ಹೊನ್ನಾಳಿ: 14 ಜನರಿಗೆ ಕೋವಿಡ್ ನಂಜು

Team Udayavani, Jul 10, 2020, 11:24 AM IST

ಹೊನ್ನಾಳಿ: ಪಟ್ಟಣದ 12 ಜನರಿಗೆ ಹಾಗೂ ತಾಲೂಕಿನ ದಿಡಗೂರು ಹರಳಹಳ್ಳಿ ಗ್ರಾಮದ ಇಬ್ಬರು ಸೇರಿದಂತೆ ಒಟ್ಟು 14 ಜನರಿಗೆ ಕೋವಿಡ್ ಸೋಂಕು ದೃಢಪಟ್ಟಿದೆ.

ತಹಶೀಲ್ದಾರ್‌ ತುಷಾರ್‌ ಬಿ. ಹೊಸೂರು ಸುದ್ದಿಗಾರರಿಗೆ ಈ ಬಗ್ಗೆ ಮಾಹಿತಿ ನೀಡಿದರು. ಜೂನ್‌ 28 ರಂದು ಪಟ್ಟಣದ ಅಂಬೇಡ್ಕರ್‌ ಭವನದಲ್ಲಿ ಕೋವಿಡ್ ಸೋಂಕಿತರ ಗಂಟಲು ದ್ರವ ಮಾದರಿಯನ್ನು ಸಂಗ್ರಹಿಸಿ ಕಳುಹಿಸಿ ಕೊಡಲಾಗಿತ್ತು. ಜುಲೈ 8 ರಂದು ರಾತ್ರಿ ಈ ಎಲ್ಲಾ 14 ಜನರಿಗೆ ಕೋವಿಡ್ ಸೋಂಕು ದೃಢಪಟ್ಟಿರುವ ಮಾಹಿತಿ ಲಭ್ಯವಾಗಿದೆ. ಈ ಹಿನ್ನೆಲೆಯಲ್ಲಿ ಪಟ್ಟಣದಲ್ಲಿ ಆರು ಕಡೆ ಹಾಗೂ ದಿಡಗೂರು ಹರಳಹಳ್ಳಿಯಲ್ಲಿ ಒಂದು ಕಡೆ ಸೇರಿ ಒಟ್ಟು ಏಳು ಕಂಟೇನ್ಮೆಂಟ್‌ ಝೋನ್‌ ರಚಿಸಲಾಗಿದೆ. ಇಲ್ಲಿ ಪ .ಪಂ ಸಿಬ್ಬಂದಿ ಸ್ಯಾನಿಟೈಸ್‌ ಮಾಡಿದ್ದಾರೆ ಎಂದರು.

ಪಟ್ಟಣದ ಕೋಟೆಯಲ್ಲಿ 4, ಸಂತೆ ಮೈದಾನದಲ್ಲಿ 4, ಟಿ.ಎಂ. ರಸ್ತೆಯಲ್ಲಿ 2, ಹಳೆಪೇಟೆಯಲ್ಲಿ 1, ದೊಡ್ಡಗಣ್ಣಾರ ಬೀದಿಯಲ್ಲಿ 1 ಹಾಗೂ ದಿಡಗೂರು ಹರಳಹಳ್ಳಿಯಲ್ಲಿ 2 ಕೋವಿಡ್ ಪ್ರಕರಣಗಳು ಸೇರಿ ಒಟ್ಟು 14 ಜನರಿಗೆ ಸೋಂಕು ದೃಢಪಟ್ಟಿದೆ. ಎಲ್ಲರನ್ನೂ ಹೋಂ ಕ್ವಾರಂಟೈನ್‌ ಮಾಡಲಾಗಿದ್ದು ಚಿಕಿತ್ಸೆ ನೀಡಲಾಗುತ್ತಿದೆ. ಮತ್ತೊಮ್ಮೆ ಗಂಟಲು ದ್ರವ ಮಾದರಿಯನ್ನು ಸಂಗ್ರಹಿಸಿ ಶೀಘ್ರದಲ್ಲೇ ವರದಿ ತರಿಸಿಕೊಳ್ಳಲಾಗುವುದು. ಅದರಲ್ಲೂ ಮತ್ತೆ ಸೋಂಕು ದೃಢಪಟ್ಟರೆ ದಾವಣಗೆರೆ ಸಿಜೆ ಆಸ್ಪತ್ರೆಗೆ ದಾಖಲಿಸಲಾಗುವುದು ಎಂದು ತಿಳಿಸಿದರು.