ಬಾಲಿವುಡ್‌ ನಟ ಸುಶಾಂತ್‌ ಕೇಸು: ಮಲ್ಯ ಪ್ರಕರಣ ನಿರ್ವಹಿಸಿದ ಸಿಬಿಐ ತಂಡದಿಂದ ತನಿಖೆ

Team Udayavani, Aug 7, 2020, 10:40 AM IST

ಹೊಸದಿಲ್ಲಿ/ಮುಂಬಯಿ: ಬಾಲಿವುಡ್‌ ನಟ ಸುಶಾಂತ್‌ ಸಿಂಗ್‌ ರಜಪೂತ್‌ ಆತ್ಮಹತ್ಯೆ ಪ್ರಕರಣ ಈಗ ಸಿಬಿಐಗೆ ಹಸ್ತಾಂತರಗೊಂಡಿದೆ. ಅಗಸ್ಟಾ ವೆಸ್ಟ್‌ಲ್ಯಾಂಡ್‌ ಕಾಪ್ಟರ್‌ ಹಗರಣ, ವಿಜಯ ಮಲ್ಯ ಬ್ಯಾಂಕ್‌ ವಂಚನೆ ಪ್ರಕರಣದ ತನಿಖೆ ನಡೆಸುತ್ತಿರುವ ಸಿಬಿಐನ ವಿಶೇಷ ತನಿಖಾ ತಂಡ(ಎಸ್‌ಐಟಿ)ವೇ ಸುಶಾಂತ್‌ ಪ್ರಕರಣದ ತನಿಖೆ ನಡೆಸಲಿದೆ. ಅದಕ್ಕೆ ಪೂರಕವಾಗಿ ಗುರುವಾರವೇ ಕೇಂದ್ರ ತನಿಖಾ ಸಂಸ್ಥೆ ಎಫ್ಐಆರ್‌ ದಾಖಲಿಸಿದೆ. ಸುಶಾಂತ್‌ ತಂದೆ ನೀಡಿದ ದೂರಿನ ಅನ್ವಯ ಬಿಹಾರ ಪೊಲೀಸರು ಆತ್ಮ ಹತ್ಯೆಗೆ ಪ್ರಚೋದನೆ ಕೇಸನ್ನು ದಾಖಲಿಸಿಕೊಂಡಿರುವ ಕಾರಣ, ನಾವು ಬಿಹಾರ ಪೊಲೀಸರ ಸಂಪರ್ಕದಲ್ಲಿದ್ದೇವೆ ಎಂದು ಸಿಬಿಐ ಅಧಿಕಾರಿಗಳು ತಿಳಿಸಿದ್ದಾರೆ.

ವಾಪಸಾದ ತಂಡ: ಸುಶಾಂತ್‌ ಪ್ರಕರಣದ ತನಿಖೆಗಾಗಿ ಮುಂಬಯಿಗೆ ಆಗಮಿಸಿದ್ದ ನಾಲ್ವರು ಪೊಲೀಸರ ತಂಡ ಗುರುವಾರ ಬಿಹಾರಕ್ಕೆ ಮರಳಿದೆ. ಸುಶಾಂತ್‌ ತಂದೆ ರಿಯಾ ವಿರುದ್ಧ ನೀಡಿದ ದೂರಿನನ್ವಯ ತನಿಖೆಗೆಂದು ಜು.28 ರಂದು ಈ ತಂಡ ಮುಂಬಯಿಗೆ ಆಗಮಿಸಿತ್ತು. ಈ ನಡುವೆ ಬಿಹಾರ ಮತ್ತು ಮುಂಬಯಿ ಪೊಲೀಸರ ನಡುವಿನ ಹಗ್ಗಜಗ್ಗಾಟ ಮುಂದುವರಿದಿದೆ. ಮುಂಬಯಿನಲ್ಲಿ ಒತ್ತಾಯಪೂರ್ವಕ ವಾಗಿ ಕ್ವಾರಂಟೈನ್‌ನಲ್ಲಿ ಇಟ್ಟಿರುವ ಬಿಹಾರದ ಐಪಿಎಸ್‌ ಅಧಿಕಾರಿಯನ್ನು ಬಿಡುಗಡೆ ಮಾಡದೇ ಇದ್ದರೆ ಕಾನೂನು ಕ್ರಮ ಕೈಗೊಳ್ಳ ಲಾಗುತ್ತದೆ ಎಂದು ಬಿಹಾರ ಪೊಲೀಸ್‌ ಮುಖ್ಯಸ್ಥ ಗುಪ್ತೆಶ್ವರ ಪಾಂಡೆ ಎಚ್ಚರಿಸಿದ್ದಾರೆ. ಬೃಹನ್ಮುಂಬೈ ಪಾಲಿಕೆಯ ನಿರ್ಧಾರದ ಬಗ್ಗೆ ಸುಪ್ರೀಂ ಕೋರ್ಟ್‌ ಕಿಡಿಕಾರಿದ ಬಳಿಕವೂ ಅಧಿ  ಕಾರಿ ವಿನಯ್‌ ತಿವಾರಿಯವರನ್ನು ಬಿಡು ಗಡೆ ಮಾಡದೇ ಸತಾಯಿಸುತ್ತಿರುವ ಹಿನ್ನೆಲೆ ಯಲ್ಲಿ ಪಾಂಡೆ ಈ ಎಚ್ಚರಿಕೆ ನೀಡಿದ್ದಾರೆ.

