ತಾಜ್‌ ಹೊಟೇಲ್‌ಗ‌ಳಿಗೆ 26/11ಮಾದರಿ ದಾಳಿ

Team Udayavani, Jul 1, 2020, 11:54 AM IST

ಮುಂಬಯಿ: ದಕ್ಷಿಣ ಮುಂಬಯಿನ ಬಾಂದ್ರಾದಲ್ಲಿ ತಾಜ್‌ ಲ್ಯಾಂಡ್ಸ್‌ ಎಂಡ್‌ ಹಾಗೂ ಕೊಲಾಬಾ­ದಲ್ಲಿರುವ ತಾಜ್‌ ಮಹಲ್‌ ಪ್ಯಾಲೇಸ್‌ ಹೋಟೆಲ್‌ಗ‌ಳಿಗೆ 26/11 ಮಾದರಿಯ ದಾಳಿ ನಡೆಸಲಾಗುತ್ತದೆ ಎಂದು ಬೆದರಿಕೆ ಹಾಕಲಾ­ಗಿದೆ. ಸೋಮವಾರ ತಡರಾತ್ರಿ ಪಾಕಿಸ್ಥಾನದಿಂದ ಉಗ್ರ ಸಂಘಟನೆ ಲಷ್ಕರ್‌-ಎ-ತೊಯ್ಯಬಾ ಸಂಘಟನೆಯ ಹೆಸರಲ್ಲಿ ವ್ಯಕ್ತಿ ಫೋನ್‌ ಮಾಡಿ ಬೆದರಿಕೆ ಹಾಕಿದ್ದಾನೆ.

ಹೀಗಾಗಿ, ಎರಡೂ ಹೊಟೇ­ಲ್‌ಗ‌ಳಿಗೆ ಮತ್ತು ಸುತ್ತಮುತ್ತಲ ಪ್ರದೇಶ­ಗಳಲ್ಲಿ ಬಿಗಿ ಪೊಲೀಸ್‌ ಪಹರೆ ಹಾಕಲಾಗಿದೆ. ಮದ್ಯರಾತ್ರಿ 12.30ರ ವೇಳೆಗೆ ಬಂದ ಫೋನ್‌ನಲ್ಲಿ ವ್ಯಕ್ತಿ ತಾನು ಕರಾಚಿಯಿಂದ ಮಾತ­ನಾಡುತ್ತಿರುವ ಬಗ್ಗೆ ಹೇಳಿದ್ದಾನೆ. 2008­ರಲ್ಲಿ ಮುಂಬಯಿನಲ್ಲಿ ನಡೆಸಿದ್ದ ದಾಳಿಯ ರೀತಿ­ಯಲ್ಲಿಯೇ 2 ಹೊಟೇಲ್‌ಗ‌ಳಿಗೆ ದಾಳಿ ನಡೆ­ಸುವ ಬಗ್ಗೆ ಹೇಳಿದ್ದಾನೆ. ಹೋಟೆಲ್‌ಗ‌ಳಲ್ಲಿ ಈಗಾ­ಗಲೇ ಬಾಂಬ್‌ ಇರಿಸಲಾಗಿದೆ ಎಂಬ ಮಾತನ್ನು ಆಡಿದ್ದಾನೆ ಎಂದು ಪೊಲೀಸ್‌ ಅಧಿಕಾರಿ ಯೊಬ್ಬರು ತಿಳಿಸಿದ್ದಾರೆ. ತಕ್ಷಣವೇ ಪೊಲೀಸರಿಗೆ ಈ ಬಗ್ಗೆ ಸುದ್ದಿ ಮುಟ್ಟಿಸಲಾ­ಯಿತು. ಕರೆ ಸ್ವೀಕರಿಸಿದ ಹೋಟೆಲ್‌ ಸಿಬ್ಬಂದಿ­ಯಿಂದ ವಿವರಣೆ ಪಡೆಯಲಾಗಿದೆ. ಜತೆಗೆ ಈ ಕರೆಯ ಸತ್ಯಾಸತ್ಯತೆ ಹಾಗೂ ಕರಾಚಿಯಿಂದ ಬಂದದದ್ದು ಹೌದೇ ಎಂಬ ಬಗ್ಗೆ ಪರಿಶೀಲನೆ ನಡೆಸಲಾಗುತ್ತದೆ ಎಂದೂ ಅವರು ಹೇಳಿದ್ದಾರೆ.

2008ರಲ್ಲಿ ನಡೆದಿದ್ದ ಮುಂಬಯಿ ದಾಳಿಯ ಸಂದರ್ಭದಲ್ಲಿ ಕೊಲಾಬಾದಲ್ಲಿರುವ ತಾಜ್‌ ಮಹಲ್‌ ಪ್ಯಾಲೇಸ್‌ ಹೋಟೆಲ್‌ನೊಳಕ್ಕೆ ನುಗ್ಗಿದ್ದ ಉಗ್ರರು, ಹಲವಾರು ಜನರನ್ನು ಕೊಂದಿದ್ದರು. ಭಾರತದ ಇತಿಹಾಸದಲ್ಲೇ ಅತಿ ಭೀಕರವಾದ ದಾಳಿಗಳಲ್ಲೊಂದಾದ ಮುಂಬಯಿ ದಾಳಿಗೆ ಒಟ್ಟು 170 ಜನರು ಬಲಿಯಾಗಿದ್ದರು. ಒಟ್ಟು ಮೂರು ದಿನಗಳ ಕಾಲ ನಡೆದ ಕಾರ್ಯಾಚರಣೆಯಲ್ಲಿ ಎನ್‌ಎಸ್‌ಜಿ ಯೋಧ ಸಂದೀಪ್‌ ಉನ್ನಿಕೃಷ್ಣನ್‌, ಮುಂಬಯಿ ಪೊಲೀಸ್‌ನ ಹಲವಾರು ಧೀಮಂತ ಅಧಿಕಾರಿಗಳು ಹುತಾತ್ಮರಾಗಿದ್ದರು.