೈ ಕುಬೇರ ಕಾರ್ಪೊರೇಶನ್‌ ಹೆಸರಿನಲ್ಲಿ ವಿವಿಧ ಬ್ಯಾಂಕ್‌ಗಳ ಖಾತೆಗೆ ಹಣ ವರ್ಗಾಯಿಸಿಕೊಂಡು ವಂಚಿಸಿದ್ದಾರೆ. ಈ ಕುರಿತು ಸೈಬರ್‌ ಕ್ರೈಂ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.