ದಿಶಾ ಸಾವು ಅನುಮಾನಾಸ್ಪದವಲ್ಲ: ಸುಶಾಂತ್‌ರ ಮಾಜಿ ಮ್ಯಾನೇಜರ್‌ ದಿಶಾ ಸಾಲಿ ಯಾನ್‌ ಅವರ ಸಾವಿನಲ್ಲಿ ನಮಗೆ ಯಾವುದೇ ಅನುಮಾನಾಸ್ಪದ ಅಂಶ ಕಂಡು ಬಂದಿಲ್ಲ. ಮುಂಬಯಿ ಪೊಲೀಸರು ನಡೆಸಿದ ತನಿಖೆ ಬಗ್ಗೆ ನಮಗೆ ಸಂಪೂರ್ಣ ತೃಪ್ತಿಯಿದೆ ಎಂದು ದಿಶಾ ತಂದೆ ಸತೀಶ್‌ ಸಾಲಿಯಾನ್‌ ಗುರುವಾರ ಹೇಳಿದ್ದಾರೆ. ಈ ಕುರಿತು ಅವರು ಸಹಾಯಕ ಪೊಲೀಸ್‌ ಆಯುಕ್ತರಿಗೆ ಪತ್ರ ವನ್ನೂ ಬರೆದಿದ್ದಾರೆ. ದಿಶಾರನ್ನು ಅತ್ಯಾಚಾರ ಗೈದು ಕೊಲ್ಲಲಾಗಿದೆ, ಆಕೆಯ ದೇಹದ ಮೇಲೆ ಅಸಹಜ ಗಾಯಗಳು ಕಂಡುಬಂದಿವೆ ಎಂಬ ವರದಿಗಳ ಹಿನ್ನೆಲೆಯಲ್ಲಿ ಸತೀಶ್‌ ಸಾಲಿಯಾನ್‌ ಈ ಸ್ಪಷ್ಟನೆ ನೀಡಿದ್ದಾರೆ.

ಸುಶಾಂತ್‌ ನಂಬರ್‌ ಬ್ಲಾಕ್‌ ಮಾಡಿದ್ದ ರಿಯಾ!
ಸುಶಾಂತ್‌ ಅವರ ಮೊಬೈಲ್‌ ಫೋನ್‌ ಸಂಖ್ಯೆಯನ್ನು ಗರ್ಲ್ಫ್ರೆಂಡ್‌ ರಿಯಾ ಚಕ್ರವರ್ತಿ ಜೂನ್‌ 8ರಂದೇ ಬ್ಲಾಕ್‌ ಮಾಡಿದ್ದರು ಎಂಬ ಹೊಸ ವಿಚಾರ ಗುರುವಾರ ಬೆಳಕಿಗೆ ಬಂದಿದೆ. ಹೀಗಾಗಿ ಜೂ.8ರಿಂದ 14ರವರೆಗೆ ಸುಶಾಂತ್‌ ಮತ್ತು ರಿಯಾ ನಡುವೆ ಯಾವುದೇ ದೂರವಾಣಿ ಸಂಭಾಷಣೆ ನಡೆದಿರಲಿಲ್ಲ ಎಂದು ಕಾಲ್‌ ರೆಕಾರ್ಡ್‌ಗಳ ಮಾಹಿತಿಯಿಂದ ತಿಳಿದುಬಂದಿದೆ. 14ರಂದು ಸುಶಾಂತ್‌ ಬಾಂದ್ರಾದ ತಮ್ಮ ಫ್ಲ್ಯಾಟ್‌ನಲ್ಲಿ ಆತ್ಮಹತ್ಯೆಗೆ ಶರಣಾಗಿದ್ದರು.