ನವ್ಯಾ ಜೊತೆ ನಟಿಸಿದ್ದ ನಟನಿಗೂ ಕೋವಿಡ್‌ 19!

Team Udayavani, Jul 5, 2020, 7:46 AM IST

ಇತ್ತೀಚೆಗಷ್ಟೇ ಕನ್ನಡದ ಕಿರುತೆರೆ ನಟಿ ನವ್ಯಾ ಸ್ವಾಮಿಗೆ ಕೋವಿಡ್ 19 ಸೋಂಕು ತಗುಲಿತ್ತು. ಇದೀಗ ಅವರ ಜೊತೆ ಅಭಿನಯಿಸಿದ್ದ ನಟನಿಗೂ ಕೂಡಾ ಕೋವಿಡ್‌ 19 ವೈರಸ್‌ ತಗುಲಿದೆ. ಹೌದು! ತೆಲುಗಿನ ಧಾರಾವಾಹಿ ಚಿತ್ರೀಕರಣದಲ್ಲಿ ನವ್ಯಾ ಸ್ವಾಮಿ ಜೊತೆ ನಟಿಸಿದ್ದ ರವಿಕೃಷ್ಣ ಅವರಿಗೂ ಕೋವಿಡ್ 19 ಸೋಂಕು ತಗುಲಿದ್ದು ಚಿಕಿತ್ಸೆ ಪಡೆಯುತ್ತಿದ್ದಾರೆ. ಈ ಮೊದಲು ನವ್ಯಾ ಸ್ವಾಮಿ ಸೋಂಕಿಗೆ ತುತ್ತಾಗಿ ಚಿಕಿತ್ಸೆ ಪಡೆಯುತ್ತಿದ್ದರು.

ಅಲ್ಲದೇ ಈ ಘಟನೆಯಿಂದ ಧಾರಾವಾಹಿ ಚಿತ್ರೀಕರಣವನ್ನು ಸ್ಥಗಿತಗೊಳಿಸಲಾಗಿದೆ. ಇನ್ನು ಮೈಸೂರು ಮೂಲದ ನವ್ಯಾ ಸ್ವಾಮಿ ಈ ಹಿಂದೆ ಕನ್ನಡದ ಲಕುಮಿ, ತಂಗಾಳಿ ಧಾರಾವಾಹಿ ಸೇರಿದಂತೆ ವಾಣಿ ರಾಣಿ, ನಾ ಪೇರು ಮೀನಾಕ್ಷಿ ಮೂಲಕ ತಮಿಳು- ತೆಲುಗು ಧಾರಾವಾಹಿಗಳಲ್ಲಿ ಅಭಿನಯಿಸಿ ಸೈ ಎನ್ನಿಸಿಕೊಂಡಿದ್ದರು.

ಇನ್ನು ಕೋವಿಡ್ 19 ಲಾಕ್ ಡೌನ್ ಸಡಿಲಿಕೆ ಬೆನ್ನಲ್ಲೇ ಹೈದರಾಬಾದ್‌ನಲ್ಲಿ ಶೂಟಿಂಗ್‌ಗೆ ಅನುವು ಮಾಡಿಕೊಟ್ಟಿದ್ದರಿಂದ ಹಲವು ಸಿನಿಮಾಗಳು ಹಾಗೂ ಧಾರಾವಾಹಿಗಳ ಚಿತ್ರೀಕರಣ ಭರದಿಂದ ಸಾಗಿತ್ತು. ಆದರೆ ಸೋಂಕು ಬಾಧೆಯಿಂದ ದೇಶವೀಗ ತತ್ತರಿಸುತ್ತಿದ್ದು, ದಿನಪ್ರತಿ ಸೋಂಕಿತರ ಸಂಖ್ಯೆ ಏರಿಕೆ ಕಾಣುತ್ತಿದೆ.