ಎಸ್ಸೆಸ್ಸೆಲ್ಸಿ ಪರೀಕ್ಷೆ: 2ನೇ ದಿನವೂ ಸುಸೂತ್ರ

Team Udayavani, Jun 28, 2020, 3:20 PM IST

ಮುದ್ದೇಬಿಹಾಳ: ಜ್ಞಾನಭಾರತಿ ಪರೀಕ್ಷಾ ಕೇಂದ್ರದಲ್ಲಿ ಪರೀಕ್ಷಾರ್ಥಿಗಳಿಗೆ ಸ್ಕ್ರೀನಿಂಗ್‌ ಮಾಡಲು ಆಗಮಿಸಿದ ಸ್ಕೌಟ್ಸ್‌-ಗೈಡ್ಸ್‌ ಸಿಬ್ಬಂದಿ, ಆಶಾ ಕಾರ್ಯಕರ್ತೆಯರ ತಂಡ.

ಮುದ್ದೇಬಿಹಾಳ: ಎಸ್ಸೆಸ್ಸೆಲ್ಸಿ ಎರಡನೇ ದಿನದ ಗಣಿತ ವಿಷಯದ ಪರೀಕ್ಷೆ ತಾಲೂಕಿನ 16 ಪರೀಕ್ಷಾ ಕೇಂದ್ರಗಳಲ್ಲಿ ಯಶಸ್ವಿಯಾಗಿ ನಡೆದಿದೆ.

ಆಶಾ ಕಾರ್ಯಕರ್ತೆಯರು, ಆರೋಗ್ಯ ಇಲಾಖೆ ಸಿಬ್ಬಂದಿ, ಭಾರತ ಸ್ಕೌಟ್ಸ್‌-ಗೈಡ್ಸ್‌ ಸ್ವಯಂ ಸೇವಕರು, ದೈಹಿಕ ಶಿಕ್ಷಕರು ತಂಡಗಳಾಗಿ ಪ್ರತಿಯೊಂದು ಕೇಂದ್ರದಲ್ಲಿ ವಿದ್ಯಾರ್ಥಿಗಳ ಆರೋಗ್ಯ ತಪಾಸಣೆ, ಮಾಸ್ಕ್ ಪರಿಶೀಲನೆ, ಹ್ಯಾಂಡ್‌ ಸ್ಯಾನಿಟೈಜಿಂಗ್‌ ಮುಂತಾದ ಪ್ರಾಥಮಿಕ ಚಟುವಟಿಕೆ ನಡೆಸಿದರು. ಯಾವುದೇ ಕೇಂದ್ರದಲ್ಲೂ ನಕಲಿನ ಪ್ರಕರಣಗಳು ಕಂಡುಬಂದಿಲ್ಲ ಎಂದು ಶಿಕ್ಷಣ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.

3197 ಬಾಲಕರು, 2244 ಬಾಲಕಿಯರು ಸೇರಿ 5441 ವಿದ್ಯಾರ್ಥಿಗಳು ಹೆಸರು ನೋಂದಾಯಿಸಿದ್ದರು. ಈ ಪೈಕಿ 149 ಬಾಲಕರು, 80 ಬಾಲಕಿಯರು ಸೇರಿ 229 ವಿದ್ಯಾರ್ಥಿಗಳು ಪರೀಕ್ಷೆಗೆ ಗೈರಾಗಿದ್ದರು. 3048 ಬಾಲಕರು, 2164 ಬಾಲಕಿಯರು ಸೇರಿ ಒಟ್ಟು 5212 ವಿದ್ಯಾರ್ಥಿಗಳು ಪರೀಕ್ಷೆಗೆ ಹಾಜರಾಗಿದ್ದಾರೆಂದು ಬಿಇಒ ರೇಣುಕಾ ಕಲಬುರ್ಗಿ, ನೋಡಲ್‌ ಅಧಿಕಾರಿ ಇಸಿಒ ಬಿ.ಎಚ್‌. ಮೇಟಿ ತಿಳಿಸಿದ್ದಾರೆ.

ಎಂಜಿಎಂಕೆ ಪರೀಕ್ಷಾ ಕೇಂದ್ರದಲ್ಲಿ ಶಸ್ತ್ರಚಿಕಿತ್ಸೆ ಮಾಡಿಸಿಕೊಂಡಿದ್ದ ವಿದ್ಯಾರ್ಥಿಯೊಬ್ಬನಿಗೆ ಪ್ರತ್ಯೇಕ ವ್ಯವಸ್ಥೆ ಕಲ್ಪಿಸಿ ಸ್ವತಃ ಆತನೇ ಪರೀಕ್ಷೆ ಬರೆಯಲು, ನಾಗರಬೆಟ್ಟದ ಎಸ್‌ಡಿಕೆ ಮತ್ತು ತಾಳಿಕೋಟೆಯ ಎಸ್‌ಕೆ ಪಿಯು ಕಾಲೇಜಿನ ಪರೀಕ್ಷಾ ಕೇಂದ್ರಗಳಲ್ಲಿ ತಲಾ ಒಬ್ಬರಿಗೆ ಸಹಾಯಕರೊಂದಿಗೆ ಪರೀಕ್ಷೆ ಬರೆಯಲು ಅವಕಾಶ ಕಲ್ಪಿಸಲಾಗಿತ್ತು. ಕಂಟೇನ್ಮೆಂಟ್‌, ಸೀಲ್‌ಡೌನ್‌ ಪ್ರದೇಶದಿಂದ ಬಂದವರಿಗೆ ಪ್ರತ್ಯೇಕ ಕೊಠಡಿ ನೀಡಿ ಪರೀಕ್ಷೆ ಬರೆಯಲು ಅನುವು ಮಾಡಿಕೊಡಲಾಗಿತ್ತು.