ಕಡೂರು: ಮತ್ತೆ ಮೂವರಿಗೆ ಕೋವಿಡ್

Team Udayavani, Jul 20, 2020, 1:18 PM IST

ಕಡೂರು: ಭಾನುವಾರ ಕಡೂರು ಪಟ್ಟಣದಲ್ಲಿ ಎರಡು ಹಾಗೂ ಗ್ರಾಮಾಂತರ ಭಾಗವಾದ ಹರುವನಹಳ್ಳಿಯಲ್ಲಿ ಒಂದು ಕೋವಿಡ್ ಪಾಸಿಟಿವ್‌ ಪ್ರಕರಣ ಪತ್ತೆಯಾಗಿದೆ.

ಪಟ್ಟಣದ ಅನ್ನಪೂರ್ಣ ಚಿತ್ರಮಂದಿರದ ಹಿಂಭಾಗ ವಾರ್ಡ್‌ ನಂ. 8 ರಲ್ಲಿ ಸರ್ಕಾರಿ ನಿವೃತ್ತ ನೌಕರ (70) ಹಾಗೂ ಅವರ ಪತ್ನಿ (61) ಇಬ್ಬರಿಗೂ ಶುಕ್ರವಾರ ಕಡೂರು ಸಾರ್ವಜನಿಕರ ಆಸ್ಪತ್ರೆಯಲ್ಲಿ ಗಂಟಲು ದ್ರವನ್ನು ಪರೀಕ್ಷೆಗೆ ನೀಡಿದ್ದು ಭಾನುವಾರ ಕೋವಿಡ್ ಪಾಸಿಟಿವ್‌ ಕಂಡು ಬಂದಿದೆ.

ಇವರ ಪ್ರಾಥಮಿಕ ಸಂಪರ್ಕದಲ್ಲಿದ್ದ 6 ಜನ ಬಂಧುಗಳನ್ನು ಹೋಂ ಕ್ವಾರಂಟೈನ್‌ ಮಾಡಲಾಗಿದ್ದು ಸೋಮವಾರ ಅವರನ್ನು ಪರೀಕ್ಷೆಗೆ ಒಳಪಡಿಸಲಾಗುವುದಾಗಿ ತಾಲೂಕು ವೈದ್ಯಾಧಿ ಕಾರಿ ಡಾ| ರವಿಕುಮಾರ್‌ ತಿಳಿಸಿದರು. ಹರುವನಹಳ್ಳಿ ಗ್ರಾಮದ ತರಕಾರಿ ವ್ಯಾಪಾರಿ ಓರ್ವನಿಗೆ ಕೊರೊನಾ ಪತ್ತೆಯಾಗಿದ್ದು ಅವರ ಗಂಟಲು ದ್ರವವನ್ನು ಶುಕ್ರವಾರ ನೀಡಿದ್ದು ವರದಿ ಬಂದಿದೆ. ಪ್ರಾಥಮಿಕ ಸಂಪರ್ಕದ ಮಾಹಿತಿ ಇನ್ನೂ ದೃಢವಾಗಿಲ್ಲ. ಈ ಮೂರು ಜನರನ್ನು ಚಿಕ್ಕಮಗಳೂರಿನ ನಿಗದಿತ ಕೋವಿಡ್‌-19 ಆಸ್ಪತ್ರೆಯ ಐಸೋಲೇಶನ್‌ ವಾರ್ಡ್‌ಗೆ ವರ್ಗಾಯಿಸಲಾಗಿದೆ ಎಂಬ ಮಾಹಿತಿ ನೀಡಿದರು. ಇದರೊಂದಿಗೆ ಕಡೂರು ತಾಲೂಕಿನಲ್ಲಿ ಇದುವರೆಗೆ 33 ಸೋಂಕಿತರು ಪತ್ತೆಯಾದಂತಾಗಿದೆ.