ಬಿಎಂಟಿಸಿ ಕಂಡಕ್ಟರ್‌ನಿಂದ 7 ಜನರಿಗೆ ಸೋಂಕು

Team Udayavani, Jul 7, 2020, 4:17 PM IST

ಲಕ್ಷ್ಮೇಶ್ವರ: ಪಟ್ಟಣಕ್ಕೆ ಬೆಂಗಳೂರಿನಿಂದ ಆಮಿಸಿದ್ದ ಬಿಎಂಟಿಸಿ ಕಂಡಕ್ಟರ್‌ನಿಂದ ಅವರ ಕುಟುಂಬದ 6 ಜನರಿಗೆ ಮತ್ತು ನರ್ಸ್‌ ಸೇರಿ 7 ಜನರಿಗೆ ಸೋಂಕು ತಗುಲಿದ್ದು, ಪಟ್ಟಣದಲ್ಲಿ ಭಯದ ವಾರಾವರಣ ಸೃಷ್ಟಿಯಾಗಿದೆ.

ಪಟ್ಟಣದ ಸೋಮೇಶ್ವರ ದೇವಸ್ಥಾನದ ಹತ್ತಿರದ ನಿವಾಸಿಯಾಗಿರುವ 39 (ಪಿ-11230)ವರ್ಷದ ಕಂಡಕ್ಟರ್‌ ಜೂ. 15ರಂದು ಪಟ್ಟಣಕ್ಕೆ ಆಗಮಿಸಿದ್ದಾರೆ. ಮೂರ್‍ನಾಲ್ಕು ದಿನಗಳ ಬಳಿಕ ಆರೋಗ್ಯದಲ್ಲಿ ವ್ಯತ್ಯಾಸ ಕಂಡು ಬಂದಿದ್ದು, ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದಿದ್ದಾರೆ. ಬಳಿಕ ಸ್ವತಃ ತಾನೇ ಸರ್ಕಾರಿ ಆಸ್ಪತ್ರೆಗೆ ಹೋದಾಗ ಗಂಟಲು ದ್ರವ ಮಾದರಿ ಪರೀಕ್ಷೆಗೆ ಕಳುಹಿಸಿದ್ದಾರೆ. ಜೂ. 27ರಂದು ಸೋಂಕು ದೃಡಪಟ್ಟಿದೆ.

ಇವರಿಗೆ ಪ್ರಾಥಮಿಕ ಸಂಪರ್ಕಕ್ಕೆ ಬಂದ ಕುಟುಂಬದ 13 ಜನರನ್ನು ಕ್ವಾರಂಟೈನ್‌ ಮಾಡಲಾಗಿತ್ತು. ಜು. 3ರಂದು ಈತನ ಚಿಕಿತ್ಸೆಗೆ ಸಹಕರಿಸಿದ ಖಾಸಗಿ ಆಸ್ಪತ್ರೆಯ 40 ವರ್ಷದ( ಪಿ.18285) ನರ್ಸ್‌ಗೆ ಸೋಂಕು ತಗುಲಿರುವುದು ವರದಿಯಾಗಿದೆ. ಸೋಮವಾರ ಕ್ವಾರಂಟೈನ್‌ನಲ್ಲಿದ್ದ ಕುಟುಂಬದ 13 ಜನರರಲ್ಲಿ 7, 12, 14 ವರ್ಷದ ಮೂವರು ಮಕ್ಕಳು ಸೇರಿ 6 ಜನರಿಗೆ ಸೋಂಕು ದೃಢಪಟ್ಟಿದ್ದು, ಪಟ್ಟಣದ ಜನರಲ್ಲಿ ಭಯದ ವಾತಾವರಣ ಮೂಡಿಸಿದೆ. ಈ ಹಿನ್ನೆಲೆಯಲ್ಲಿ ಈಗಾಗಲೇ ಸೀಲ್‌ಡೌನ್‌ ಮಾಡಿರುವ ಸೋಂಕಿತರು ವಾಸವಿರುವ ಪ್ರದೇಶದಲ್ಲಿ ಮತ್ತಷ್ಟು ಬಿಗಿ ಕ್ರಮಕ್ಕೆ ತಾಲೂಕಾಡಳಿತ ಮುಂದಾಗಿದೆ. ಈ ಪ್ರದೇಶದಲ್ಲಿರುವ ಶಾಲೆ, ಸೋಮೇಶ್ವರ ದೇವಸ್ಥಾನ, ಅಂಗಡಿ ಮತ್ತು ಸೋಂಕಿತನ ಪರೀಕ್ಷೆ ಮಾಡಿದ ಖಾಸಗಿ ಆಸ್ಪತ್ರೆ, ಮೆಡಿಕಲ್‌ ಶಾಪ್‌, ಬಸವೇಶ್ವರ ನಗರ ಬಂದ್‌ ಮಾಡಲಾಗಿದೆ. ಈ ಪ್ರದೇಶದಲ್ಲಿನ ಬಹುತೇಕ ಜನರು ಭಯದಿಂದ ತಮ್ಮ ಮನೆಗಳಿಗೆ ಬೀಗ ಹಾಕಿ ಸಂಬಂಧಿಕರ ಮನೆಗೆ ಹೋಗಿದ್ದಾರೆ. ಇರುವ ಜನತೆ ಮನೆಯಿಂದ ಹೊರ ಬರದಂತೆ ತಿಳಿವಳಿಕೆ, ಸೂಚನೆ ನೀಡಲಾಗಿದೆ.