ಭಾರತದೊಳಕ್ಕೆ ನುಸುಳಲು ಗಡಿಯಲ್ಲಿ ಪಾಕ್ ಬೆಂಬಲಿತ 300 ಉಗ್ರರ ಠಿಕಾಣಿ: ಸೇನೆ

Team Udayavani, Jul 11, 2020, 7:41 PM IST

ಶ್ರೀನಗರ್: ಭಾರತದ ಗಡಿಯೊಳಗೆ ಉಗ್ರರನ್ನು ರವಾನಿಸಲು ಪಾಕಿಸ್ತಾನ ಸತತವಾಗಿ ಪ್ರಯತ್ನಿಸುತ್ತಿದ್ದು, ಏತನ್ಮಧ್ಯೆ ಗಡಿ ನಿಯಂತ್ರಣ ರೇಖೆ ಬಳಿಯ ಲಾಂಚ್ ಪ್ಯಾಡ್ ನಲ್ಲಿ ಸುಮಾರು 200ರಿಂದ 300 ಉಗ್ರರು ಭಾರತದೊಳಕ್ಕೆ ನುಸುಳಲು ಕಾಯುತ್ತಿರುವುದಾಗಿ ಭಾರತೀಯ ಸೇನೆ ಶನಿವಾರ ಎಚ್ಚರಿಕೆಯ ಸಂದೇಶ ರವಾನಿಸಿದೆ.

ಪಾಕಿಸ್ತಾನ ಬೆಂಬಲಿತ ಉಗ್ರರು ಇವರಾಗಿದ್ದು, ಭಾರತದ ಗಡಿಯೊಳಕ್ಕೆ ನುಸುಳುವ ಅವಕಾಶಕ್ಕಾಗಿ ಕಾಯುತ್ತಿರುವುದಾಗಿ ವರದಿ ತಿಳಿಸಿದೆ. ಶನಿವಾರ ಬೆಳಗ್ಗೆ ನೌಗಾಮ್ ಸೆಕ್ಟರ್ ಬಳಿ ಗಡಿ ನುಸುಳಲು ಪ್ರಯತ್ನಿಸಿದ್ದ ಇಬ್ಬರು ಉಗ್ರರ ಪ್ರಯತ್ನವನ್ನು ಭದ್ರತಾ ಪಡೆ ವಿಫಲಗೊಳಿಸಿದ್ದು, ಇಬ್ಬರನ್ನೂ ಎನ್ ಕೌಂಟರ್ ನಲ್ಲಿ
ಹೊಡೆದುರುಳಿಸಿದ್ದ ಘಟನೆ ನಡೆದಿತ್ತು.

ಗಡಿ ನಿಯಂತ್ರಣ ರೇಖೆ ಸಮೀಪದ ಲಾಂಚ್ ಪ್ಯಾಡ್ ಅನ್ನು ಉಗ್ರರು ಸಂಪೂರ್ಣ ಆಕ್ರಮಿಸಿಕೊಂಡಿದ್ದು, ನಮ್ಮ ಅಂದಾಜಿನ ಪ್ರಕಾರ ಸುಮಾರು 250ರಿಂದ 300 ಉಗ್ರರು ಅಡಗಿರುವ ಶಂಕೆ ಇದ್ದಿರುವುದಾಗಿ ಸೇನಾ ಮೂಲಗಳು ಹೇಳಿವೆ.