ಮಾಸ್ಕ್ ಧರಿಸದವರಿಗೆ ದಂಡ

Team Udayavani, Jul 12, 2020, 12:27 PM IST

ಲಕ್ಷ್ಮೇಶ್ವರ: ಪಟ್ಟಣದಲ್ಲಿ ಮಾಸ್ಕ್ ಧರಿಸದೇ ಸಂಚರಿಸುತ್ತಿದ್ದವರಿಗೆ ಹಾಗೂ ಬೈಕ್‌ ಸವಾರರಿಗೆ ಪೊಲೀಸರು ದಂಡ ವಿಧಿಸಿದರು. ಸಂತೆ ದಿನ ಸುತ್ತಲಿನ ಗ್ರಾಮೀಣ ಪ್ರದೇಶಗಳ ಸಾವಿರಾರು ಸಂಖ್ಯೆಯ ಜನರು ಆಗಮಿಸಿದ್ದರು. ಬಹುತೇಕರು ಮಾಸ್ಕ್ ಇಲ್ಲದೇ ಸಾಮಾಜಿಕ ಅಂತರದ ಬಗ್ಗೆ ಗಮನ ಹರಿಸದೇ ವರ್ತಿಸುತ್ತಿರುವುದನ್ನು ತಡೆಯಲು ಮತ್ತು ಈ ಬಗ್ಗೆ ತಿಳಿ ಹೇಳಲು ಪಿಎಸ್‌ಐ ಶಿವಕುಮಾರ ಲೋಹಾರ ನೇತೃತ್ವದ ಪೊಲೀಸ್‌ ಪಡೆ ದಂಡ ವಿಧಿಸಿ ಬಿಸಿ ಮುಟ್ಟಿಸಿತು.

ಪೊಲೀಸ್‌ ಇಲಾಖೆಯವರು ಪುರಸಭೆ ಮತ್ತು ಆರೋಗ್ಯ ಇಲಾಖೆ ಆಶ್ರಯದಲ್ಲಿ ಮೂರ್‍ನಾಲ್ಕು ತಿಂಗಳಿಂದ ಧ್ವನಿವರ್ಧಕ, ಜಾಗೃತಿ ಜಾಥಾ, ಮಾಸ್ಕ್ ವಿತರಣೆ, ಕಾನೂನು ತಿಳಿವಳಿಕೆ ಕಾರ್ಯ ಮಾಡಿದ್ದೇವೆ. ಇದೀಗ ಕೋವಿಡ್ ಹಾವಳಿ ಹೆಚ್ಚುತ್ತಿದ್ದರೂ ಎಚ್ಚೆತ್ತುಕೊಳ್ಳದವವರು ದಂಡದ ಭಯದಿಂದಾದರೂ ನಿಯಮ ಪಾಲಿಸಿಯಾರು ಎಂಬ ಉದ್ದೇಶದಿಂದ ತಿಳಿವಳಿಕೆ, ಎಚ್ಚರಿಕೆ ನೀಡುವ ಜತೆಗೆ ದಂಡ ವಿಧಿಸುವ ಕಾರ್ಯ ಮಾಡುತ್ತಿದ್ದೇವೆ. ರಸ್ತೆ ನಿಯಮ ಉಲ್ಲಂಘಿಸಿದ ಮತ್ತು ಮಾಸ್ಕ್ ಧರಿಸದ 35 ಜನರಿಗೆ ದಂಡ ವಿಧಿಸಲಾಗಿದೆ ಎಂದು ಪಿಎಸ್‌ಐ ಹೇಳಿದರು.

ಮಹಿಳಾ ಪಿಎಸ್‌ಐ ಪಿ.ಎಂ. ಬಡಿಗೇರ, ಎಎಸ್‌ಐ ವೈ.ಎಸ್‌. ಕ್ಯೂಬಿಹಾಳ, ಸಿಬ್ಬಂದಿ ಪ್ರಕಾಶ ಮ್ಯಾಗೇರಿ, ಬಸವರಾಜ ದಾಸಪ್ಪನವರ, ಎಚ್ಚರಪ್ಪ ಚಳ್ಳಗೇರಿ, ಪಾಂಡುರಂಗರಾವ್‌ ಜಗತಾಪ್‌ ಇದ್ದರು.