ಅಣ್ಣನ ಸಿನಿಮಾಗೆ ತಮ್ಮನ ಸಾಥ್‌

Team Udayavani, Jul 4, 2020, 4:40 AM IST

ನಟ ಚಿರಂಜೀವಿ ಸರ್ಜಾ ಅವರೀಗ ನಮ್ಮೊಂದಿಗಿಲ್ಲ. ಆದರೆ, ಅವರು ಸಿನಿಮಾಗಳ ಮೂಲಕ ಸದಾ ಜೀವಂತ. ಅವರು ನಟನೆಯ ಬಾಕಿ ಇರುವ ಚಿತ್ರಗಳು ಅರ್ಧಕ್ಕೆ ನಿಂತಿವೆ. ಕೆಲವು ಪೂರ್ಣಗೊಂಡು ಡಬ್ಬಿಂಗ್‌ನಲ್ಲಿವೆ. ಇಂತಹ ಸಂದರ್ಭದಲ್ಲಿ ನಿರ್ಮಾಪಕರಿಗೆ, ನಿರ್ದೇಶಕರಿಗೆ ಯಾವುದೇ ಸಮಸ್ಯೆ ಎದುರಾಗಬಾರದು ಎಂಬ ಕಾರಣಕ್ಕೆ ಚಿರು ಸಹೋದರ ಧ್ರುವ ಸರ್ಜಾ ಅಣ್ಣನ ನಟನೆಯ ಚಿತ್ರಕ್ಕೆ ವಾಯ್ಸ್‌ ಡಬ್‌ ಮಾಡಲು ನಿರ್ಧರಿಸಿದ್ದಾರೆ.

ಈ ಕುರಿತು ನಿರ್ದೇಶಕ ರಾಮ್‌ನಾರಾಯಣ್‌ ಸ್ಪಷ್ಟಪಡಿಸಿದ್ದಾರೆ. ಹೌದು, ಚಿರಂಜೀವಿ ಸರ್ಜಾ ಅವರು, “ರಾಜಮಾರ್ತಾಂಡ ‘ ಚಿತ್ರಕ್ಕೆ ನಟ ಧ್ರುವ ಸರ್ಜಾ ಅವರು ಚಿರು ಪಾತ್ರಕ್ಕೆ ವಾಯ್ಸ್‌ ಡಬ್‌ ಮಾಡಲಿದ್ದಾರೆ ಎಂದು ಹೇಳಿದ್ದಾರೆ. ಇತ್ತೀಚೆಗೆ ಸ್ವತಃ ಧ್ರುವಸರ್ಜಾ ಅವರೇ ನಿರ್ಮಾಪಕರಿಗೆ ಕಾಲ್‌ ಮಾಡಿ, “ರಾಜಮಾರ್ತಾಂಡ ‘ ಚಿತ್ರಕ್ಕೆ ವಾಯ್ಸ್‌ ಕೊಡುವುದಾಗಿ ಹೇಳಿದ್ದಲ್ಲದೆ, ಸಿನಿಮಾಗೆ ಏನೆಲ್ಲಾ ಸಹಕಾರ ಬೇಕೋ ಎಲ್ಲವನ್ನೂ ಕೊಡುವುದಾಗಿಯೂ ಹೇಳಿದ್ದಾರೆ.

“ರಾಜಮಾರ್ತಾಂಡ ‘ ಚಿತ್ರದಲ್ಲಿ ಚಿರಂಜೀವಿ ಸರ್ಜಾ ಅವರು ಹಿಂದೆಂದೂ ಕಾಣದಂತ ಗೆಟಪ್‌ನಲ್ಲಿ ಮಿಂಚಿದ್ದಾರೆ. ಅದರಲ್ಲೂ ಅವರು ಸೆಂಟಿಮೆಂಟ್‌ ದೃಶ್ಯಗಳಲ್ಲಂತೂ ಎಲ್ಲರಲ್ಲೂ ನೀರು ತರಿಸುತ್ತಾರೆ. ಅಷ್ಟರಮಟ್ಟಿಗೆ ಅವರು ಎಲ್ಲರ ಮನಸ್ಸನ್ನು ಗೆಲ್ಲುತ್ತಾರೆ. ಇನ್ನು, ಧ್ರುವಸರ್ಜಾ ಮಾತ್ರವಲ್ಲ, ಮೊದಲಿನಿಂದಲೂ ಈ ಚಿತ್ರಕ್ಕೆ ಸಾಕಷ್ಟು ಸಹಕಾರ ಮತ್ತು ಪ್ರೋತ್ಸಾಹ ನೀಡುತ್ತಾ ಬಂದಿರುವ ದರ್ಶನ್‌ ಅವರು ಕೂಡ ಚಿರು ಅವರ ಕೊನೆಯ ಸಿನಿಮಾಗೆ ಧ್ವನಿ ಕೊಡುವುದಾಗಿಯೂ ಹೇಳಿದ್ದಾರೆ. ಇವರೆಲ್ಲರ ಧ್ವನಿಯಿಂದಾಗಿ ಚಿರಂಜೀವಿ ಸರ್ಜಾ ಅವರ ಆತ್ಮಕ್ಕೆ ನಿಜಕ್ಕೂ ಶಾಂತಿ ಸಿಗಲಿದೆ ಎಂಬುದು ನಿರ್ದೇಶಕ ರಾಮ್‌ನಾರಾಯಣ್‌ ಅವರ ವಿಶ್ವಾಸ.

ಅದೇನೆ ಇರಲಿ, “ರಾಜಮಾರ್ತಾಂಡ ‘ ಚಿತ್ರ ಬಿಡುಗಡೆಗೆ ರೆಡಿಯಾಗುತ್ತಿತ್ತು. ಅಷ್ಟರಲ್ಲೇ ಚಿರು ಇನ್ನಿಲ್ಲವಾದರು. ಸಿನಿಮಾ ತಂಡ ಕೂಡ ಒಂದಷ್ಟು ಆತಂಕದಲ್ಲಿತ್ತು. ಅಂತಹ ಸಮಯದಲ್ಲಿ ಧ್ರುವಸರ್ಜಾ ಇಡೀ ಚಿತ್ರತಂಡಕ್ಕೆ ಧೈರ್ಯ ತುಂಬಿ ನಿಮ್ಮೊಂದಿಗೆ ನಾನಿದ್ದೇನೆ ಎಂದಿದ್ದಾರೆ. ಅತ್ತ ದರ್ಶನ್‌ ಕೂಡ ವಾಯ್ಸ್‌ ಕೊಡುವುದಾಗಿ ಹೇಳಿದ್ದಾರೆ. ಎಲ್ಲವೂ ಅಂದುಕೊಂಡಂತೆ ನಡೆದರೆ ಇಷ್ಟರಲ್ಲೇ ಚಿತ್ರಕ್ಕೆ ವಾಯ್ಸ್‌ ಡಬ್‌ ಆಗಲಿದೆ. ಕೊರೊನಾ ಸಮಸ್ಯೆ ಬಗೆಹರಿದ ಬಳಿಕ “ರಾಜಮಾರ್ತಾಂಡ ‘ ಚಿತ್ರ ಪ್ರೇಕ್ಷಕರ ಎದುರಿಗೆ ಬರಲಿದೆ.